Read Northern Rengma Naga 2 KORINTHNYI 12 Bible Online

2 KORINTHNYI 12 - Northern Rengma Naga bible

2 KORINTHNYI 12

¹Kekiyi mangla nmi lela hi kapvüden. Isala hi khili Apvüwa na kemanthi nu ccücakechi pi hi kecü cüki tsü khi waden.

²Amapi taghamejü wa kesa wi Khristanyi kesü zanki pi atssan shha kechengwa wi chiya kesa hi chüben (Ha ntsakhiwa wina la ma kemanthi wina sa khe hi nchü, Anyiza ketan chüben).

³Hi khineng ben, anyi hawa zanki pi Paradis wi chiya kesa tsü hi chüben (kheneng, ha ntsakhiwa wina la kemanthi wina khe hi nchü, Anyiza ketan chüben), nu ma ciwi ahhai pi ajüh wi chi nkeya zaya, tsüna anyi pang pi khiya nben.

⁵Tsalina hi anyi hawa ghena kapvüden, isala hi ketanla ighena kapvü nten, hi nkekhang pi ccücale nkesa tsü.

⁶Keujüla hi kapvü mvu lela hi kejüphon nyi kesü nye, kepaghenanye hi atsentsawa tsü khiden. Isala hi anyi thola ma hi kekuli mu keya nu hi kekhi za keya miwi hi meshen pi mehai thsü mvu nkeben ghena hi kapvü nten.

⁷Isala hi amankesa kejon mukeya tsü ghena hi ketanla hi meshen pi nkapvü thsüle kesa ghena asajjü wi kinaa keti kesü pi imiwi chicü theng, tsüna satan nyilo ti sa nu hi kekapvü wi hi pashaden.

⁸Hi wi ha khu pi cülo kesa ghena hi kecheng tughu Apvüwa wi kekhie sa.

⁹Isala ma hi wi kiza, “Hi nanketizen tsüna nghena pongkemeni saben, kepaghenanye hi kekhangwa tsüna no nkekhang tsü wi sa pi cencu yaden.” Khrista kekhang na imiwi benle kesa meshenya thsüle kesalina hi nkekhang ghena kapvüden, isathu hi anonkeghe ntsawa.

¹⁰Hi Khrista ghena nkekhang, kekimenni, agüccü ntsa kesa, kemeten-kemesha, nu ketizenkesa hathu ha hi nenden. Kepaghenanye khathansha wi hi nkhangla sa khe ciwi hi züyaden.

¹¹Hi kejüphon kesü ti kuliben, tsüna nthu hi sa pi tsüti sa thsü. Nthu na icüki kemehai pi keccüca-u; kepaghenanye keujüla hi mangla nye lela hi khie wila apostel kemisithu hathu miwi nzzaki.

¹²Hi atsentsa apostel le kesa kekheneng ntsa sa nu nthu jawi azensuthu, amankesathu kejon kuli chidha.

¹³Hi apisa ghena ketan nthu likesaghang nkesa tsü khe kemehu kepathu miwi nthu wi mangwa nthu n-ghangchi sa nu? Hi tsüti nsala kesa ghena hi kesami teshi cülo!

¹⁴Hi ha khili kecheng tughuwa nthu hhainan ghole kiden yadha, nu hi nthu wi mangla khie nben. Hi nthu yamvu keben khe nthu pisa yamvu nben. Kepaghenanye abajjathu na pi atsangathu cü keten khe atsangathu na pi abajjathu cü nten.

¹⁵Hi nthu kiqa cüle kesa ghena hi keben tsüdi nu hi kahang lela khuchi mvuben. Hi nthu tizen ntsa kesa ghena nthu na keu ketan hi tizenten kwe?

¹⁶Hi nthu likesaghang nsale kesa tsü nthu la anle khiya mehai. Isala anyi pahan na hi achopvü ntsa nu milimesa pi nthu mechuyale khiben.

¹⁷Khatinu? Hi nyilothu kesun kechi wi nthu miwi ighena kemehaiwa saya kwe?

¹⁸Hi Tita wi ma walo khi nu kepa wi acünyu kesü pi ma gweghe wa thsü. Tita na nthu miwi ma ghena kemehaiwa saya kwe? Ma ishinyi kemeshen makesü sa nu nkuli kwe?

¹⁹Ikhang na nthu tuwi ikhang ketanla ikhang ghena khibenle kesa nthu na tsüti meshen ben she. Nyele! Ketizen pvüshangthu, ikhang na Khrista wina Anyiza tuwi khiben, nu ikhang kekuli tsüdila nthu kiqa cüle kesa ghena sa.

²⁰Hi messiben, kepaghenanye hi gho nthu na hi nmvu keben ti nkesa muya, nu nthu na hi nthu nmvu keben ti nkesa muya benla nchü. Hi messiben, hi nthu jawi kekitagha, anyon ghokepvü, alebenketsu, apvükemene, kekimenni nu nyu ghükesa, kekapvü nu ajüh nkeyali kesa muyaben.

²¹Hi messiben, hi kheneng nthu wi gho lethu, Anyiza na nthu tuwi na hi satemeni chi, nu kheni kesami sa nu hang nkemetha — nkemehai nu qheza-qhena kahang kesami wi mathu leben khapeghe nkeyathu kejon ghena leben güccü nu qaiben.