Read Northern Rengma Naga KOLOSSINYI 3 Bible Online

KOLOSSINYI 3 - Northern Rengma Naga bible

KOLOSSINYI 3

¹ Nthu pi Khrista gweghe kahang wi shagha thsüdha, tsalina nthu leben pi tang wi tsanqaithu ciwi Khrista na ma kadipen wi Anyiza kwen ajewa keben tsü meshen yalo.

²Nthu leben pi pala tang wi kebenthu tsü meshenyathu khe ayyi ha wi kebenthu tsü nmeshenla.

³Kepaghenanye nthu na shüdha, nu nthu kahang pi Khrista gweghe Anyiza wi kuthiben.

⁴Nthu kahangwa tsüna Khrista, nu ma khathansha wi gho khe ciwi nthu la ma gweghe ma nyankethang wi benya ben le!

⁵Isathu nthu wi kuli keben ayyi ha wi kenmvuthu qheza-qhena kesa, hang nkemetha, nkemehai kesamvu, nu apvükemene (apvükemene tsüna atsikezhü kekinyi) tsü pi shü thsü nsathu yishü.

⁶Pala hathu ha ghena Anyiza lebenkekha na ma jühkina nketenthu miwi ghoben.

⁷Nthu la kutijü wi hathu kenmvu wi hang, tsüthu na nthu kahang miwi khang.

⁸Isala nthu na khilitsü aleben keminu, asajjü kesamvu, nankemeghüli kesathu ha tsüdi teshi nsathu yishü. Nthu pang pi nyu kekimenni nyelela nyu keshun jüh nkhila.

⁹ Nthu khokho tu wi mili nmesala, kepaghenanye nthu na kahang kaghawenwa nu ayencüki tsü teshi

¹⁰ nu kahang ketheüwa tsü pvüyadha. Hawa ha kahang ketheüwa tsü, ma tsi ti kesachiwa Anyiza na nthu ssigho ma cüki chü ntsaya thsüle kesalina ma keshüthangla tsü sa pi ketheü sa neng benden.

¹¹Tsalina ciwi Judah nyithu nu Judah nyi nkenyethu, ahyu kahanthu nu ahyu nkahanthu, amizza kepapa nyithu, azendi nyithu, nssümaghathu, nu ahvuthu kepapa kesa nmi, isala Khrista na tsüdi, nu ma tsüdi wi ben.

¹² Nthu na Anyiza nyithu; ma nthu tizen nu nthu kessi pi ma nyithu sayadha. Tsalina nthu ketizen, keccaketssü, nkekapvü, satekemeni, nu kethankehi pvü meyathu yishü.

¹³ Kesü kesü tu wi kekheneng nu keujüla khokho tu wi leben nkagha ben lethu kesami teshi pi kecüli yalo. Apvüwa na nthu kesami teshi kecü ti nthu khokho kesami nketeshilithu yishü.

¹⁴Hathu ha tsüdi miwi nanketizen pi wwayalo, tsüna pala tsüdi wi ajühjja-kemece tsü zanghu cencuben.

¹⁵Khrista na khukechi kecca tsüna nthu na ajüh kesüdhe wi nthu lentsütson den; kepaghenanye kecca ha wi Anyiza na nthu cighu pi agwo kesütan sayadha. Ma nkesengcha sa benlo.

¹⁶Khrista ketsijüh wi kebenwa tsüna nthu leben wi nhangthu yishü. Kemetsa tsüdi sen nu nthu khokho sansi nu kechü-kenong tenlo. Keseng khwi, ntsawa khwi, nu kemetha khwithu salo; nthu leben wi Anyiza keseng khwi salo.

¹⁷ Isanu nthu na ma wina keseng pi Abawa Anyiza cü keten tsüti nthu na katsüha kekuli nu ajüh kekhi tsüdi wi la Apvüwa Jisu nyan wina salo.

¹⁸Awubvüthu, nthu wubathu kekhu wi hanglo, kepaghenanye Apvüwa wina tsüti kesa-u.

¹⁹ Awubathu, nthu wubvüthu tizen nu mathu tu wi jjüqha-jjügha nsala.

²⁰ Ghanyithu, keshüthangla alentagha wi nbajjathu jühkinalo, kepaghenanye tsüna Apvüwa kenen.

²¹ Abajjathu, nthu tsangathu leben sameshü nsala, isalethu mathu na accükwenshü wa ben.

²² Nssümaghathu, alentagha wi la ayyi wi nthu pvüthu jühkinalo, nthu na mathu kenen pvüyale kesa ghena mathu na nthu ghang keben wi ketan nsala; isala Apvüwa kemessi wina nthu leben tsentsa nu satenlo.

²³Nthu leben tsentsa sa nu kekuli katsüha sa lela anyi ghena le nsala Apvüwa kekuli saben le salo.

²⁴Apvüwa na pi ma nyithu ghena ketheng tsü pi nthu kutimen sa cüben kesa meshen yalo. Kepaghenanye nthu na ntsakhiwa Apvüwa Khrista kekuli saben.

²⁵ Sazzi keten tsüdila ma kesazzi kutimen muyaben, kepaghenanye Anyiza na ayen makesü wina anyi tsüdi jühkaghakhi den.