Read Northern Rengma Naga 1 THESSALONIKANYI 2 Bible Online

1 THESSALONIKANYI 2 - Northern Rengma Naga bible

1 THESSALONIKANYI 2

¹Icünyuthu, ikhang na nthu hhainan kegho tsü ma men nmi nsale kesa nthu na chüben.

²Ikhang na Thessalonika wi nthu wi npi kegho jü Filippi wi ikhang na khatila kejügheya nu kimenni khe nthu na chüben. Ciwi kematang na kejon ben lela Anyiza na kempvüza pi ikhang cü nu ikhang na ma wina kegho Jühtheü Kemehaiwa tsü pi nthu kiza.

³Ikhang na nthu wi kekhie tsüna kesazzi nu nkemetha wina nye, nyelela ikhang na anyi kesüla mechu nten.

⁴Tsüti kesawa nye, ikhang na keshüthangla Anyiza na ikhang ya khi thsü mvu kebenwa tsü khiden, kepaghenanye ma ikhang ghan-nan nu Jühtheü Kemehaiwa tsü pi ikhang dhen kechi qo sadha. Ikhang na anyi kenen kesawa nyela Anyiza ithu leben ghan-nan ketenwa tsü kenen saden.

⁵Ikhang na nyu keseng jüh khi, nyelela ajüh khi pi apvükemene tsü pabhon le kesa ghena nthu wi ngho kesa nthu na mehaitsü chüben — Anyiza na ithu chüza saben!

⁶Ikhang na nthu wi nyelela anyi kepa wi lela keseng tsü muya le sa nten,

⁷ikhang na Khrista apostelthu nthu wi khie keya-u sa lela. Isala ikhang na nthu gweghe keben wi ccapeyi nu ajja kesü na ma tsanga kenoncca ti sa.

⁸Ikhang na nthu tizen ntsa kesalina Anyiza wina kegho Jühtheü Kemehaiwa pi nthu kiza le kesa ketan nyela ikhang kahang lela pi nthu cüale sa; kepaghenanye nthu na ikhang kaghali ntsawa!

⁹Ikhang cünyuthu, nthu na ikhang khatila agüccü nu kuli khe chübenla metsi. Ikhang na Anyiza wina kegho Jühtheü Kemehaiwa pi nthu kesansi wi nthu likesaghang nsale kesalina ikhang na aghaja ghanan kuli.

¹⁰Ikhang na nthu kenondithu tu wi ayencüki metha, tsatan, nu nsazzi le kesa nthu nu Anyiza na ikhang chüza saben.

¹¹Aba kesü na ma tsanga kenoncca ti ikhang na nthu kesüsü noncca le kesa nthu na chüben.

¹²Ikhang na nthu kechü-kenong, nthu leben satecca, nu nthu ci pi ma Kadiyyi nu anyankethang wi chi keyawa Anyiza kenen kahang wi hanglo kesa nthu kiza ntsa sa.

¹³Ciwi ajjügi kepa wi la kesü ghena ikhang na keshüthangla keseng pi Anyiza cüden. Ikhang na Anyiza ketsijüh sen nu nthu wi kegho wi nthu na tsü pi anyi jüh ti nsala ntsakhiwa pi Anyiza ketsijüh sa nu yaya. Kepaghenanye Anyiza na nthu kenondi miwi kuliben.

¹⁴ Ikhang cünyuthu, Judea wi Anyiza kemehuthu wi Jisu Khrista nyithu miwi sa kechi tsü makesü nthu miwi la sa chidha. Mathu na Judah nyithu kwen wi ketizen kesa ti nthu la nthu nyithu kwen wi ketizen sa ntsa sadha.

¹⁵Mathu na Apvüwa Jisu nu atusenjüh-kechüthu pathi nu ikhang meten-mesha. Mathu na khatila Anyiza nkenen sa nu! Mathu na khatila anyi tsüdi nanmeghü ben nu!

¹⁶Mathu na ikhang ketsijüh pi Judah nyi nkenyethu wi mathu hangshaya keten ghena kekhi tsü la khen. Mathu na hati nu keshüthangla kesamithu tsü sa cencu sa. Nu khili Anyiza leben kekha tsüna asakhen sa mathu miwi ghodha.

¹⁷Acünyuthu, ikhang na matsü keujü aleben wi nyela asajjü wi nthu teshi kesalina ikhang na nthu nmvu ntsa sa nu ikhang na nthu mu nengyale kiden ntsa sale!

¹⁸Ikhang na nthu wi gho neng mvu sa. Hi, Paul kejon tughula nthu wi ghole sa, isala Satan na ikhang khen.

¹⁹Nthu ketan khe nyu kepathu nye le! Nthu na ikhang kaghangwa, ikhang nonkeghewa, nu ithu Pvüwa Jisu na gho keten wi ikhang khangkeya ghena kekapvü liwen tsü le!

²⁰Ntsakhiwa nthu na ikhang nyankethang nu anonkeghewa tsü le!