Read Northern Rengma Naga 2 KORINTHNYI 2 Bible Online

2 KORINTHNYI 2 - Northern Rengma Naga bible

2 KORINTHNYI 2

¹Tsalina hi kheneng nthu wi gho nu nthu sa pi ahathana thsü ntenle meshenyadha.

²Kepaghenanye keujüla hi nthu sa pi ahathana thsü lethu, thowa na hi sa pi anonghe thsüya ben nu? Tsüna hi anyi sa pi ahathana thsü kesathu tsü.

³Tsalina hi lesü tsü zhü pi nthu cü. Hi nthu wi gho nu anyi hi sa pi anonghe thsü ketenthu tsü sa pi ahathana wa thsü nsa mvu, kepaghenanye hi inonghe ben lethu, nthu tsüdila anonghe ben kesa hi chütiben.

⁴Hi nthu sa pi ahathana thsü kesawa nyela hi khatila nthu tsüdi tizenten khe chüya thsüle kesalina hi agüccü ntsa nu leben ketizen sa nu ihacüca nu lesü tsü zhü pi nthu cü.

⁵Keujüla anyi kesü na nyu sa pi ahathana thsü lethu, ma hi nyela alen pahan wi nthu tsüdi sa pi ahathana thsüdha. (Hi ma tuwi khang mtsü nsale kesalina hi ha khiben.)

⁶Nthu kejon anyi hati kesawa meten kecü tsüna mehaidha.

⁷Isala nthu khili ma ahathana ntsa sa nwa thsüle kesalina ma kesami teshi pi cü nu ma kechü-kenonglo.

⁸Tsalina nthu na ntsakhiwa ma tizen benle kesa ma ya chüya thsülo khieben.

⁹Hi nthu ghan-nan nu nthu na ijüh kekhi tsüdila kina benla nye khe chüyale kesalina hi lesü tsü zhü pi nthu cü.

¹⁰Nthu na anyi kesü kesami teshi pi cü lethu, hi la teshi pi ma cüden. Kepaghenanye hi teshi pi cü lethu, alentagha wila nthu ghena Khrista wina teshi pi cüdha,

¹¹tsüna satan yala ithu miwi mehai meya thsüle kesalina; kepaghenanye ithu na ma kemeshen tsü chüben.

¹²Hi Khrista cüki Jühtheü Kemehaiwa pi nyu sansile gho Troa cukeya wi Apvüwa na hi ciwi kuliya kemehai ighena ajenka sha ketheng muya.

¹³ Isala hi ciwi ithu cünyuwa Tita nkemu ghena leben ketizen sa. Tsalina hi anyithu teshi theng Macedonia wi wa.

¹⁴Isala Anyiza sengle! Kepaghenanye Anyiza na keshüthangla Khrista wina ikhang ssi wa khangkeya wi chi cüden. Anyiza na ikhang sen nu Khrista cüki palakechüwa tsü pi hankedemvu ti kahe wi lela thonghe thsüden.

¹⁵Kepaghenanye Khrista na ikhang pila hankedemvu ti sala Anyiza cüden, tsüna hangshaya kebenthu nu dedi kebenthu jawi lela thonghe ben.

¹⁶Kepaghenanye dedi kebenthu ghena hawa ha kahan pvünu shü ketenwa tsü, isala hangshaya kebenthu ghena tsü hawa ha kahang sengho ketenwa hankedemvu tsü. Thowa na kekuli hati kesa ha saya mehai nu?

¹⁷Ikhang na anyi kejon Anyiza ketsijüh tsü pi lekete asenkesa ji ti sa ketenthu tsüti nye; isala Anyiza na ikhang kesunchi kesa ghena lebenchi ntsa nu Anyiza tuwi na Khrista magha sala tsü khiden.