Read Northern Rengma Naga FILIPPINYI 2 Bible Online

FILIPPINYI 2 - Northern Rengma Naga bible

FILIPPINYI 2

¹Nthu Khrista wi kahang tsüna nthu satezü, nu ma ketizen na nthu noncca cüben. Nthu na Aghamu ssinu ashusa nu nthu khokho tu wi kecca- ketssü nu ketizenli benyadha.

²Tsalina hi nthu wi khieben, hi la sa pi kemeshen kesü, ketizen kesü, nu aleben kesü sa nu inonghe cencuya thsülo.

³Apvükemene nyelela kapvü-kashü wina mangla nsa lalo, isala khokho tu wi satemeni nu keshüthangla nyu kepathu na nthu miwi mehai le salo.

⁴Nthu kesüsü kenenwa tsü sa, nthu kenen ketan nsa lalo.

⁵Nthu na Jisu Khrista yencüki kemehaiwa tsü pvü yalo:

⁶Ma keshüthangla Anyiza tsiyen ben, isala ma khiela ma pi Anyiza meceqe sale nmeshen.

⁷Tsüti kesawa nye, ma ketanla ma kenen wina ma keben tsüdi teshia, nu amagha yencükiwa tsü pvüya. Ma anyi tsi ti sa nu hang gho.

⁸Ma ketanla ma satemeni nu alentagha wi ajühkeya sa sen wa ma keshü cu — ma kross miwi keshü.

⁹Ha jjügi ghena Anyiza na ma sa pi hang cü nu pi apen kemisi ntsawa wi chicü, nu tsüdi miwi anyan kemisi ntsawa pi ma cüdha.

¹⁰Tsalina Jisu nyan kinyikü wina tang wi, ayyi wi, nu ayyi kekhu wi tsüdila akhhutsüdu ma kinyiden.

¹¹Nu tsüdila Abawa Anyiza nyankethang wina Jisu Khrista na Apvüwa le kesa khishü ben.

¹²Tsalina ipvüshangthu, hi nthu gweghe keben wi nthu na keshüthangla ijühkina keten tsüti hi nthu gweghe nbenla kesa wi nthu na tsü miwi ijüh nkinathu yishü. Messi nu kedheggüla kuli sen wa nthu hangshakeya cen yalo.

¹³Kepaghenanye Anyiza na keshüthangla nthu wi kuliben nu nthu sa pi ma kemeshenwa tsü nieya thsü mvuthi saden.

¹⁴Mangla kicennali nyelela leben nkaghajüh nkhila katsüha lela salo,

¹⁵ isanu nthu na metha nu mehai cencu kesa Anyiza tsangathu sa nu kesami nyi nu nkemehai yyi wi hangya thsüle kesalina. Nthu na tang wi ghotsithu ti mathu jawi nwegüthu yishü,

¹⁶tsüna nthu ketsijüh pi mathu kekiza wi tsü. Keujüla nthu na tsüti sa lethu, hi Khrista tsathang wi nthu ghena kapvü keya jjügi na benben, kepaghenanye tsüna hi kekuli tsüdila ndedile kesa pi ccücaben.

¹⁷Nthu kenondi pi Anyiza cü thsüle kesalina hi kahang pi ahhansha kesa jjü ti keji thsüla nchü. Keujüla tsüti lethu, hi nen nu nthu tsüdi ssinu anonghe ben.

¹⁸Tsü makesü, nthu la nong nu hi ssinu anonghe nsathu yishü.

¹⁹Hi nthu cüki chü pi inonghe yale kesalina Apvüwa kemeshen ti lethu, hi wan Timothi kesun pi nthu wi chile saben.

²⁰Ma ketan hi kemeshen chü nu ma ntsakhiwa nthu cüki meshen benden.

²¹Kepathu kesüsü tsüdila ma ketanla ma shei meshen nu Jisu Khrista ghena kuli nten.

²²Nthu na ma kekuli khati kesa, ishinyi na batsanyi ti sala khatila ajühkemehaiwa ghena gweghe kuli khe nthu na chüben.

²³Tsalina hi pala ighena khati saben khe chüya meyi ma kesun pi nthu wi chiben kesa nondi ben.

²⁴Hi la matsü kesie nsala nthu wi gho yaben kesa hi Apvüwa nondi ben.

²⁵Hi gweghe kuli nu aghisa, nu nthu nyilo sala hi kekiqawa ithu cünyuwa Epafrodita tsü kesun pi nthu wi nchithu yishü le kesa la meshen.

²⁶Ma nthu tsüdi muya mvu ntsa saben, nu nthu na ma naa le kesa zaya kesalina ma leben güccüben.

²⁷Ntsakhiwa ma naa pi shü keten ti sale. Isala Anyiza na ma ketan nyela hi la tizen chicü nu hi ya ahathakina keti nmetu thsüla.

²⁸Hi ma kesun pi nthu wi chi mvu ntsa saben, isanu nthu na ma mu keya wi anongheya nu ihathakina tsü nmi thsülale kesalina.

²⁹Ma pi Apvüwa wi acünyu kesü ti sa nu anonghethi ma ssiyalo. Anyi ma ti kesathu tsüdila kinyiküden,

³⁰kepaghenanye ma nthu na saya nkesa wi hi kiqale kesalina Khrista kekuli ghena ma kahang khuchi nu shü zzi le.