Read Northern Rengma Naga FILIPPINYI 4 Bible Online

FILIPPINYI 4 - Northern Rengma Naga bible

FILIPPINYI 4

¹Tsalina icünyuthu, nthu na khatila hi tizen nu hi nthu nmvu ben nu! Nthu na khatila hi sa pi anongheya thsü, nu hi nthu ghena kapvüya thsü nu! Hi ketizenthu, tsalina nthu kahang wi Apvüwa wi zükeqhe ngan benyalo.

²Euodia nu Sintikhe, Apvüwa wi pvünon nyi ti sa nu ajüh keyalilo kesa hi nshinyi wi khieben.

³Hi gweghe kekuliwa, hi no la nza hathu kiqachi thsü mvuben; kepaghenanye mathu na hi, Clement, nu kepa wi hi gweghe kekulithu, Anyiza kahang lesüshen wi mathu nyan pi zhü kethengthu tsüdi gweghe ajühkemehaiwa ghena apiketsü sa kuli.

⁴Nthu keshüthangla Apvüwa wi anonghethi salo. Hi ha khi neng ben: anonghethi salo!

⁵Kesüsü tsüdi tu wi ccatssülo. Apvüwa na wan gho tendha.

⁶Mang ghena la ahathana nsala, isala nthu na Anyiza wi kekhie tsüdi nthu nsenthu keyishü ghena khie, keshüthangla aleben wi keseng sen nu ma wi khielo.

⁷Anyiza kecca anyi na chüshiya nketenwa tsüna Jisu Khrista wina nthu leben nu kahang wi ben keyawa salo.

⁸Ajühsakhen icünyuthu, pala kemehai nu keseng kepvüqothu ha pi nthu kahang pong yalo: tsüthu tsüna atsentsa, ketsatan, kemeshon, kemetha, nenthikesa, nu kinyikükesa.

⁹Nthu na kekuli wi le ajüh wi lela hi wi mukeya nu chükeyathu tsü sa tenlo. Isathu, kecca pi ithu cü ketenwa Anyiza na nthu ssi benden.

¹⁰Matsü kesie seng wi nthu na icüki meshen keten pi ccücaya kemehai matsü kesü keben ghena hi Apvüwa wi inonghe ntsa saben. Hi nthu na icüki nmeshen ladha le khi nben, isala nthu na hi kiqaya kemehai matsü mu meya.

¹¹Nyu hi n-nanchila kesa ghena hi ha khi nben, kepaghenanye hi mangwa ben khe sen nu inonkwenthi kesa yen chüyadha.

¹²Hi keu ketan kesen yen nu kejon keben kesen yen la chüben. Hi kekuthi hawa ha chüyadha, tsalina hi kahe wi katsüha sa lela hi ipvü nma le ghama lela, hi kejon ben le keu ben lela hi anonkwenthi benden.

¹³Khrista na kekhang pi hi kecü wina hi katsüha tsüdila saya kemehai kekhang ben.

¹⁴Isala nthu na hi agüccü keben wi hi kiqa kecü tsüna mehai ntsawa.

¹⁵Nthu Filippinyithu na hi Macedonia teshi nu Jühtheü Kemehaiwa khi wa tegü wi nthu kemehu ketan hi kiqa; nthu na khukechi nu mukeya wi hi gweghe le kesa nthu na chüben.

¹⁶Hi Thessalonika wi hhatu keben wi nthu na kejon tughu kekiqa kesun pi hi cü.

¹⁷Tsüna hi ajuthu tsü yamvu kesa ghena nye, isala kekiyi pi nthu ji wwakeya tsü ghangchi mvu kesalina.

¹⁸Nthu na ighena khukechi tsüdila muyadha, nu tsüna ighena ji ntsa sadha le! Epafrodita na nthu ajuthu khukechi sengho hi cü nu hi khili nsenthu keyishü tsüdi benyadha. Tsüthu tsüna keyaqo hhansha sa pi Anyiza kenen kesa hankedemvu tsüti.

¹⁹Anyiza na ma keben pong keminni kesa tsü pi Khrista Jisu wina nthu nsenthu keyishü tsüdila sa cüben.

²⁰Anuphan nu anuphanla ithu Bawa Anyiza nyanthangkeyawa salo. Amen.

²¹Shalom pi Khrista Jisu ji sa kesa Anyiza nyithu kesüsü tsüdila cüben. Hi gweghe keben acünyuthu na nthu wi shalom kesun chiben.

²²He wi Anyiza nyithu tsüdi, tsü miwi kadijjen wi Kadimiwa theghithu na nthu shalom saben.

²³Apvüwa Jisu Khrista nanketizen ya nthu tsüdi ssiben keyawa salo.