Read Northern Rengma Naga 2 KORINTHNYI 3 Bible Online

2 KORINTHNYI 3 - Northern Rengma Naga bible

2 KORINTHNYI 3

¹Ha ikhang ketanla ikhang khi pi kapvü keben ti saben kwe? Nyu kepathu na sa keten ti ikhang na asheikepi lesü zhü pi nthu cü nyelela nthu wi tsü khu meyathu yishü ben kwe?

²Nthu na ikhang sheikepi lesükezhü, ithu leben wi zhü ketheng anyi tsüdila si nu chüya ketenwa tsü.

³ Khrista na ma ketanla tsü zhü pi ikhang wina kesunchi. Tsüna kezhütssü nyela hang kebenwa Anyiza Ghamu pi zhüki theng, nu alonpha miwi nyela anyi leben wi zhüki theng.

⁴Ikhang na Khrista ghena Anyiza wi kempvüza keben ghena ha khiben.

⁵Kekuli ha ikhang kekhang wina sayale kesa khiya kemehai mangla nmi. Ikhang na saya kemehai kekhang kebenwa tsüna Anyiza wina kegho,

⁶ ma ikhang sa pi cenkethenjüh ketheüwa tsü kekuli kesa qothu saya thsü, tsüna zhüketheng ayenwa tsü nyela Aghamu. Zhüketheng ayenwa tsüna keshü sengho den, isala Aghamu na kahang khuchiden.

⁷ Ayenwa tsü pi kezhüyen wina alonpha miwi zhüki theng, nu tsü khukechi wi Anyiza nyankethang na gho. Mosa mmi kekiza nmila kesawa tsü lela Israel nyithu ghena khang ntsa sa kesalina mathu na ma ghangti meyala. Keujüla keshü sen keghowa Ayenwa tsüna kegho wi anyankethang hati sa lethu,

⁸Aghamu kekuli ghena anyankethang tsüna ha miwi khatila diki ben nu!

⁹Kemeshensa sengho kesawa ghena anyankethang sa lethu, hangshakeya sengho kesawa ghena tsü anyankethang khacu khatila diki ben nu!

¹⁰Khili nyankethang hana kizaki kesalina kheni nyankethang kekizawa tsüna nmiladhale kesa ithu na khiya mehai.

¹¹Kepaghenanye matsü keu ketan ben kesawa wi lela anyanthang gho lethu, anuphan ben kesawa wi tsü anyankethang khacu khatila saben nu!

¹²Ikhang kaghang ha keben ghena ikhang kempvüza ntsa saben.

¹³ Ikhang na Israel nyithu yala kekiza nmila ketenwa tsü nmu thsüle kesalina Mosa na athsü pi ma mmi shanya kesawa tsüti nye.

¹⁴Ntsakhiwa mathu leben na dhua; nu nansü lela mathu na cenkethenjüh kaghawenwa tsü kesi wi ammi keshanthsü tsü makesü na gho mathu leben shan bhonyaden.

¹⁵Anyi Khrista wi benya kesa ketan na ammi keshanthsü tsü khupiya mehai.

¹⁶ Isala tsü khupiya mehai, Ntsawajüh na Mosa cüki kekhi ti: “Ma khathansha wi Apvüwa wi khapeghe wa khe ma mmi keshanthsü tsü khupia.”

¹⁷Khili ha wi “Apvüwa” hana Aghamu; nu khie wi Apvüwa Ghamu ben khe ciwi mangla kekhenkeghe nmi.

¹⁸Ithu tsüdila ammi keshan npvüla Apvüwa nyankethang tsü muyaben; nu anyankethang Apvüwa wi keghowa tsüna Aghamu, ithu sa pi ma tsi ti nu anuphan nyanthang kayi cüden.