Read Northern Rengma Naga 1 THESSALONIKANYI 3 Bible Online

1 THESSALONIKANYI 3 - Northern Rengma Naga bible

1 THESSALONIKANYI 3

¹ Asakhenwa, ikhang na nthu nmvu kesa tsü pvüben meyala. Tsalina ikhang na Athen wi ben wa

²nu ikhang cünyuwa Timothi, ikhang gweghe Khrista cüki Jühtheü Kemehai kekhi wi Anyiza kekuli sa ketenwa kesunchi le kesa südheya. Ikhang ma kesun pi nthu satezü nu nthu kenondi kiqa cü,

³isanu nthu kesüla kemeten-kemesha tsü ghena aseng nkheneng thsüle kesalina. Ithu ghena kemeten-kemesha ha Anyiza kemeshen le kesa nthu na chüben.

⁴Kepaghenanye ikhang na nthu gweghe keben wi npi wina nyu na ithu meten-mesha ben kesa nthu kizadha, nu nthu na mehaitsü chükeben ti tsü sa bendha.

⁵Tsalina hi Timothi kesunchi ben. Hi pvüben meyala kesalina ma kesun pi nthu kenondi cüki chüya thsüle sa. Atsaghang na nthu mechu nu ikhang kekuli tsüdi pi ma men nkemi sa meyacha le!

⁶ Khili Timothi na gho nengdha, nu ma nthu kenondi nu ketizen cüki jühtheü sengho ikhang cü. Ma nthu na keshüthangla ikhang meshenden nu ikhang na nthu nmvuthi keben ti nthu la ikhang nmvuthi ben le kesa kiza.

⁷Tsalina acünyuthu, ikhang na agükeccü nu ketizen kesa tsüdi wi nthu kenondi cüki ghena ikhang kechü-kenong benden.

⁸Nthu na khili ntsakhiwa Apvüwa wi kahang wi zükeqhe ngan keben ghena ikhang na hangben.

⁹Ikhang na khili nthu ghena keseng pi Anyiza cüya mehai, kepaghenanye nthu ghena ikhang nonkeghe tsüdila Anyiza tu wi ben.

¹⁰Ikhang na aghaja ghanan tsüdila ikhang leben tsüdi pi ma wi ikhang yala nthu muya thsü nu nthu kenondi wi nsenthu keyishü sa pi cüya thsülo khieden.

¹¹Ithu Nyiza Abawa ma ketanla nu ithu Pvüwa Jisu yala ikhang len kiden chi nu nthu wi gho keyawa sa nalo!

¹²Apvüwa yala nthu ketizenwa tsü sa pi khokho nu anyi tsüdi tizen kayi pi ikhang na nthu ketizen cu saya thsülo.

¹³Hati nu ma nthu satezü, nu nthu na ithu Pvüwa Jisu na ma nyilothu tsüdi ssinu kegho wi Abawa nu ithu Nyiza tu wi cencu nu methaya thsüben.