Read Northern Rengma Naga 2 KORINTHNYI 5 Bible Online

2 KORINTHNYI 5 - Northern Rengma Naga bible

2 KORINTHNYI 5

¹Kepaghenanye ikhang na ayyi wi hang keben anithsüjjen ikhang gwo ha yasa lethu, Anyiza wi ikhang ghena ajjen kesü akwen pi nkesa anuphan ben keten tang wi benle kesa ikhang na chüben.

²He wi ikhang na khili ahathana ben, isala tang wi jjen tsü ya ikhang miwi dugholo kesa nmvu ntsaben;

³ikhang na tsü mphi keya wi kemessü sa nbendha.

⁴Ikhang na anithsüjjen ha wi hang keben jüwi agüccü nu ghadhiben; ikhang na ayyi gwowa ha teshi mvu nben, isala tang jjen tsü mphiya nu kahang yala keshü gwo ha sa pi kemili thsü mvuben.

⁵Anyiza na ikhang kemili kten ha ghena kiden theng, nu ma pala tsüdila pi ikhang ghena tsanqai theng kesa ma Ghamu pi ikhang nkhenshadha.

⁶Tsalina ikhang na keshüthangla kempvüza sa benden. Ikhang na agwo sajjü ha wi keben chu Apvüwa ssinu temeja wi ben kesa ikhang na chüben.

⁷Kepaghenanye ikhang kahang hana kenondi khe mu kebenwa tsü nye.

⁸Ikhang na kempvüza sala agwo sajjü jjenwa ha teshi nu wala Apvüwa gweghe ajjen wi ben wa mvuben.

⁹Isala ikhang na pala tsüdi miwi la ajjen he wi benle ciwi wa lela ma kenenwa tsü sa mvuben.

¹⁰ Kepaghenanye ithu tsüdila Khrista na ajühkaghaten keten tuwi tsü whaden. Isanu meshu kesüsü ma gwo sajjü wi kekuli kenie wina ma kutimen kemehai-keteshi tsü muyaden.

¹¹Ikhang na Apvüwa kemessi jjügi tsü chüben, tsalina ikhang nyu kepa wila kizaden. Anyiza na ikhang cüki chütha ben, nu hi kemeshen tsü nthu la nthu leben wi hi chübenshe saben.

¹²Ikhang na ikhang cüki kemehai pi nthu kizale sa nben; isani ikhang ghena kapvüya kemehai jjügi pi nthu cüle sa, isanu nthu yala anyi ma yencüki nyela ma tsi ghena kapvü ketenthu lunengya thsüle kesalina.

¹³Keujüla ikhang na deja ben lethu, tsüna Anyiza ghena; nu keujüla ikhang na metsa ben lethu, tsüna nthu ghena.

¹⁴Khrista nanketizen na ikhang ghanten senben, ikhang na khili anyi kesü na anyi tsüdi ghena shü le kesa chüyadha, tsü jjügi anyi tsüdila ma keshü wi tsü saghudha.

¹⁵Ma anyi tsüdi ghena shü, isanu hang kebenthu na mathu ketanla mathu ghena nhang thsüla, isala mathu ghena shü nu sa pi hang shagha thsü kesawa ghena hang thsüle kesalina.

¹⁶Ikhang na khili nten ayyi yen kenie wina thola ghan-nan ntendha. Ikhang na kuti tsüwi ayyi yen kenie wina Khrista ghan-nan lela ikhang na tsüti nsadha.

¹⁷Tsalina keujüla anyi kesü le kesü lela Khrista wi benya lethu, ma anyi ketheü sadha; kaghawenwa na bvüdha, nu ketheüwa na ghodha.

¹⁸Ha tsüdila Anyiza na Khrista wina sachi, ikhang ma ghinyithu ha kemili pi ma pvüshangthu sa thsüa, nu anyi kepathu la pi ma pvüshangthu saya thsülo kesa kekuli pi ikhang then chidha.

¹⁹Ikhang ketsijüh na Anyiza na Khrista wina anyi tsüdila pi ma pvüshangthu sayaden. Anyiza na mathu kesami cüki tsü pi theng nten, nu ma khati nu mathu pi ma pvüshangthu sayaten khe pi kizalo kesa ketsijüh pi ikhang cüdha.

²⁰Ikhang na Khrista mithonthu, kepaghenanye Anyiza na ikhang wina khiben; ikhang na Khrista mithon wina nthu wi khiben, Anyiza yala nthu ma ghinyithu kemili pi ma pvüshangthu saya thsülo.

²¹Ithu ya ma gweghe nu Anyiza ketsatan tsü yaya thsüle kesalina Khrista na kesami nmi lela Anyiza na ma sa pi ithu kesami pvüya thsüa.