Read Northern Rengma Naga JOSHUA 2 Bible Online

JOSHUA 2 - Northern Rengma Naga bible

JOSHUA 2

¹ Tsaseng wi Joshua na Akakia kemnanpen wina wahhai keni kizala wa kuthila Kanaan yyi wi Jerikho nyunutiwa tsü hhainanlo kesun chi. Manyi na khathansha wi wa anyunutiwa tsü cuya khe, manyi wa keqheza menkedsa nza kesü ma nyan Rahab jjen wi ben.

²Jerikho wi kadimiwa na tsü ghaja Israel nyi pahan na diyyiwa hhainanle gho benle kesa zaya,

³tsalina ma ajüh pi Rahab wi kesun chi: “Njjen wi gho keben meshu keni tsüna diyyiwa maben hhainanle ghoben! Manyi ssi nu shhugholo!”

⁴Nzawa na khi, “Anyi meshu keni ijjen wi ghole, isala manyi khiewa na gho khe hi nchüle. Manyi na ghani du keten wi anyunutiwa kaghapeng jenka npi kekhen wina bvüdha. Manyi na khiewa waten khe hi nchüle, isala nthu na wan manyi jügü wa lethu manyi ghanya mehai.” (Rahab na wahhai keni tsü ssi wa aqae wi ma akhhakhi chan pi chi ketheng cakhu wi kuthia.)

⁷Kadimi nyithu na anyunuti teshi bvü nu kaghapeng jenka khen. Mathu na Jordan kepvüdhi len penwa tsü kecu Israel nyi wahhai keni tsü jügü wa.

⁸Wahhai keni na npi kejen wi Rahab na aqae wi ki

⁹nu manyi wi khi, “Apvüwa na ayyi hapi nthu cüdha kesa hi chüben. Diyyiwa wi anyi tsüdila nthu messithi ben.

¹⁰ Nthu na Ejipt teshi nu keshhugho wi Apvüwa na khati nthu tuwi Kenmie Tssükedone sapi qha thsü khe ithu na zayadha. Nthu na khati nu Jordan na nishuwa Amor kadimi keni Sihon nu Og pathi khe ithu na tsü la zayadha.

¹¹Ithu na tsü cüki zaya meyi messi ntsa sa; nthu ghena ithu kempvüza nmiladha. Apvüwa nthu Nyiza tsüna tang wi nu ayyi ha wi la Anyiza le!

¹²Khili, hi nshinyi noncca kecü ti nthu la itheghithu noncca cüben kesa Apvüwa nyan wina kishenlo, nu hi nondiya kemehai zensu kesü pi hi cülo.

¹³Nthu na iba, ijja, ibaghathu, ipvünonthu, nu mathu theghithu tsüdi hangsha cübenle kesa hi wi khishichilo! Ithu pathi nsa lalo!”

¹⁴Manyi ma wi kiza, “Ishinyi na ishinyi kekhi ha nsala lethu, Anyiza na ishinyi kahangli khuya kesawa sa! Keujüla no ithu kekuli cüki ha pi thola nkizala lethu, Apvüwa na ayyi hapi ithu kecü wi ithu na kemehai sa no noncca cüben kesa ishinyi na no wi khishiben.”

¹⁵Rahab na anyunutiwa khweti miwi na ajjen kesü sa sen ndukuwa du keben wi hangden, tsalina ma manyi ya jjenkubhi wi ali wina ccenca sen nu ayyiwi cüya thsüa.

¹⁶Nzawa na khi, “Yyishiphon diyyiwa wi walo, nyelethu kadimi nyi na nshinyi mu yaben. Mathu na npi kheneng kegho chu ciwi ghanan kecheng kuthi benla. Tsaseng wi ccüna nshinyi na nshinyi len wi whalo.”

¹⁷Manyi na ma wi khi, “No ishinyi ya khishikechi tsü ishinyi na nieben.

¹⁸No hati salo. Khathansha wi ithu na nthu yyi nka gho khe no ishinyi ya ccenca cü thsü kesa ali kenmie ha pi njjenkubhi wi misüki theng lalo. Nba, njja, nbaghathu, nu nba theghithu tsüdi cighu pi njjen wi chiyalo.

¹⁹Keujüla anyi kesü njjen wina shhunu wa shü lethu, tsüna ithu khhi nye, ma ketanla ma kesazzi; isala ajjen wi no gweghe keben kesüla pathi lethu, tsüna ithu khhi le.

²⁰Isala keujüla no ithu kulikeben cüki hapi nyu kiza lethu, no ishinyi ya no wi khishikechi tsü ishinyi na nie nben.”

²¹Nzawa na anlo khi nu manyi kesun pi bvü thsüa. Manyi kebvü seng wi nzawa na ali kenmie tsüpi ma jjenkubhi wi misükia.

²²Wahhai keni na yyishiphon thu wi wa kuthiwa. Kadimi nyithu na ghanan kecheng diyyiwa tsüdi wi manyi bha, isala mathu na manyi mu meyala kesalina mathu Jerikho wi kheneng wha.

²³Tsaseng wi wahhai keni na yyishiphon wina aghaku pvüdhi sen nu Joshua wi whaneng. Manyi na wa mangwa khati sa khe tsüdila khipi ma kiza,

²⁴nu khi, “Apvüwa na diyyiwa maben pi ithu cüdha kesa chütiben. Ciwi anyi tsüdila ithu messiben le.”