Read Northern Rengma Naga JOSHUA 3 Bible Online

JOSHUA 3 - Northern Rengma Naga bible

JOSHUA 3

¹Dhitsü ghanenwa wi Joshua nu Israel nyi tsüdi ghanen mitu na shagha Akakia wi kemnanpen tsü teshi nu Jordan wi wa tsü pvüdhile kemnanpen sa nu hieben.

²Ghanan kecheng seng wi ccülikesathu na kemnanpen wi wa

³nu anyithu kiza, “Khathansha wi keqhaikedithu na Apvüwa nthu Nyizawa Cenkethenjüh Khitson tsü pie keten muya khe nthu na kemnanpen tsü pheghe nu mathu nie walo.

⁴Nthu na alen hewi npi ghanan, tsalina mathu na alen pi nthu kizaben. Isala Cenkethenjüh Khitson kete wi nwala; kilometer kesü tsü seng wi temejalo.”

⁵Joshua na anyithu wi kiza, “Nthu samethayalo, kepaghenanye dhitsü wi Apvüwa na nthu jawi amankesa kulichiden.”

⁶Tsaseng wi ma keqhaikedithu na Cenkethenjüh Khitson tsü pieya nu anyithu tuwi walo kiza. Mathu na ma kekhi ti sa.

⁷Apvüwa na Joshua wi khi, “Hi nansü sa kebenwa ha no pi kedi nyi kesü ti sa nu Israel nyithu tsüdi no kinyikü wa thsüaben, nu hi Mosa ssi kegho ti no ssitenle kesa mathu na chüyaben.

⁸Cenkethenjüh Khitson pie keten keqhaikedithu wi mathu na wa aghaku cuya lethu, mathu atssü pvüdhi wa aghüsa wi nganlo kizalo.”

⁹Tsaseng wi Joshua na anyithu wi khi, “Hewi ghola Apvüwa nthu Nyiza na mangwale khiben khe kinachilo.

¹⁰Nthu na atujügüwathu ma Kanaan, Hitti, Hivi, Periz, Girgash, Amor, nu Jebus nyithu jügüzighe metsiben. Hangkeben Nyiza tsüna nthu jawi benle kesa nthu na chüyaben,

¹¹tsüna ayyi tsüdi wi Apvüwa Cenkethenjüh Khitson na nthu tuwi na Jordan tsü pvüdhi wa lethu.

¹²Khili, Israel mizza kesüsü wi meshu kesüsü kessi pi taghakeni sayalo.

¹³Khathansha wi ayyi tsüdi wi Apvüwa Cenkethenjüh Khitson pie keten keqhaikedithu na mathu ccü pi atssü nneya khe Jordan tssü na lle nwala, nu mmiwa lle dugho keben tssü na apen kesü wi saghu waben.”

¹⁴Tsüna alli kewwi tsü wi sadha, nu aghaku tssü na tiben. Anyithu na kemnanpen teshi nu Jordan pvüdhile kewa wi keqhaikedithu na Cenkethenjüh Khitson pie nu mathu tuwi wa. Keqhaikedithu na aghaku tssü nneya meyi,

¹⁶atssü na lle nwala dan shula Zarethan nyunuti ketsaki Adam kecu dan. Ssanwa lle sen cüla Keshü Tssükedone kecu danbhon nu anyithu na Jerikho kete wina tsü pvüdhi wa.

¹⁷Anyithu tsüdi ayyi keqha wi lentsen nu Jordan npi pvüdhi keyakhi chu keqhaikedithu na Apvüwa Cenkethenjüh Khitson pie nu manon ayyi keqha wi ngan.