Read Northern Rengma Naga 2 KORINTHNYI 1 Bible Online

2 KORINTHNYI 1 - Northern Rengma Naga bible

2 KORINTHNYI 1

¹ Paul, Anyiza kemeshen wina Jisu Khrista apostel nu ithu cünyuwa Timothi wina pi Korinth wi kemehu nu Akhaya yyi tsüdi wi Anyiza nyithu tsüdi kecü:

²Ithu Ba Anyiza nu Apvüwa Jisu Khrista ya nanketizen nu kecca pi nthu kecüwa salo.

³Ithu keseng pi Anyiza ithu Pvüwa Jisu Khrista Ba, nu nanketizen Bawa, ma wina kekiqa tsüdila gho ketenwa Anyiza cü nalo!

⁴Anyiza na ithu ketizen kesa tsüdi wi kiqa keten ghena ithu la ma wi mukeya kekiqa tsü sen nu nyu kepa wi ketizen sa kebenthu kiqaya mehai.

⁵Ithu na Khrista ketizen kesa kejon wi gwegheya kesa tsüti Khrista wina Anyiza wi kekiqa keti muyaden.

⁶Keujüla ikhang na ketizen sa lethu, tsüna nthu ghena kekiqa nu hangshakeya tsü; keujüla ikhang na kekiqa muya lethu, tsüna nthu la kiqa yaden nu ikhang na ketizen kesa wi kethankehi keya ti nthu la lebensie nu kethankehi ya kemehai kezü pi cüden.

⁷Tsalina ikhang na nthu wi kaghangwa tsü khiela pakuli meya; kepaghenanye nthu na ikhang gweghe ketizen kesa ti nthu na ikhang gweghe la kekiqa mu yaben kesa ikhang na chüben.

⁸ Icünyuthu, nthu yala ikhang na Asia yyi wi ketizen kesa cüki tsü chüya thsü mvuben. Ikhang na agüccü ntsa nu ketizen sa ntsa kesalina ikhang hangya keben n-nondi lale!

⁹Ikhang na keshü ithu miwi ghodha le meshen. Isala tsüti sa nu ikhang ketanla ikhang kenondiwa nyela keshü sa pi hang kecüwa Anyiza miwi ketan nondiya thsü kesalina.

¹⁰Ma keshü kemessi hati kesa wina ikhang hangsha cü, nu ikhang hangsha cüben; nu ma ikhang hangsha neng cüben kesa ma miwi ikhang kaghang ben,

¹¹nthu na kekhie wina ikhang kekiqa ghena. Tsalina anyi kejon kekhie keluneng wina Anyiza na sawegü pi ikhang cü; nu anyi kejon na ikhang ghena Anyiza seng ben.

¹²Ikhang kapvü kebenwa na ikhang kechükeza methasi nu ikhang kizaben, ikhang ayyi ha wi kahang wi nthu gweghe keya hana anyi kemetsa wi nyela Anyiza nanketizen kekhang wina khukechi lebensha kechi nu jühtsentsa wina.

¹³Ikhang na nthu si nu chüya kemehai ketan zhü pi nthu cüben. Isala nthu na khili ikhang jüh tsü pahan ketan chüshi yaben, Apvüwa Jisu tsathang wi ikhang na nthu ghena kapvüya keten ti nthu na ikhang ghena kapvüya thsüle kesalina nthu na ikhang cüki chüshitha yaben kesa hi ghangben.

¹⁵Hi tsüdi wi chütiben, nthu ya keni tughu kemihhi muya thsüle kesalina hi atuwa sa nthu wi ghole sa.

¹⁶ Hi Macedonia wi kewalen sa nthu hhainan chi nu kegho neng wi lela nthu yala hi Judea wi kewa wi hi kiqachi thsüle kesalina hi nthu wi gho mvuben.

¹⁷Hi hati kesa wi hi kemeshen kemili-kemija keten nyi ti saben kwe? Hi ketanla ighena kemehaiwa sa nu kemeshen hati kesa wi wan “Anle,” nu “Nyele.” khi chiten kwe?

¹⁸Anyiza na jühtsentsa khi keten tsüti hi nthu wi “Anle,” nu “Nyele,” npi khichi.

¹⁹ Kepaghenanye Sila, Timothi, nu hi, ikhang na pi nthu sansi kechi Anyiza Tsawa, Jisu Khrista tsüna “Anle,” nu “Nyele,” kesawa tsü nye, isala Anyiza ma “Anle,” kesawa tsü.

²⁰Kepaghenanye Anyiza jüh khishikechi tsüdila ma wi “Anle,” kesa tsü muya den. Tsalina Jisu Khrista wina ithu “Amen” khi pi Anyiza nyanthang den.

²¹Anyiza na ma ketanla ikhang sa pi nthu gweghe thsü, tsüna ikhang na Khrista wi hang keben ti; Anyiza na ma ketanla ikhang khudhi pi ma kepa sa,

²²nu ma ji le kesa mechantsi pi ithu miwi chi, nu ma kiden pi ketheng tsüdila ithu ji le kesa ma Kemetha Ghamu pi ithu leben wi ithu nkhenshadha.

²³Hi Anyiza pi hi chüza saben — ma ileben chüben! Tsüna nthu yala mehaiya thsüle kesa ghena hi Korinth wi ngho lale!

²⁴Ikhang na nthu kenondi miwi apvüwa sale kesa ghena nye; nthu na kenondi wi zükeqhe ben kesa ikhang na chüben. Tsüti kesawa nyela, ikhang na nthu gweghe nu nthu nonkeghewa ghena kuliden.