Read Northern Rengma Naga EFESANYI 5 Bible Online

EFESANYI 5 - Northern Rengma Naga bible

EFESANYI 5

¹Nthu na Anyiza tsangathu sa kesalina nthu la ma ti sa meyathu yishü.

² Khrista na ithu tizen nu ithu ghena ma kahangli khuchi pi hankedemvu nu ahhansha sala Anyiza kenen sa kesa tsüti nthu kahang na nanketizen wi nbenthu yishü.

³Nthu na Anyiza tsangathu sa kesalina nthu jawi qheza-qhena wi nkemetha, hang nkemetha, nu apvükemene cükithu la kekhi-u nye.

⁴Nyelela nthu na nkemejüghe, kejüphon, nkemetha jüh nkhila. Tsüti kesawa nye, nthu na keseng pi Anyiza cülo.

⁵Nthu na ha chütiben, qheza-qhena wi nkemetha, hang nkemetha, apvükemene (kepaghenanye apvükemene tsüna atsikezhü kekinyi) kesathu ha kesüla Khrista nu Anyiza Kadiyyiwa tsü ghong meyacha.

⁶Anyi thola kejüphon jüh sen nu nthu nmechu thsüla; hathu ha ghena Anyiza leben kekha na ma jüh nkekinathu miwi ghoden.

⁷Tsalina anyi hati kesathu gweghe mangla nsa lalo.

⁸Nthu na kejang wi hang keten, isala nthu na Apvüwa nyithu saya kesalina kewegü wi bendha. Tsalina nthu anyi kewegü wi kebenthu ti nhangthu yishü,

⁹kepaghenanye kewegüwa tsüna tsüdi wila keben kemehaiwa, ketsatanwa, nu atsentsawa tsü sengho cüden.

¹⁰Apvüwa kenenwa tsü sa chüyalo.

¹¹Anyithu na sa keten kejang kekuli pala ma men nkemithu tsü gweghe mangla nsala, isala tsüthu tsü pi nyu chüya thsülo.

¹²(Ntsakhiwa mathu na kekuthi wi kuli keten cüki tsü kekhi la khi jüghe.)

¹³Pala tsüdi pi kewegü wi shhugho thsü lethu, mathu yenwa tsü mehaitsü pi ccüca chiaben;

¹⁴kepaghenanye kewegü tsüna pala tsüdi pi methasi ccüca chiaben. Tsalina hati khiben, “O jen kebenwa shagha yilo, nu keshü wina shaghalo; Khrista na nthu wegü cüben.”

¹⁵Tsalina nthu khati hang ten khe kiden-kesha yalo. Anyi kejüphon ti nyela kemetsa nyi ti sa nu hanglo.

¹⁶ Atsathang hathu hana nmehai, tsalina nthu matsü kemehai keben tsüdila sen kemehai sayalo.

¹⁷Tsalina kejüphon sa nbenla, isala Apvüwa na nthu ya sa thsü mvu kebenwa tsü chüyalo.

¹⁸Nthu yasa keten kisengtssü tsü jjü pi adina nbenla, isala Aghamu pi nthu pong pvü benyalo.

¹⁹ Kesü kesü wi keseng khwi, kemetha khwi, nu aghamulen khwi sa tenlo; nthu leben wi akhwijüh kemehai sala keseng khwi sa pi Apvüwa wi chilo.

²⁰Ithu Pvüwa Jisu Khrista nyan wina pala tsüdi ghena keshüthangla keseng pi Abawa Anyiza cü tenlo.

²¹Khrista kekinyikü wina nthu khokho kekhu wi hanglo.

²² Awubvüthu, nthu na Apvüwa wi sa keben ti nthu wubathu kekhu wi hanglo.

²³Kepaghenanye Khrista na kemehu miwi kekhang keben tsüti awuba kesü na ma wubvü miwi kekhang ben; nu Khrista na ma ketanla ma gwo kemehuwa tsü Hangshawa.

²⁴Tsalina kemehu na Khrista kekhu wi keben tsüti awubvüthu na mathu wubathu kekhu wi bentha nsathu yishü.

²⁵ Awubathu, Khrista na kemehuwa tizen nu tsü ghena ma kahang khuchi kesa tsüti nthu wubvüthu tizenyalo.

²⁶Ma ajüh nu atssü wina kemehu tsü satemetha pi Anyiza cüle ha sachi,

²⁷isanu kemehu tsüna metha nu nkemehai nmi, shenqhe-shenghe nyelela kinaqhe nyelela akhhikhu nkemece nmila atsikemehai tsüdi pi ma wi chiyale kesalina.

²⁸Awubathu na mathu gwo tizen keten tsüti mathu wubvüthu ketizen-u. Anyi kesü ma wubvü tizen ketenwa ma ketanla ma tizenden.

²⁹(Anyi thola ma ketanla ma gwo nanmeghü nten, isala Khrista na kemehu wi sa keten tsüti ma tsü ghanja nu noncca benden;

³⁰kepaghenanye ithu na ma gwo wi alen kesüsü saben.)

³¹ Ntsawajüh na khiben, “Ha jjügi ghena npvüza kesü na ma ba ma jja teshi nu wala ma wubvü gweghe hang waben, nu keni tsüna asajjü kesütan saben.”

³²Ntsawajüh ha wi atsentsa kekuthi kedhu pi ccüca chiben, tsüna hi Khrista nu kemehu cüki chüshi keyawa tsü.

³³Isala ha nthu ghena la: awuba kesüsü ma ketanla ma ketizen tsüti ma wubvü tizen, nu awubvü kesüsü tsüdila ma wuba ntizenthu yishü.