Read Northern Rengma Naga EFESANYI 3 Bible Online

EFESANYI 3 - Northern Rengma Naga bible

EFESANYI 3

¹Ha jjügi ghena hi Paul, no Judah nyi nkenyethu ghena atssüzü saben, Anyiza wi khie den.

²Anyiza na ma nanketizen wina nthu ghena kemehaiwa salo kesa kekuli ha pi hi dhen chidha kesa nthu na zaya benla metsi.

³Anyiza na ma kemeshen kekuthi tsü pi hi ccüca chidha. (Hi tsü cüki melute zhüchi,

⁴ nu keujüla nthu na hi zhükechi tsü siya lethu, nthu na hi Khrista cüki kekuthi chüshi keya tsü chüyaben.)

⁵Kheni tsüwi kekuthi hawa ha pi anyithu nchü thsü, isala Anyiza na khili tsü Aghamu wina pi ma apostel kemethathu nu atusenjüh-kechüthu ccüca chidha.

⁶Kekuthi hana Judah nyi nkenyethu na ajühkemehaiwa ghena Anyiza kesawegü wi Judah nyithu gwegheya kesawa tsü; mathu gweghe agwo kesütan nu Jisu Khrista wina Anyiza jüh khishikechi tsü muya ben.

⁷Anyiza nanketizen ju kemehai khukechi wina hi pi ajühkemehaiwa magha kesü saya thsü, tsüna ma kekhang kuli keben wina pi hi kecü.

⁸Hi Anyiza nyithu kizza jawi kizza ntsawa; isala Khrista wi keben khi mekeya khi cüki Jühtheü Kemehaiwa ha pi Judah nyi nkenyethu sansilo kesa Anyiza na pi hi cü,

⁹nu anyi tsüdila ya Anyiza kemeshen kekuthiwa tsüna khati kuli ben khe muya thsüle kesa ghena. Anyiza, pala tsüdila sahangkechiwa na ma kemeshen tsü pi kheni abvüye tsüdi tu wi kuthi gho,

¹⁰isanu khili tsüwi kemehu wina tangnyilo kekhang kesenthu nu tang wi kekhangthu ya ma kemetsa kepapa kesa tsüdila chüya thsüle kesalina.

¹¹Anyiza na anuphan ma kemeshen tsü kenie wina ha sachi, tsüna ma ithu Pvüwa Jisu Khrista wina sayadha.

¹²Ithu na Khrista wi nu ithu ma kenondi wina ithu kempvüza sala Anyiza tu wi waya mehaidha.

¹³Tsalina hi nthu wi khieben, hi nthu ghena kemehaiwa ghena ketizen sa benna accükwen nshü lalo.

¹⁴Hi ha jjügi ghena Abawa tu wi akhhutsüden.

¹⁵Ma wina tang wi nu ayyi wi lela atheghi tsüdila anyan tsentsawa tsü muyaden.

¹⁶Hi Anyiza nyankethang keben ntsawa na ma Ghamu kekhang pi nthu cü nu nthu kahang wi zübenya thsülo khieden,

¹⁷nu kenondi ghena Khrista ya nthu leben wi benya thsüle hi kekhie saden. Nthu yala nanketizen wi nthu aghazan cha nu agi kedegü ya,

¹⁸isanu nthu ya Anyiza nyithu tsüdi gweghe nu Khrista nanketizen tsü khatila miza nu sie, misi nu dhu khe chüshiya thsüle kesalina hi kekhie saden.

¹⁹Nthu ma nanketizen tsü chü keyawa salo— Khiela tsü maben chüya nben lela, isanu Anyiza yencükiwa tsü pi nthu pong pvüyalo.

²⁰Ma ithu miwi kuli kebenwa kekhang wina ithu kekhie nu kemeshen miwi ji kayi ntsa kuli cüya mehai;

²¹matsü tsüdi wila kemehu wi nu Khrista wina anuphan nu anuphanla Anyiza nyanthang keyawa salo. Amen.