Read Northern Rengma Naga 2 KORINTHNYI 6 Bible Online

2 KORINTHNYI 6 - Northern Rengma Naga bible

2 KORINTHNYI 6

¹Ikhang Anyiza gweghe kekuli kesa wina nthu wi khieben, nthu Anyiza nanketizen mu keyawa tsü yala meyasa thsü lalo.

² Anyiza khi keben ha kinayalo, “Matsü kemehai kegho wi hi nthu jüh kina chicü; nu hangshakeya tsathang kegho wi hi nthu hangsha cü.” Ghangchilo! Khili ha matsü kemehai ntsawa, nu nansü ha hangshakeya tsathang le!

³Ikhang na thola ikhang kekuli wi kesazzi nmu thsü mvu, tsalina ikhang tho len la khen nten.

⁴Tsüti kesawa nye, ikhang na alentagha kekuli wi ikhang na Anyiza maghathu le kesa pi ccücale kesalina agükeccü, ketizenkesa, nu ahathakina tsüdi wila kethankehi ntsa nu kekheneng benden.

⁵ Nyu na ikhang kiccü, atssüzü sa, nu kimenni; ikhang na njenla khhwen nu kuli ntsa sa.

⁶Ikhang kemetha, palakechü, kethankehi, nu keccaketssü wina ikhang na Anyiza maghathu le kesa pi ccüca chidha— Kemetha Ghamu, ikhang ketizen atsentsa wina,

⁷ikhang atsentsa ketsijüh wina, nu Anyiza kekhang wina. Ikhang na ketsatanwa tsü pi aghighe saya nu nyu ssikaghashen nu ikhang khweya kemehai na ben.

⁸Ikhang nyuwakü nu nkhichinyuwa; ikhang kimenni nu seng. Ikhang pi milikemesathu ti sa, isala ikhang na atsentsa khi;

⁹nyu nkechüthu sa thsüa, isala tsüdila ikhang chü; ikhang pi keshü ti sa thsüa, isala nthu na mu keben ti ikhang na hangben. Meten-mesha lela ikhang npathi;

¹⁰sa pi ahathana thsüa, isala ikhang na keshüthangla anongheden; ikhang na ketha-u ti, isala ikhang na anyi kejon sa pi keban sa thsüa; ikhang na mangla nkemi ti, isala ikhang na ntsakhiwa pala tsüdila ben.

¹¹Korinth wi icünyuthu! Ikhang na aleben shatha sa nu nkuthila khi pi nthu kizadha.

¹²Ikhang na aleben shapi nthu ncü nsa, isala nthu na aleben shapi ikhang ncü.

¹³Hi khili nthu pi itsangathu ti sa nu khiben: ikhang na nthu cüki kemeshen ti pi ikhang ccücalo. Nthu leben sha pi ikhang cülo.

¹⁴Nkenondithu tsü gweghe kulile nsa lalo, kepaghenanye tsüti mangla saya nben. Khati nu ketsatan nu nketsatan gweghe ya mehai nu? Khati nu kewegü nu kejang gweghe hangya mehai nu?

¹⁵Khati nu Khrista nu atsaghang manyi jühkeyaliya mehai nu? Kenondi nyi kesü na nkenondi nyi ssinu mangwa wi saghuben nu?

¹⁶ Khati nu Anyiza kekinyijjen na Anyiza nkechü tsikezhüthu makesü saya mehai nu? Kepaghenanye ithu na Anyiza hangkebenwa kekinyijjen! Anyiza na ma ketanla hati khiben, “Hi inyithu pi ijjen sa nu mathu jawi hangden; hi mathu Nyiza saden, nu mathu na inyithu saben.”

¹⁷ Tsalina Apvüwa na khiben, “Nthu na mathu teshi nu shhugho lo nu mathu wina nthu kepa sayalo. Nkemetha tsü ssinu mangla nsala, isathu hi nthu ssiyaben.

¹⁸ Hi nthu Ba saden, nu nthu na itsangathu saben, Apvüwa kekhang ntsawa na khiben.”