Read Northern Rengma Naga 1 KORINTHNYI 3 Bible Online

1 KORINTHNYI 3 - Northern Rengma Naga bible

1 KORINTHNYI 3

¹Isala icünyuthu, hi nthu pi aghamu kepvü nyithu ti sa nu nthu ccüneng meyale, isala nthu pi asajjü nyi ti nu Khrista wi meme ti sa nu nthu ccünengden.

² Hi atsse kekhang nyela atsenitssü pi nthu ghanja, kepaghenanye nthu na atsse kekhang tsü npi dsaya. Nu nthu na khilila tsü npi dsa qo,

³kepaghenanye nthu na khilila ayyi ha wi nyi ti hangben. Nthu jawi anyonghokepvü ben nu nthu na khokho ssi kitaghali lethu, tsüna nthu asajjü wi nu ayyi ha wi kahangyen ti sa nben kwe?

⁴ Nthu meshu kesü na “Hi Paul nieden,” nu kepawa na “Hi Apollo nieden,” isa khithu, tsüna nthu ayyi ha wi nyithu ti sa nben kwe?

⁵Isathu, Apollo na thowa nu? Nu Paul na thowa nu? Ishinyi na Anyiza maghathu, nthu ssi wa nondiya thsü ketenthu. Ishinyi qho Apvüwa na kekuli pi ishinyi dhen kechi tsü saden:

⁶ Hi macü pi vvüchi, nu Apollo na atssü pi zügüchi, isala maton sa pi shigü thsü ketenwa tsüna Anyiza.

⁷Tsalina anyi amacü pi vvü kechiwa le atssü pi zügü kechiwa lela mangla nye, isala Anyiza na maton sa pi shigü keshaghawa tsü le!

⁸Anyi amacü pi vvü kechiwa nu atssü pi zügü kechiwa manyi kepapa kesa nmi, manyi qho Anyiza wi ma kekuli qei wina akutimen muya ben.

⁹Kepaghenanye ishinyi na gweghe nu Anyiza kekuli kesa nyi, nu nthu na Anyiza lli tsü. Nthu na Anyiza jjen tsü la,

¹⁰Anyiza na nanketizen pi hi kecü wina hi anyonsu kepvüwa ti kuli nu magi kedegü chidha, nu anyi kepa na tsü miwi sakiben. Isala kesü le kesü lela ajjen kesa wi nkiden-keshathu yishü.

¹¹Kepaghenanye Anyiza na Jisu Khrista pi magi kedegü ketheng ketanwa tsü sa thsüdha, nu thola magi kepa wi kedegü keya nmi.

¹²Pahan na suna, rükatssü, nyelela alon menkedhu sen nu magi kedegü ketheng miwi ajjen sa; kepathu na achan, alishü nyelela amatsi sen nu saben.

¹³Isanu Khrista tsathang kegho wi anyi kesüsü kekuli khati kesa khe muya ben. Kepaghenanye tsü tsathang wi anni na anyi tsüdi kekuli pi ccücaben; anni na tsü mecang nu kemehai-keteshi tsentsawa pi ccücaaben.

¹⁴Keujüla magi kedegü ketheng miwi ajjen kesawa tsü nmecang lethu, tsü kesawa na akutimen muya ben.

¹⁵Isala keujüla anyi thowa kekuli tsü mecang khe, ma kekuli tsü dediaben; isala ma pvüwa tsü ma anni wina shhukeya ti hangsha yaben.

¹⁶ Nthu na Anyiza kekinyijjen nu Anyiza Ghamu na nthu wi hangben kesa nthu na chübenla metsi le!

¹⁷Tsalina keujüla anyi kesü le kesü lela Anyiza kekinyijjen tsü yasa lethu, Anyiza na ma yasa cüben. Kepaghenanye Anyiza kekinyijjen tsüna metha, nu nthu na ma kekinyijjen tsü.

¹⁸Anyi thola ma ketanla ma nmechula. Keujüla nthu jawi anyi meshu kesü na ma ayyi ha wi metsa benle meshen ben lethu, ma atsentsa kemetsa nyi saya thsüle kesalina ma kejüphon kesü sa thsülo.

¹⁹ Kepaghenanye ayyi ha wi kemetsa le sa keten tsüna Anyiza tuwi kejüphon. Ntsawajüh na kekhi ti, “Anyiza na kemetsathu cho kemehai wina mathu ghanya ben”;

²⁰ nu Ntsawajüh hati la khiben, “Kemetsawa kemeshenthu tsüna ma men nmi kesa Apvüwa na chüben.”

²¹Tsalina thola anyi saya ketenthu ghena nkapvü lalo. Kepaghenanye pala tsüdila nthu ji:

²²Paul, Apollo, nu Pitor, ayyi ha, kahang nu keshü, khili nu ashiseng la hathu ha tsüdila nthu ji,

²³nu nthu na Khrista ji, nu Khrista na Anyiza ji.