Read Northern Rengma Naga 2 KORINTHNYI 13 Bible Online

2 KORINTHNYI 13 - Northern Rengma Naga bible

2 KORINTHNYI 13

¹ Hi ha khili kecheng tughuwa nthu hhainan gho tendha. Ntsawajüh kekhi ti, “Kaghatenjüh tsüdi wila meshu keni nyelela kecheng na chüza nsathu yishü.”

²Hi nthu kheni sami kesathu nu kepathu la tsüdi kiza mvuben; hi keni tughuwa nthu wi kegho tsüwi kekhi ti khili hi nthu jawi nmi lela ha khineng ben, isanu hi kegho wi thola kemetenwa wi tsü bvüya nben.

³Nthu na Khrista na hi wina khi keben chüya mvu keben tsüdi muyaben. Ma nthu ssi nu kekuli wi nkhangla kesawa nyela ma kekhang pi nthu jawi ccücaden.

⁴Ma nkekhang wina ma pi kross miwi jen lela Anyiza kekhang na ma sa pi hang cüa. Ikhang la ma kegweghe wi nkhang; isala ikhang na nthu kegweghe wi ithu gweghe Anyiza kekhang wi ma kahang muyaben.

⁵Nthu na kenondi wi hang benla nye khe nthu ketanla nthu ketsükepha nu nthu ghan-nanlo. Nthu na khang meyala nkesa tsü, Jisu Khrista na nthu wi hangben kesa nthu na chü meya kwe?

⁶Ithu na khang nkeyathu nye kesa nthu na chüyaben kesa hi nondiben.

⁷Nthu na nsazzi thsüle kesalina ikhang na Anyiza wi khieden, ikhang na khang yadhale kesa pi keccücawa nyela nthu ya kemeshonwa saya thsüle kesalina ikhang na khangya nketen ti saden.

⁸Kepaghenanye ikhang na mangla sa pi atsentsawa tsü shunya nben; isala atsentsawa tsü saden.

⁹Ikhang na nkhang lela nthu na khang keben ghena ikhang na anonghe ben. Nu nthu na mehai cencu yalo kesa ghena ikhang na kekhie saben.

¹⁰Hi nthu wi gho lethu, nthu yasa kesawa nyela nthu pieki cülo kesa Apvüwa na kekhang pi hi kecü tsü sen nu nthu tuwi ajüh nkhang thsüle kesalina hi khili nthu jawi nkemi wina ha zhü chiben.

¹¹Icünyuthu, kemehai sa benlo! Mehaicencu yale kesa ghena apiketsü salo; hi kekhi ha kinaya; khokho jühkeyali nu kecca wi hanglo. Anyiza nanketizen nu kecca ya nthu ssiben keyawa salo.

¹²Kemetha kekimangli pi khokho shalom satenlo. Anyiza nyithu tsüdila nthu shalom saben.

¹³Apvüwa Jisu Khrista nanketizen, Anyiza kaghali, nu Kemetha Ghamu wi gweghe kemehai yala nthu tsüdi ssiben keyawa salo.