Read Northern Rengma Naga JOSHUA 23 Bible Online

JOSHUA 23 - Northern Rengma Naga bible

JOSHUA 23

¹Apvüwa na Israel nyithu ya mathu ghinyithu tuwi yazishu benkeya matsü kesie seng wi tsü Joshua na qhai ntsa sadha.

²Tsalina ma Israel nyithu tsüdi baghangthu, ccülikesathu, pendhethu, nu kedithu cighu chi nu khi, “Hi khili tsü qhai ntsa wadha.

³Apvüwa nthu Nyiza na nthu ghena mizzatenti hathu tsüdi miwi sa kechi nthu na pala tsüdila muyadha. Apvüwa nthu Nyiza na nthu ghena aghisa.

⁴Hi mizzatenti khili la kebenthu nu hi mathu miwi khangkeya mizzatenti tsüdi yyi nishuwa Jordan ghaku wina wa niduwa Mediterranean Tssükedone kecu pi nthu mizzatenti ji saya thsüdha.

⁵Apvüwa nthu Nyiza na mathu sapi nthu wina aseng kheneng thsü, nu nthu na atujügüwathu ma mathu jügüshiaben. Apvüwa nthu Nyiza na nthu wi kishenketheng ti nthu na mathu yyi yayaben.

⁶Tsalina kiden-kesha nu Mosa Yenwa lesüshen wi zhüketheng tsüdi nie nu salo. Kesüla nkesa nsala,

⁷nu nthu na anyi nthu jawi kebenthu ngweghela, mathu cenpvüthu nyan nkhila, kekishen wi tsüthu nyan ntengla, tsüthu cenpvüthu nkinyila, nyelela tsüthu tuwi nkukedu lalo.

⁸Tsüti kesawa nye nthu na nansü kecu sa keben ti Apvüwa wi jühtsentsa salo.

⁹Nthu na atujügüwathu Apvüwa na mizzatenti kedi nu kekhang ntsathu jügüshi cü, nu thola nthu shunya nben.

¹⁰Nthu kesü le kesü lela meshu kesü na anyi hazar kesü jügü pi bvü thsüya mehai, kepaghenanye Apvüwa nthu Nyiza na khishiketheng ti ma nthu ghena aghi saben.

¹¹Tsalina kiden-kesha nu Apvüwa nthu Nyiza ghali yalo.

¹²Keujüla nthu na ajühmeya nu mizzatenti nthu jawi kebenthu gweghe nu mathu ssi nu keyali wa lethu,

¹³nthu na atujügüwa lela Apvüwa nthu Nyiza na mizzatenti hathu jügüshi nben kesa chüya metsilo. Tsüti kesawa nye mathu na nthu ghena aca nyelela ayyiku kesü ti kemessi ben nu nthu geshi kihheghe kecü kinaa ti nyelela nthu nyon wi aghazü keben ti saben. Nu tsüna nthu kesüla Apvüwa nthu Nyiza na ayyi kemehai pi nthu kecü hawi keben chu ha saben.

¹⁴“Khili tsüwi ha keshü matsü na gho hi cudha. Nthu tsüdila nthu leben nu kahang wi Apvüwa nthu Nyiza na khishiketheng ti ma pala kemehai tsüdi pi nthu cüle kesa chüben. Ma khishiketheng tsüdila sacen; kesüla nsala nsale.

¹⁵Isala ma nthu wi khishiketheng tsüdi sacen kesa ti ma nthu khitekemessi tsüdila saben.

¹⁶Keujüla nthu na cenkethenjüh Apvüwa nthu Nyiza na nthu salo kekiza tsü n-niela nu acenpvü kepathu kekuli sa nu kinyi wa lethu, ma aghekepvü wina kemeten pi nthu cü nu nthu kesüla ma ayyi kemehai pi nthu kecü wi ha ben nkeya tsüna ghoaben.”