Read Northern Rengma Naga JOSHUA 18 Bible Online

JOSHUA 18 - Northern Rengma Naga bible

JOSHUA 18

¹Mathu na ayyi nka keya seng wi Israel zitenti maben Shilo wi saghu nu Apvüwa ketenpen Nithsüjjen tsü sa.

²Ciwila Israel nyi mizza tagü na mathu shei ayyi pi npi cü.

³Tsalina Joshua na Israel nyithu wi khi, “Nthu na wala Apvüwa nthu bamyithu Nyiza na ayyi pi nthu kecü tsü yayale kesalina matsü khathula nthu hieben nu?

⁴Amizza kesü wi meshu kecheng cheng kessi chilo. Hi mathu kesun pi wa diyyiwa maben keqoe nu ayyi pi mathu ji saya mvu keben yyitsiton sen nu hi wi gho thsüden.

⁵Ayyi tsü pi mathu jawi gishü tagü saben; Judah na acülawa ma yyi witsü benben, nu Josef theghi na aghawa ma yyi witsü benben.

⁶Ayyi gishü pi tagü kesa cüki tsü zhüya nu sen nu hi wi gholo. Tsaseng wi nthu ghena Apvüwa ithu Nyiza tuwi hi akezen wwi ben.

⁷Isala Levi nyithu na nthu kepathu ti ayyi mathu shei muya nben, kepaghenanye mathu shei na Apvüwa ghena keqhaikedi kekuli kesawa tsü. Nu Reuben, Gad, nu nishuwa Manasseh mizzathu na Jordan na nishuwa mathu shei Apvüwa maghawa Mosa na pi mathu kecü tsü muyadha.”

⁸Joshua na kecükegwe hathu pi mathu kecü seng wi anyithu na yyitsiton yale wa: “Wala ayyi tsüwa maben wi keqoe nu yyitsitonya nu tsü sen nu hi wi gho nenglo. Tsaseng wi hi Shilo wi nthu ghena Apvüwa tuwi akezen wwi ben na.”

⁹Tsalina anyithu na wa ayyi tsü maben qhonan nu mathu na tsü pi khati gishü tagü saya khe zhüya, nu ciwi anyunutithu nyan la zhüya. Isanu mathu na kemnanpen Shilo wi Joshua wi whaneng.

¹⁰Joshua na akezen wwi nu mathu ghena Apvüwa kemeshen kina, nu ayyi keben tsü gishü pi Israel mizzathu kesüsü mabenla cüa.

¹¹Ayyi pi Benjamin mizza theghithu kecü na atuwa. Mathu yyi na Judah nu Josef mizzathu jüwi ben.

¹²Aghawa mathu ggü na Jordan wina sasen Jerikho na aghawa kesüphi wi shu nu nidu kepeghewa yyishiphon diyyiwa tsü pvüdhi sen Bethaven yyikeshü kecu waben.

¹³Tsaseng wi aggü na sasen Luz (Bethel lela khiden) na acülawa kesüphi wi wa. Nu Beth Horon ssanwa na acülawa yikha miwi Ataroth Addar wi cüben.

¹⁴Tsaseng wi aggü na ayikha ha na niduwa sasen acülawa kepeghe wi wa Judah mizza yyi Kiriath Baal (nyelela Kiriath Jearim) wi waben. Ha na niduwa ggü.

¹⁵Acülawa ggü na Kiriath Jearim katen wina sasen Neftoah Tssükebvüpen wi wa.

¹⁶Tsüna ayikha ccü wi ben nu Hinnom Yyiketijü mu keben aghawa Refaim Yyiketijü kenten wi cüben. Tsüna acülawa sasen Hinnom Yyiketijü wi wa Jebus na acülawa Enrogel wi cü.

¹⁷Tsaseng wi tsüna aghawa Enshemesh wi shu nu Adummin Pass kaghape Gelilot wi wa. Tsaseng wi aggü na Bohan Lon (Bohan na Reuben tsa kesü) wi cü,

¹⁸nu sasen Jordan Yyiketijü mu keben aghawa wi shu. Tsüna yyiketijü wi cü,

¹⁹nu Beth Hogla na aghawa wa, nu Jordan Ghaku na Keshü Tssükedone wi kedu tsüna aghawa wi ma kenten saben. Ha na acülawa ggü.

²⁰Jordan Ghaku tsüna nishuwa ggü. Aggü hathu non wi ayyi ha Benjamin mizza theghithu na pi mathu ji saya.

²¹Benjamin mizza theghithu ji anyunutithu na: Jerikho, Beth Hogla, Emek Keziz,

²²Beth Araba, Zemaraim, Bethel,

²³Avvim, Para, Ofra,

²⁴Khefarammoni, Ofni, nu Geba: anyunuti taghakeni pi tsüthu kevü wi anyutithu saghu.

²⁵Ciwi hathu la ben; Gibeon, Ramah, Beeroth,

²⁶Mizpah, Khefirah, Mozah,

²⁷Rekem, Irpeel, Taralah,

²⁸Zela, Haelef, Jebus (nyelela Jerusalem), Gibeah nu Kiriath Jearim: anyunuti taghamejü pi tsüthu kevü wi anyutithu saghu. Ayyi hawa ha Benjamin mizza theghithu na pi mathu ji saya.