Read Northern Rengma Naga 2 KORINTHNYI 7 Bible Online

2 KORINTHNYI 7 - Northern Rengma Naga bible

2 KORINTHNYI 7

¹Hi ketizen icünyuthu, khishikechi hathu ha tsüdila ithu ghena sa. Tsalina ithu gwo nu ithu kahang sa pi nmetha thsüla ketenthu tsüdi wi ithu ketanla ithu samethaya, nu Anyiza kemessikü wi metha cencu nu hang nalo.

²Nthu leben sha pi ikhang cülo. Ikhang na anyi kesü tuwi la nsazzi; thola meyasa, nu anyi kesü miwi la ikhang ghena kemehaiwa sale nsa.

³Hi ha khi pi nthu meshensa le kesa ghena nye, kepaghenanye hi hatu wi nthu kekiza ti nthu na ikhang kaghali ntsawa ghena shü le hang lela keshüthangla ithu gweghe den.

⁴Hi nthu miwi kenondi ben ntsa saben; nu nthu miwi hi kekapvü la ben le! Ikhang na agükeccü tsüdi wi hi kempvüza ben; nu inonghe ntsa saben.

⁵ Ikhang na wala Macedonia cukeya wi lela mnan meya. Apen tsüdi wi agükeccü, nyu ssinu kekitagha, nu aleben wi kemessi na ben.

⁶Isala leben ketizen kesathu kechü-kenong cü ketenwa Anyiza na Tita ssigho ikhang kechü-kenong cü.

⁷Ma ikhang wi kegho ketan nyela nthu na khati ma kechü-kenong cü khe tsü khi pi ikhang nongheya thsü. Ma nthu na hi metuya mvu keben, nthu hathakina, nu nthu na ighena khie mvu keben cüki khi pi ikhang kiza kesalina hi khili inonghe ntsayadha.

⁸Hi lesü zhü pi nthu leben patena lela hi tsü ghena ileben güccü nben. Matsü keujü ketan lela lesü tsüna nthu leben patena kesalina hi ihathakina-u.

⁹Isala hi khili inonghe ben, kepaghenanye tsüna hi nthu leben patena kesawa tsü nye, isala nthu hathakina tsüna nthu sa pi kemili cüdha. Anyiza na ahathakina tsü senya kesalina ikhang na nthu patena nsa.

¹⁰Kepaghenanye Anyiza ahathakina senya kesawa tsüna leben khapeghe kecü sengho nu ssi wa hangshakeya wi chi cüden, nu ciwi asenkemeshen nmi. Isala ayyi nyi hathakina tsüna keshü sengho cüden.

¹¹Ghangchilo, Anyiza na nthu hathakina tsü pi khati sa cü khe: tsüna khatila nthu pi atsentsa sa cü, nu khatila nthu nkechü tsü pi chü thsüdha nu! Tsüna leben ketsu, kemessi, kenmvu, leben kechi, kesazzi ghena kemeten pi cüle kekiden! Hathu ha tsüdi wi nthu ketanla nthu na nsazzi le sa keten.

¹²Tsalina hi lesü tsü zhü pi nthu cü lela tsüna meshu kesü kesazziwa tsü ghena nye nyelela nyu ma miwi sazzi kesawa tsü ghena la nye. Isala tsüna nthu na ikhang ghena leben kechi tsü Anyiza tuwi na pi nthu ccüca le kesalina.

¹³Tsü ghena ikhang kechü-kenong ntsa chile! Ikhang kechü-kenong kechi ketan nye; nthu tsüdila Tita leben satecca kecü ghena ma nonkeghe tsüna ikhang sa pi anonghe ntsa sa cüle!

¹⁴Hi nthu ghena kapvü pi ma wi kiza, nu nthu na hi pi kejügheya thsü nsa. Ikhang na keshüthangla atsentsa pi nthu kiza, nu tsü makesü ikhang na Tita tuwi kekapvü tsüna atsentsa chüyadha.

¹⁵Tsalina ma nthu tsüdila khatila ma jüh kina nu messi pi kedheggüla ma ssiya khe tsü meshen keya wi ma leben tsüdi pi nthu tizen kayi yaden.

¹⁶Hi nthu nondi cencuya kemehai ben kesa ghena hi inonghe ntsayadha le!