Read Northern Rengma Naga KOLOSSINYI 4 Bible Online

KOLOSSINYI 4 - Northern Rengma Naga bible

KOLOSSINYI 4

¹ Apvüthu, nthu la tang wi nthu Pvüwa kesü benle kesa tsü chü nu nthu nssümaghathu tu wi ketsatan nu kemeshon sa tenlo.

²Nhandhila kekhie saki benlo, nu nthu kekhie kesa wi meghe-metsaya, keseng pi Anyiza cülo.

³Ikhang ghena la kekhie sa benlo, isanu Anyiza yala matsü kemehai pi ikhang cü thsü nu Khrista cüki kekuthiwa tsü pi khiya thsüle kesalina. Kepaghenanye tsü ghena hi khili atssüzü saben.

⁴Hi kekhi-u tsüti methasi khiya thsüle kesalina kekhie sa benlo.

⁵ Nkenondithu tu wi nthu yencüki ghena metsashhu sayalo, nthu matsü kemehai keben tsüdila sen kemehai saya.

⁶Nthu jühkekhi wi keshüthangla kina mehai nu jiketsü nsathu yishü, nu nthu na khati nu metsashhu nyu luneng ten khe chüben.

⁷ Ithu cünyuwa Tukhika, atsentsa kekuli nu Apvüwa kekuli wi hi gweghe amagha sa ketenwa na icüki tsüdi pi nthu kizaben.

⁸Tsalina hi ma kesun pi nthu wi chiben, isanu ikhang tsüdila khati saben khe pi nthu kiza nu nthu kechü-kenongya thsüle kesalina.

⁹ Nu ma nthu nyi meshu kesü atsentsa nu ketizen cünyuwa Onesima gweghe ghoden. Manyi na he wi tsüdila khati saben khe khi pi nthu kizaben.

¹⁰ Hi gweghe atssüzü sa kebenwa Aristarka na nthu shalom saben, nu tsüti Barnaba cünyuwa Mark la nthu shalom saben. (Mark na nthu wi gho lethu, anonkeghe sa ma ssiyalo kesa kecükegwe kechi tsü nthu na muyadha.)

¹¹Joshua pi Justa le ci ketenwa la nthu shalom saben. Judah nyi leben khapeghekeya ha ma kecheng ketan hi gweghe Anyiza Kadiyyi ghena kuliden, nu mathu na hi kiqa ntsa saden.

¹² Nthu nyi kepa kesü Jisu Khrista maghawa Epafra la nthu shalom saben. Nthu ya Anyiza jühkekina wi zükeqhe ngan nu Khristanyi kezügü saya thsüle kesalina ma keshüthangla nthu ghena Anyiza wi kekhie sa ntsa benden.

¹³Ma nthu ghena nu anyi Laodikea nu Hirapoli wi kebenthu ghena apiketsü sa kuli keten hi khiya mehai.

¹⁴ Ithu ketizenwa Luk, dawakechüwa nu Dema manyi na nthu shalom saben.

¹⁵Ikhang shalom pi Laodikea wi keben acünyuthu nu Numfa nu ma jjen wi kemetuli keten kemehu cülo.

¹⁶Nthu na lesü ha kesi seng wi pila Laodikea wi la sichi metsilo. Tsü makesü nthu na Laodikea wi acünyuthu na kesun chicü keben lesü tsü silo.

¹⁷ Nu Arkhippa wi kiza, “Apvüwa kekuli pi no cü ketheng tsü sacen metsilo.”

¹⁸Hi, Paul, ikwen pi ha zhü pi nthu shalom saben. Hi amighe ssüli pvü keben ha nmalila. Anyiza nanketizen ya nthu ssiben keyawa salo.