Read Northern Rengma Naga 2 KORINTHNYI 4 Bible Online

2 KORINTHNYI 4 - Northern Rengma Naga bible

2 KORINTHNYI 4

¹Anyiza na nanketizen wina kekuli ha salo pi ikhang kecü ghena ikhang accükwenshü nten.

²Ikhang na kekuthi nu nkemejüghe kekulithu tsüdi teshidha; ikhang na nyu kemechu nyelela Anyiza jüh tsü pi milikemesa sa nten. Atsentsawa kewegü wina ikhang Anyiza tuwi hang nu ikhang ketanla ikhang pi anyi tsüdi tuwi kemeshen kemehaiwa tsü saden.

³Kepaghenanye keujüla ikhang ajühkemehaiwa pi kekhi ha kuthiben lethu, tsüna dedi kebenthu tuwi ketan kuthiben.

⁴Mathu na n-nondi, kepaghenanye ayyi ha wi nkemehai cenpvü na mathu leben pi kejang wi chidha. Ma mathu sa pi Jühtheü Kemehaiwa wina kegho wegü kebenwa Khrista nyankethang cüki Anyiza tsi ti kesawa tsü nmu thsüladen.

⁵Kepaghenanye ikhang na Jisu ghena nthu maghathu ti sa nu ikhang jüh nyela Jisu Khrista tsüna Apvüwa le kesa pi nyu sansiden.

⁶Anyiza na “Kewegüwa na kejang wina wegü shhugho ben!” kekhiwa tsü makesü Nyiza na ma kewegü pi ithu leben wi wegü cü, ithu ssigho Anyiza nyankethang Khrista miwi wegü keben palakechü wi tsü chi cüben.

⁷Isala kekhang ntsawa tsüna Anyiza wina khe ikhang wina nyele kesa pi ccücale kesalina ikhang na aghamulen wi keben na ayyipfü wi keben tsüti kesa.

⁸Ikhang na kejon tughula agüccü, isala pacha nsa; kuti wi chükivvü, isala khiela accükwenshü nsa;

⁹ciwi aghinyithu kejon na ben, isala ikhang khiela apvüshang kesüla nmila nsa; nu kejon tughula patena ntsa sa, isala ikhang meyasa.

¹⁰Ikhang gwo wi Jisu kahangwa tsü muya thsüle kesalina matsü tsüdi wila ikhang keshü gwo wi Jisu keshü tsü pvüden.

¹¹Ikhang keshü gwo wi ha Jisu kahang tsü muya thsüle kesalina ikhang na Jisu ghena ikhang kahang chu wi keshü kemessi na ben.

¹²Ha ma jjügi keshü na ikhang wi kuliben, isala kahang na nthu wi kuliben.

¹³ Ntsawajüh na khiben, “Hi nondi keben ghena khi.” Tsü makesü ikhang la kenondi ghena khiben.

¹⁴Anyiza, Apvüwa Jisu sa pi hang kecüwa na ikhang la sa pi Jisu gweghe hangya thsü nu ikhang pi nthu gweghe ssi nu ma tuwi waben kesa ikhang na chüben.

¹⁵Ha tsüdila nthu ghena; nu Anyiza nanketizen na wa anyi ji pfüpfü cuyathu, mathu na keseng kekhie ji pfüpfü sa pi Anyiza nyankethang saben.

¹⁶Ha ghena ikhang na khiela accükwenshü nten. Ikhang gwo sajjü wi nkhang pfüpfü sa wa lela aghamulen wi tsü atsathangla khang pfüpfü saden.

¹⁷Kepaghenanye matsü keu ketan wi ketizen kesa keu hana ikhang ghena anuphan nyankethang mangla pi ghape nkeyawa tsü ghena kiden ben.

¹⁸Kepaghenanye ikhang na pala mu nkebenthu tsü khe mu kebenthu tsü ghang nten. Khili mu kebenthu tsüna matsü keu ketan, isala mu nkebenthu tsüna anuphan ji.