Read Northern Rengma Naga 1 THESSALONIKANYI 4 Bible Online

1 THESSALONIKANYI 4 - Northern Rengma Naga bible

1 THESSALONIKANYI 4

¹Asakhenwa, icünyuthu, nthu na ikhang wina khati hang nu Anyiza kenen nsathu yishü khe chüyadha. Ntsakhiwa, nthu na hati kahang-u. Nu ikhang na khili Apvüwa Jisu nyan wina nthu na ha miwi la tsüti sabenlo khie nu kiza ntsa saben.

²Kepaghenanye ikhang na Apvüwa Jisu kekhang wina kecükegwe pi nthu kecü tsü nthu na chüben.

³Anyiza na nthu ya metha nu qheza-qhena nkemetha tsü teshitha sa thsü mvuben.

⁴Nthu npvüza kesüsü tsüdila khati nu ma wubvü ssinu kemetha nu kinyikü wi kahang-u khe tsü chü,

⁵Anyiza nkechüthu ti asajjü kesa mvu tsü nsala.

⁶Ha jjügi wi anyi kesütanla ma cünyuwa tu wi sazzi nyelela ma miwi ma ghena kemehaiwa nsa thsüla. Ikhang na nthu kizadha, nu Apvüwa na hati kesathu meten cüben kesa nthu kitsan ntsa saben.

⁷Kepaghenanye Anyiza na hang nkemetha wi nyela kemetha wi hanglo kesa ithu ciya.

⁸Tsalina anyi thowa na kesansijüh ha meya mvuten khe ma anyi nyela Anyiza ma Kemetha Ghamu khukechiwa tsü meya mvu saben.

⁹Kenondithu ketizenli cüki tsü zhü pi nthu ncüla mehaidha, kepaghenanye khati nu nthu khokho nketizenlithu yishü khe Anyiza na nthu sansi cüdha.

¹⁰Nu ntsakhiwa, nthu na Macedonia tsüdi wi acünyuthu tu wi hati saden. Tsalina ikhang cünyuthu, nthu na ha miwi la tsüti sa tenlo khieben.

¹¹Hatu wi ikhang na nthu kekiza ti nthu kahang ccen kesa wi hang, nthu ketanla nthu kekuliwa tsü chü, nu nthu ketanla nthu nmen mellidsa le kesa mitsüyalo.

¹²Hati nu nthu na nkenondithu wi kinyikü muya ben, nu nthu nsenthu keyishü tsü ghena anyi thola maghaki nben.

¹³Icünyuthu, nthu na anyi kaghang nkemithu ti ahathana thsü nsale kesalina ikhang na anyi shü kesathu cüki tsentsa tsü pi nthu chüya thsü mvuben.

¹⁴Jisu na shü nu hangneng-shagha le kesa ikhang na nondiben, tsalina Anyiza na ma nondi nu shü kesathu tsü pi Jisu gweghe ssi neng yaben kesa ikhang na nondi ben.

¹⁵Ikhang khili pi nthu sansi kebenwa ha Apvüwa kesansijüh: Apvüwa kegho tsathang wi ithu hang kebenthu na shü kesathu tu wi wa nben.

¹⁶Kepaghenanye Apvüwa na ma ketanla ahhai misi ntsa jisha, tangnyilo kediwa hhai, nu Anyiza tutuwa kekhou hhai ssisen nu tang wi na dugho ben. Khrista nondi nu shü kesathu na atuwa hang shagha ben;

¹⁷Tsaseng wi ithu tsü tsüwi hang kebenthu saghu senki akulukeshü wi mathu gwegheya nu atssan wi Apvüwa metu ben; isanu ithu anuphanla Apvüwa gweghe ben wa ben.

¹⁸Tsalina ajüh hapi khokho kechü-kenongli tenlo.