Read Northern Rengma Naga 2 KORINTHNYI 10 Bible Online

2 KORINTHNYI 10 - Northern Rengma Naga bible

2 KORINTHNYI 10

¹Hi Paul, Khrista yencüki kemehai nu keccaketssü wina nthu wi khieben— hi nthu gweghe keben wi iyencüki mehai nu ccatssü, isala nthu gweghe nbenla lethu, nthu tuwi ijüh khang waden.

²Hi nthu wi khie kebenwa na hi khathansha nthu tuwi gho khe hi ya ijüh nkhang thsü lalo; kepaghenanye hi anyi ikhang na ayyi sajjü kenie wina kuli tenle khi ketenthu tuwi ijüh khangya mehai.

³Kepaghenanye ikhang na ayyi wi hangben lela ikhang na ayyi sajjü wi aghisa nten.

⁴Ikhang ghitsanqaithu tsüna ayyi ghitsanqaithu nye, isala Anyiza kekhang ghitsanqaithu sen nu ghinyithu khweti tsü yasaden. Ikhang na milikemesa jüh keccücanlithu tsü yasa;

⁵ikhang na kekapvü na Anyiza wi palakechü khen keben tsüdi zanshaden; ikhang na kemeshen wi atssüzü sa keben tsü senghola Khrista jühkeya wi chiden.

⁶Nu nthu na ajühkeya tsü chüti keya seng wi ikhang na ajüh nkeya kekuli tsü kemeten pi cüle kidenyadha.

⁷Nthu na pala amei wi ketan ghangten kwe? Keujüla anyi kesü na ma ketanla ma pi Khrista jile saten lethu, ma yala ma cüki meshenchi thsülo; kepaghenanye ma Khrista ji kesa ti ikhang la tsüti.

⁸Kepaghenanye nthu yasa cüle kesawa nyela nthu pieki cülo kesalina Apvüwa na kekhang pi hi kecü tsü ghena hi kapvü pongca lela hi kejüghe nmi.

⁹Hi lesü ha zhü pi nthu pateqhe keben ti nsa thsü mvu.

¹⁰Anyi pahan na khiben, “Paul lesü zhükechithu na kiyan nu khang ntsawa; isala ma ikhang jawi keben tsü nzü nu ma jühthu na mangla nye le!

¹¹Anyi hati kesathu yala ikhang na nthu gweghe nkemi wi mangwa le khila lesü zhüchi nu ikhang na nthu gweghe keben wi mangwa kuliten khe kepapa nmile kesa chüya thsülo.

¹²Ikhang ketanla ikhang pi makepa sa nyelela pi anyi pahan na mathu ketanla mathu pi misikhhali sa ketenthu tsü ghape nben. Mathu na khatila jeng nu! Mathu ketanla mathu kedegü nu mathu ketanla mathu kaghapeli benten le!

¹³Isala ikhang ghena tsü, ikhang kekapvüwa tsüna ma kenten ben; tsüna Anyiza na kulilo kesa pi ikhang kecü nten ketan, nu tsüna nthu la ciwi saghu ben.

¹⁴Nu nthu na tsü kenten nten wi keben ghena ikhang na Khrista cüki Jühtheü Kemehaiwa sen nu nthu wi kegho wi tsü miwi wa meya.

¹⁵Tsalina Anyiza na ikhang ghena kenten sa ketheng nyu kepathu na tsü miwi kuli kechi cüki ghena nkapvü lalo. Tsüti kesawa nye, nthu kenondi ji kayiya nu Anyiza na kenten sa ketheng ciwi na ikhang na keshüthangla nthu jawi kekuli tisie kayi wayaben kesa ghangben.

¹⁶Isanu ikhang na nthu thenkeghe sen wa diyyi kepathu wi la Jühtheü Kemehaiwa pi nyu sansiya mehai nu nyu kepa lli wi kekuli kesa cüki ghena nkapvü thsüle kesalina.

¹⁷ Isala Ntsawajüh na kekhi ti, “Anyi thowa na kapvü mvuten khe Apvüwa kuli kechi cüki ghena kapvü thsülo.”

¹⁸Kepaghenanye Apvüwa na anyi kesü khi pi mehai lethu, ma ntsakhiwa mehaiben khe anyi ma ketanla ma khi pi mehai ketenwa tsüna mangla nye.