Read Northern Rengma Naga 2 KORINTHNYI 11 Bible Online

2 KORINTHNYI 11 - Northern Rengma Naga bible

2 KORINTHNYI 11

¹Hi keu kejüphon ti sa lela nthu yala kekhenengya thsü mvuben. Nchala tsüti salo!

²Hi Anyiza ti nthu wi anonmeyen ben; kepaghenanye hi nthu pi shanyili kemetha kesü ti sala awuba kesü, Khrista wi tsü n-nuwa thsüle ajühkhishi chidha.

³ Amaghang cho nkemehaiwa na Eve mechu kesa tsüti nthu kahang yasa nu nthu na Khrista wi leben kechi nu kemetha tsü teshi nashe kesa hi messiben.

⁴Kepaghenanye nthu na yazishu nu ikhang pi nthu kesansi tsü nyela thowa na Jisu kepa wi sengho nthu sansi khe tsü yaya; nu Aghamu nu ajühkemehaiwa ikhang wi mu keyawa tsü nyela kepa wiwa yayaten le!

⁵Hi kemeshen tsü hi khie wi la nthu pi “apostel” kemisithu le khi ketenthu tsü miwi nzzaki le!

⁶Hi ajüh nkhichü lela palakechü wi tsü tsüti nye; ikhang na alentagha wi nu pala tsüdi wila nthu wi tsü methasi sa cüdha.

⁷Hi nthu wi mangla meyala Anyiza Jühtheü Kemehaiwa pi nthu sansi; hi nthu pi kemechan saya thsüle kesalina hi ketanla hi satemeni sa. Tsüna hi sazzi kwe?

⁸Hi nthu jawi kekuli kesa wi kemehu kepathu na ikutimen sa. Hi nthu kiqale kesalina mathu ji kaghanfü ti sa.

⁹Hi nthu gweghe keben wi hi nsenthu keyishü wi lela nthu likesaghang nsa; kepaghenanye Macedonia wina kegho acünyuthu na hi nsenthu keyishü tsüdi sengho hi cüa. Tsalina hatu wi ti hi ghaketen wi lela khiela nthu likesaghang sa nben le!

¹⁰Khrista tsentsawa na hi wi keben tsüti hi kekapvü ha Akhaya yyi tsüdi wila ccen ben nben.

¹¹Hi nthu nketizen ghena ha khiben kwe? Hi nthu tizenben kesa Anyiza na chüben.

¹²Hi khili mangwa saben khe tsü nteshila sa benden, tsüna “apostel” kepathu yala mathu la ikhang kekuli makesü kuli tenle khi nu nkapvü thsüle kesalina.

¹³Anyi hati kesathu tsüna atsentsa apostelthu nye, mathu na milikemesa kekulithu nu mathu tsisa kemili pi ntsakhiwa Khrista apostelthu ghe saden.

¹⁴Aman nsala! Satan lela ma tsisa kemili pi tangnyilo kewegü kesü ti saya mehai le!

¹⁵Tsalina ma nyilothu na mathu tsisa kemili pi ketsatanwa nyilothu ti sa lela tsüna pala kedi nye le! Mathu asakhen wi mathu kekulithu tsü kenie wina muyaben.

¹⁶Hi khineng ben, thola hi pi kejüphon le nmeshen lalo. Isala keujüla nthu na tsüti sa lela hi pi kejüphon kesü ti sa nu hi ssiyalo, isanu hi keu kapvüya thsülo.

¹⁷Hi khili khi kebenwa ha Apvüwa na hi kekiza jüh nye; kekapvü cüki khi keben ha ntsakhiwa hi kejüphon kesü ti khiben.

¹⁸Isala ciwi anyi kejon na ayyi sajjü wi kapvü keten ghena hi la tsü makesü saben.

¹⁹Nthu na metsa ntsa kesa ghena anonghe nu kejüphon tuwi kekheneng yaden.

²⁰Anyi na nthu pi nssümaghathu sa thsü, nthu miwi mathu ghena kemehaiwa saya, nthu mechu, nthu nkhichi, nyelela nthu mmi cen cü lela nthu na kekheneng yaden.

²¹Hi jüghe la ha khiben, ikhang na hathu sa keya kekhang nmila le! Isala keujüla anyi kesü na pala pahan ghena kapvü lethu, hi kejüphon kesü ti khiben— hi la kapvü ben.

²²Mathu Ibri nyi kwe? Hi la na. Mathu Israel nyi kwe? Hi la na. Mathu Abraham shicübvüghathu kwe? Hi la na.

²³ Mathu Khrista maghathu kwe? Hi kejüphon kesü ti khiben, isala hi mathu miwi kemehaiki amagha kesü le! Hi apiketsü sa kuli, hi kejon tughula atssüzü sa, kejon tughula nyu na hi kihhe, nu hi kejon tughula shü zzi.

²⁴ Manga tughu Judah nyithu na akhhatssü changha nu tugu tughu pi hi kihhe;

²⁵ kecheng tughu Rom nyithu na amighe khhatssü pi hi kihhe, nu kuti alon pi hi kicen. Kecheng tughu hi ahunjjen wi wa keten yasa, nu kuti aghaja ghanan kesü atssü non wi ben wa.

²⁶ Hi matsü kejon tughu kijünyi kewa wi atssüketi wi nu kaghanfüthu jawi, Judah nyithu nu Anyiza nkechüthu jawi kemessi wi ben; ciwi anyunuti nu agheja wi, atssükedone nu milikemesa pvüshangthu jawi kemessi wi ben.

²⁷Hi agüccü ntsa nu kuli; ghaja kejon wila jen meya; ghama nu dighe; matsü kejon wila kedsakejjü, kejenpen, nu athsümeni nmila sa.

²⁸Nu pala kepathu nkhila hi atsathangla kemehuthu tsüdi cüki kemeshen leben gükeccü na imiwi ben.

²⁹Anyi kesü nzüla ben lethu, hi la nzüla benden; anyi kesü na kesami wi ben lethu, hi ihathana benden.

³⁰Keujüla hi nkapvüthu yishü lethu, hi kekapvü tsüna pala hi kekhang nkemi len pi ccücaya keten tsü.

³¹Apvüwa Jisu Nyiza nu Abawa na hi milimesa nben kesa chüben, anuphanla ma nyanthang keyawa salo!

³² Hi Damaska wi keben wi Kadimi Aresta kekhu wi ahng na hi ghangyale kesalina anyunuti khweti wi hieben.

³³Isala hi pi ashijü kesü wina akhweti kukebi wi shhu thsü nu ma tuwi na bvüya.