Read Northern Rengma Naga 2 KORINTHNYI 8 Bible Online

2 KORINTHNYI 8 - Northern Rengma Naga bible

2 KORINTHNYI 8

¹ Ithu cünyuthu, ikhang na nthu yala Anyiza nanketizen na Macedonia wi kemehuthu wi khati sacen cü khe chüya thsü mvu ben.

²Mathu na ghankenan kedhu wi ketizen sa lela mathu nonkeghe na di ntsa sa nu mathu na keben nmitha lela anon-nkhula khuchi.

³Hi nthu kizaya mehai, mathu na khuchiya kemehai chu khuchi nu tsü miwi la khuchi. Mathu kenen kemeshen wina

⁴mathu la keben pi Judea wi Anyiza nyithu kiqale kesalina ikhang wi khie ntsa sa.

⁵Tsüna ikhang na ghang keben miwi le! Atuwa sa mathu ketanla mathu pi Apvüwa cüa; tsaseng wi Anyiza kemeshen wina mathu pi ikhang la cü.

⁶Tsalina ikhang na kekuli ha sa shhu kesawa Tita na tsü sa walo nu nthu kiqa pi nanketizen kekuli ha sa cen chilo kiza.

⁷Nthu na pala tsüdi wi ben pi mehai ben: tsüna kenondi, ajühkekhi, nu palakechü, nthu na nyu kiqa mvu kesa nu nthu na ikhang ketizen wi. Tsalina ikhang na nthu yala nanketizen kekuli ha wi la mohho ntsa sa thsü mvuben.

⁸Hi ayenwa ti sa nu ha khi nben, isala nyu kepathu na khatila nyu kiqa mvu ten khe pi ccüca nu hi nthu na nyu nanketizen tsü atsentsa le kesa muyale kesalina.

⁹Nthu na ithu Pvüwa Jisu Khrista nanketizen tsü chüben; ma keban ntsawa lela nthu ghena ketha-u sa, tsüna ma nkemi wina nthu sa pi benya thsüle kesalina.

¹⁰Hi kemeshen tsü nthu na khalawa kuli keshhuwa tsü khili kuli cenla mehaidha. Nthu na kekuli wi ketan nyela kuli mvu kesa wila atuwa saden.

¹¹Tsalina kekuli tsü sacen yilo! Nthu na tsü sa mvu kesa tsüti khili kekuli tsü sacen yalo.

¹²Keujüla nthu na khuchi mvu ben lethu, Anyiza na nthu mangwa khukechi-u ben khe tsü yaden, isala nthu na nkemiwa tsü nye.

¹³Hi nyu kepa yala ccaya thsüle kesalina akhhi pi nthu miwi chi nben; isala nthu na hajü kejon keben ghena pi nkemithu kiqachi cüthu mehai ben, isathu nthu na nkemi wi mathu na kejon ben lethu, pi nthu kiqa cüben. Hati nu khokho tuwi makesü saben.

¹⁵ Ntsawajüh na kekhi ti, “Pala kejon saghu kethengwa na ben ntsa nsa, nu keu ketan saghu kethengwa la zeng ntsa nsa.”

¹⁶Anyiza sengle, ma Tita pi ikhang na nthu kiqa mvu keben tsüti saya thsüdha!

¹⁷Ma ikhang kekhie ya kecü ketan nyela ma nyu kiqa mvu kesalina ma ketanla ma kenen kemeshen wina nthu wi wale südhe yadha.

¹⁸Ikhang na acünyu Ajühkemehaiwa pi nyu kesansi kekuli ghena kemehu tsüdi wila ma kinyikü ntsa ketenwa pi ma gweghe nthu wi kesun chiben.

¹⁹Tsü ketan nye, kemehuthu na ma kessi pi ikhang gweghe wa nanketizen kekuli Apvüwa nyankethang sa, nu ikhang nyu kiqa mvu keten pi ccücalo kesalina.

²⁰Anyi thola ikhang na mohhola khukechi cüki ha nthen thsüle kesalina ikhang na kiden-kesha ntsa saden.

²¹ Ikhang kaghangwa na Apvüwa tuwi ketan nyela anyithu tuwi lela kemeshonwa tsü sale kesalina.

²²Tsalina ikhang na ikhang cünyuwa pi ma gweghe kesunchi ben; ikhang na kejon tughula ma ghankenan wi ma nyu kiqa mvu keben tsü muya. Ma khili tsü kheni miwi nyu kiqa mvu kesa na ben, nu ma nthu miwi kenondi ben ntsa saben.

²³Tita na hi kegweghewa nu nthu kekuli kesa wi ma hi kiqaden; nu kepa wi ma gweghe wa keten acünyuthu tsüna Khrista nyankethang sen kegho kemehu nyilothu.

²⁴Kemehuthu tsüdila nthu nanketizen tsü chütiya nu ikhang na nthu ghena kapvü keten tsü chüya thsüle kesalina anyi hathu ha tizenchi cülo.