Read Northern Rengma Naga 1 KORINTHNYI 7 Bible Online

1 KORINTHNYI 7 - Northern Rengma Naga bible

1 KORINTHNYI 7

¹Khili nthu na zhükechi jjügi khi waden. Npvüza kesü awubvü nkeyawa mehai.

²Isala ciwi kahang nkemetha sha ntsa kesalina npvüza tsüdila ma wubvü ben, nu nza tsüdila ma wuba nbenthu yishü.

³Npvüza kesü na awuba kesa-u tsü sa, nu nza kesü na awubvü kesa-u tsü sa, tsüti nu khokho kenenwa tsü sacenlo.

⁴Kepaghenanye awubvüwa gwo tsüna ma kemeshen nye, isala awubawa na tsü miwi kekhang ben; tsü makesü awubawa gwo tsüna ma kemeshen nye, isala awubvüwa na tsü miwi kekhang ben.

⁵Nshinyi na matsü keujü kekhie sale kesa ghena cen pi nketheng tsü nshinyi khokho nhhaghela; isala tsaseng wi nshinyi jüwi keshanyi yenwa tsü sa neng walo. Hati nu nthu na kekhen neng meyala Satan kemechu wi duya kemehai khen yaben.

⁶Hi ha ahza pi nthu ncüla nthu ghena kemehaiwa khiben.

⁷Nthu tsüdila hi ti saya thsü mvuben; isala anyi tsüdila Anyiza wi papa kesawegü ben, kesü kesawegü na ha, nu kepawa kesawegü na katsü.

⁸Khili hi ajüh ha pi npi keshanyithu nu denyithu kizaben: Nthu la hi ti nshanyila kebenwa nthu ghena mehai ben le!

⁹Isala keujüla nthu kenmvuwa tsü kekhenengya nben lethu, nthu shanyi walo - kekheneng pi agüccü ntsa saben kesa tsü shanyi wa kesawa mehai.

¹⁰ Shanyi wa kesathu ghena hi ijüh nyela Apvüwa na ayenkhukechi ben: awubvü kesü na ma wuba teshi yishü;

¹¹isala keujüla ma tsüti sa lethu, ma ketan hang nbenthu yishü nyelethu ma wuba manyi ajühkeyali nengya; nu awuba kesü na ma wubvü nteshila.

¹²Hi ajüh pi kepathu la kizaben (Ha hi na khe Apvüwa na nye): Keujüla Khristanyi npvüza kesü na ma wubvü nkenondi nyi ben, isala ma manyi gweghe hang mvu ben lethu, ma wubvü tsü teshi yishü.

¹³Nu keujüla Khristanyi nza kesü na nkenondi nyi npvüza kesü wi n-nuwa, nu ma manyi gweghe hang mvu ben lethu, ma wuba tsü teshi yishü.

¹⁴Kepaghenanye awuba nkenondiwa tsüna ma wubvü manyi gweghe keben wina Anyiza na ma keyaqo nyi sayaben, nu awubvü nkenondiwa tsü la ma wuba Khristanyi manyi gweghe keben wina Anyiza na ma keyaqo nyi sayaben. Keujüla tsüti nsa lethu, manyi tsangathu na Anyiza nkechü tsangathu saben; isala tsüti saya lethu, Anyiza na mathu keyaqo nyi sayaben.

¹⁵Isala keujüla nkenondiwa na ma kegweghe wa Khristanyi tsü teshi mvu ben lethu, tsüti sa thsülo. Hati kesa wi Khristanyi awubawa sa le awubvüwa sa lela ma kemeshen saya mehai; kepaghenanye Anyiza na kecca wi hang thsüle nthu ciya.

¹⁶Khristanyi awubvüwa, no khatinu nwuba hangshaya nben kesa chüti ben nu? Nyelela Khristanyi awubawa, no khatinu nwubvü hangshaya nben kesa chüben nu?

¹⁷Anyi kesü le kesü lela Apvüwa na aju pi ma kecü nu ma khati kesa wi Anyiza na ma ciya khe tsü kenie wi hang tenlo. Hawa ha hi pi kemehu tsüdi wi nyu sansi keten yenwa tsü.

¹⁸Anyi kesü ma hyukahan seng wi Anyiza na ma ciya kwe? Ma ahyukahan yisü tsü khupiale nsala. Anyi kesü ma ahyu npi kahan wi Anyiza na ma ciya kwe? Ma ahyuhan le nsala.

¹⁹Kepaghenanye anyi kesü ahyu han le nhan lela ma jjügi nmi, isani Anyiza jühkhukechithu tsü kenie wi ma men ben.

²⁰Anyi kesü le kesü lela ma khati keben wi Anyiza na ma ciya khe ma ciwi benlo.

²¹No nssümagha kesü sa keben wi Anyiza na no ciya kwe? Mangla nsa, leben ketizen nsala; isala keujüla no kekhenkeghe nkemi nyi saya kemehai na ben lethu, tsüti saya.

²²Kepaghenanye Apvüwa na nssümagha kesü cikeya tsüna Apvüwa wi kekhenkeghe nkemi nyi; tsü makesü Khrista na kekhenkeghe nkemi nyi kesü cikeya wi ma Khrista magha sadha.

²³Anyiza na nthu shüyadha; tsalina anyithu nssümagha nsala.

²⁴Icünyuthu, anyi tsüdila ma khati keben wi Anyiza na ma ciya khe ma ciwi Anyiza ssinu ashusa bentenlo.

²⁵Khili keshanyi nkesa nu denyithu cüki khi waden: hi Apvüwa yenkhukechi nmi, isala hi kemeshen pi Apvüwa nanketizen wina kenondi qo sa nu khiben.

²⁶Nansü agükeccü cüki ha meshenchilo, hi kemeshen tsü anyi kesü ma ketan kebenwa mehaiben.

²⁷No awubvü kesü ben kwe? Isathu, no ma teshiale nsala. No awubvü npi ya kwe? Isathu, no awubvü yale nsala.

²⁸Isala keujüla no awubvü yaya lela no kesami nsa; nu keujüla nza kesü na n-nuwa lela ma kesami nsa. Isala hi nthu yala keshanyi sa kewathu na ayyi wi kahang wi gükeccü kebenwa tsü nsa thsü mvu.

²⁹Icünyuthu, hi khi kebenwa na: matsü ssan kethengwa tsüna kesie nyedha, khili nten na anyi shanyi wa kesathu na nkeshanyi ti hang wa;

³⁰qai kebenthu na mathu ahatha nkinaa ti sa; anonghe kebenthu na mathu anonghe nkeben ti sa; pala shei kebenthu na mathu mangla shei nkeya ti sa;

³¹ayyi tsanqai sensa kebenthu na mathu na tsüthu ghena dhamang nkeben ti salo. Kepaghenanye ayyi hawa ha khili ti saben le kesa matsü na kesie nyedha.

³²Hi nthu yala ahathana nsa thsü mvu. Awubvü nkeya nyi na Apvüwa kekuliwa tsü meshen benden, kepaghenanye ma Apvüwa kenen tsü sa benden.

³³Isala awubvü keya nyi na ayyi wi kekuliwa tsü sa benden, kepaghenanye ma ma wubvü kenen tsü sa benden;

³⁴tsalina ma alen keni meshen benden. Npi n-nukewa nyelela ghala pvünyimetha kesü na Apvüwa kekuliwa tsü meshen benden, kepaghenanye ma agwo nu aghamu wila satemethaya mvu benden; isala kinyibvü na ayyi wi kekuliwa tsü meshen nu sa benden, kepaghenanye ma ma wuba kenen tsü sa benden.

³⁵Hi nthu kiqa cü mvu kesalina ha khiben. Hi kekhenkeghe pi nthu tuwi chi nben; isala hi nthu ya kemeshonwa nu kesa-u tsü sa, nu nthu kahang tsüdi pi nmishala Apvüwa kekuli saya thsü mvu ben.

³⁶Gweghe benle ajühcen theng nu madhale kesathu: Keujüla npvüzawa na ma nzawa tuwi nkesa-u saben le meshen nu keujüla ma kenmvuwa tsüna khang ntsa nu manyi keben-ule sa lethu, ma nmvu keben tsüti manyi ben wa nsathu yishü. Tsüti kesa wi kesami nmi.

³⁷Isala keujüla npvüza kesü ma leben wi awubvü ya meten kesa meshen ntsa ben, nu keujüla ma kekhenengya mehai nu ma leben wi khati saten khe südheyadha lethu, ma awubvü nkeyawa mehai le!

³⁸Tsalina npvüza awubvü keyawa mehai, isala awubvü nkeyawa na mehai kayi.

³⁹Kenyibvü kesü na ma wuba hang keben chu ma khen senben; isala ma wuba na shü lethu, ma thowa wi n-nuwa mvu ben khe ma kekhenkeghe nmidha, isala tsüna Khristanyi wi ketan saben.

⁴⁰Isala keujüla nzawa na ma ketan ben lethu, tsüwa ma nonghe kayi ben. Ha hi kemeshen nu Apvüwa Ghamu la hi wi ben kesa nondiben.