Read Northern Rengma Naga KOLOSSINYI 1 Bible Online

KOLOSSINYI 1 - Northern Rengma Naga bible

KOLOSSINYI 1

¹Anyiza kemeshen wina Jisu Khrista ghena apostelwa Paul nu ithu cünyuwa Timothi wina pila —

²Kor losi wi keben kemethathu nu Khrista wi atsentsa ithu cünyuthu kecü: Ithu Ba Anyiza yala nanketizen nu kecca pi nthu kecüwa salo.

³Ikhang na nthu ghena kekhie kesa wi keshüthangla ithu Pvüwa Jisu Khrista Ba Anyiza seng benden.

⁴Kepaghenanye ikhang na nthu Jisu Khrista wi kenondi keben nu nthu na Anyiza nyithu tsüdi tizen keten cüki zayadha.

⁵Nthu na Jühtheü Kemehaiwa atsentsa ketsijüh tsü zakeya wi nthu na ciwi kaghang keben cüki tsü zayadha. Tsalina nthu kenondi nu ketizen na tang wi nthu ghena pi tsanqai ketheng kaghangwa wi tsü ben.

⁶Ajühkemehaiwa na kesawegüthu sengho nu ayyi tsüdi wi bvü zighe waben, tsüna nthu na Anyiza nanketizen cüki zaya nu tsüna ntsakhiwa le kesa chükeya nten na nthu jawi kuli keben tsü makesü.

⁷ Nthu na ikhang[1] kuti wina atsentsa Khrista kekuli sa nu gweghe amagha sa keten ketizenwa Epafra wi Anyiza nanketizen cüki tsü zayadha.

⁸Ma Aghamu na ketizen pi nthu kecü cüki khi pi ikhang kiza.

⁹Ha jjügi ghena ikhang na nthu cüki zakeya nten na keshüthangla nthu ghena kekhie saden. Anyiza na ma kenen wi kechükeza, nu ma Ghamu na khukechi kemetsa nu chüshikeya tsüdi pi nthu pong cülo kesa ma wi khieden.

¹⁰Isathu nthu na Apvüwa kenmvu nu kenen wi hang nu keshüthangla ma kenenwa tsü sayaben. Nthu kahang wi kekuli kemehai tsüdi saya nu Anyiza cüki kechü wi shigü wayaben.

¹¹Nthu yala pala tsüdi wi la kethankehiya thsüle kesalina ma kekhang nyankethang wina kegho kezü tsüdi ya nthu satezü kecüwa salo. Nu anonghela keseng pi Abawa, nthu sa pi Anyiza na kewegü kadiyyi wi ma nyithu ghena kiden ketheng wi tsü gwegheya kemehai sa kecüwa tsü cülo.

¹³Ma kejang kekhang wina ithu khushiya nu ithu ssigho ma ketizen Tsawa kadiyyi wi chicüdha,

¹⁴ nu ma ghena kesami wi ithu lisha chicü, ithu kesami teshi pi cüdha.

¹⁵Khrista na nkemuwa Anyiza tsi ti mu kebenwa tsü. Ma Atsa tssütsewa, sahangkechi tsüdi miwi kediwa.

¹⁶Kepaghenanye Anyiza na ma wina atssan nu ayyi wi pala tsüdi, mu keben nu mu nkebenthu, pi aghamulen wi kekhangthu, apvüwathu, kekhang kesenthu nu kekhangthu tsüdila saghu sachi. Anyiza na ma wina nu ma ghena atssan, ayyi maben sachi.

¹⁷Khrista na pala tsüdi tu wi na ben ghodha, nu ma wina pala tsüdila mehaitsü ma pen wi ben.

¹⁸ Ma ma gwo, kemehu wi tsü aliwa; ma agwo wi tsü kahang bvüwa. Ma Atsa tssütsewa, ma pi pala tsüdi wila atuwa pen wi benya thsüle kesalina Anyiza na keshü wi ma sa pi hang neng cüa.

¹⁹Kepaghenanye Anyiza kenen wina Atsawa mi wi Anyiza yenwa tsü ben cencuben.

²⁰ Tsalina Anyiza na Atsawa miwi na atssan, ayyi maben sen nu ma wi gho neng le südhedha. Anyiza na ma Tsawa pi kross miwi ahhansha sa keshü ghena kecca sachi, nu tang wi nu ayyi wi la pala tsüdi sen nu ma wi gho nengdha.

²¹Matsü kutijü wi nthu na nkemehai kuli nu meshen kesa ghena Anyiza ssinu temeja nu ma ghinyithu sagho.

²²Isala khilitsü ma Tsawa keshü ghena Anyiza na nthu pi ma pvüshangthu sayadha, isanu nthu yala metha, tsatan, nu kemeshensa nmila ma tu wi ghoya thsüle kesalina.

²³Nthu na ajühkemehaiwa zakeya wi kekiyi mukeya kaghangwa tsüna apen nketsen thsüla zükeqhe nondiki, nu ghansen khvu nbenthu yishü. Ajühkemehaiwa ha ghena hi, Paul na amagha kesü saben, nu ajühkemehaiwa ha pi ayyi wi anyi tsüdi sansi chidha.

²⁴Nu hi khili nthu ghena ketizen kesa ghena inongheben, kepaghenanye hi asajjü wi ketizen kesa ghena Khrista na ma gwo, kemehu kuti wi ketizen kesa npi kesacenwa tsü kiqa pi sacen cüben.

²⁵Anyiza na hi pi kemehu maghawa sa thsüdha, nthu ghena kemehaiwa salo kesa ghena kekuli ha pi hi dhen chicüdha. Kekuli hawa ha ma ketsijüh pi thangchilo kesawa tsü,

²⁶tsüna ma pi kheni abvüye wakeathu tu wi kuthi gho isala khili pi ma nyithu ccücachidha.

²⁷Anyiza kemeshen na ma wi kekuthi tsü pi ma nyithu chüya thsü, keben nu anyankethang kekuthiwa ha ma wi anyi tsüdi ghena ben. Kekuthiwa tsüna Khrista na nthu wi ben, tsü jjügi nthu na Anyiza nyankethang wi tsü gweghe yaben.

²⁸Tsalina ikhang na Khrista jüh pi anyi tsüdi wi kizaden. Anyi kesüsü Khrista wi kezügü nyi sa nu Anyiza tu wi ghoya thsüle kesalina ikhang na saya kemehai chu kemetsa tsüdi sen nu mathu kitsan nu sansi benden.

²⁹Ha sacen yale kesalina Khrista na kekhang pi kecü nu hi wi kuli kebenwa tsü sen nu apiketsü sa kuliben.