Read Northern Rengma Naga 2 KORINTHNYI 9 Bible Online

2 KORINTHNYI 9 - Northern Rengma Naga bible

2 KORINTHNYI 9

¹Ntsakhiwa hi nthu na keben khuchi pi Judea wi Anyiza nyithu kekiqa cüki ha zhü pi nthu ncüla mehai.

²Nthu na nyu kiqa mvu keben tsü hi chüben; nu hi Macedonia wi anyithu tuwi nthu ghena kapvüdha. Hi khi, “Akhaya wi acünyuthu na khalawa na nyu kiqale kesa kidenyadha.” Nthu kesa mvuwa tsüna mathu kejonla kechü-kenong chidha.

³Ha jjügi wi ikhang na nthu ghena kapvü kesa tsü ma men nkemi nsa thsüle kesalina ikhang na khili acünyuthu kesun chiben. Isanu nthu yala hi kekhi tsüti kiden sen benla thsüle kesalina.

⁴Keujüla Macedonia nyi pahan na hi gweghe ghala nthu na kiden nkethengla muya lethu, khatila kejügheya ben nu— nthu nondi ntsa sa keben ghena mang lela nkhila ben le!

⁵Tsalina hi acünyuthu ha ituwi na kesun pi nthu wi chi nu nthu ha ghena khuchile khishi ketheng tsüti kidenya thsüle kesa meshenya. Isanu hi kegho wi nthu tsü keten thengla, nu tsüna nthu kekhuchi mvu wina khuchi khe kekhuchi-u wina khuchi le nsa thsüle kesalina.

⁶Ha meshenyalo, anyi thowa na amacü keu ketan pi vvüchi khe ma asu keu ketan wwiyaben; nu thowa na amacü kejon pi vvüchi khe kejon wwiyaben.

⁷Anyi kesüsü ma kemeshen wina khaju nkhuchithu yishü khe anon-nkhula nyelela kesa-u ketan ghena nsala; kepaghenanye Anyiza na anonghethi nu kekhuchithu tsü tizenden.

⁸Anyiza na nthu nsenthu keyishü kesawegü ji ntsa pi nthu cüya mehai; isanu nthu na keshüthangla nthu nsenthu keyishü tsü muya, nu kekuli kemehai kesa ghena nkesenkhi muyaben.

⁹ Ntsawajüh na kekhi ti, “Ma mohho ntsa pi ketha-u cüden; nu ma keccaketssü na anuphanla benden.”

¹⁰ Anyiza, palacü pi yang ketenthu cü, nu atsse pi dsa ketenthu cü ketenwa na nthu nsenthu keyishü palacü tsüdi pi nthu cü nu tsü sa pi shigü shagha thsü nu nthu yala ketsatan kekuliwa tsü kejon wwiya thsüben.

¹¹Ma keshüthangla nthu sa pi benya thsü nu nthu ya mohho ntsa sa thsüben; isanu ikhang wina nthu na khukechi tsü mu keyathu kejon na Anyiza sengben.

¹²Nthu na kekuli ha sa pi Anyiza nyithu na nsenthu keyishü sa kecü ketan sa nben; isala pongkemeni sala keseng pi Anyiza kecü la sa chiben.

¹³Nthu kekuli ha wi sen kegho chüti keya ghena, anyi kejon na nthu Khrista jühkemehaiwa jühkeya wina khishü keten ghena, nu nthu na mohho ntsa pi mathu nu anyi tsüdila cü keten ghena anyi kejonla Anyiza nyankethang saben.

¹⁴Isathu mathu na Anyiza nanketizen pongkemeni pi nthu cü kesalina nthu nen nu nthu ghena kekhie saben.

¹⁵Ma ju khukechi khi meyakhi kesa ghena ithu Anyiza seng nalo!