Read Northern Rengma Naga JOSHUA 8 Bible Online

JOSHUA 8 - Northern Rengma Naga bible

JOSHUA 8

¹Apvüwa na Joshua wi khi, “Süpahithu tsüdi ssiya nu Ai wi shulo. Messi nyelela accükwenshü nsala. Hi no ya Ai wi kadimiwa miwi khangya thsüaden; ma nyunuti, anyi, nu ayyi tsüdila pi nji saben.

²No Jerikho nu ma kadimiwa miwi mangwa sachi khe tsüti Ai nu ma kadimiwa miwi la sachilo, isala no khili tsü atsanqaithu nu asahangthu tsü pi nji saya yilo. Anyunuti sengwa na wa tsü ssisalo.”

³Tsalina Joshua na ma süpahithu tsüdi ssinu kidenya. Ma süpahi kemehai ntsathu hazar changha kessiya nu agheja wi ahza ha pi mathu cü nu kesun pi

⁴wa thsü: “Wala anyunutiwa tsüna kesie nkesa wi pahanwa kuthiben lalo; isala nyu ssikesalile kesalina kiden benyalo.

⁵Hi inyithu ssinu anyunutiwa tsaki waden. Khathansha wi Ai nyithu na ithu ssikaghashen shhugho khe ithu na hatuwi ti kheneng bvüaden.

⁶Ithu na anyunutiwa wina mathu npi ssi keshhu chu mathu na ithu jügü ben. Ithu na hatuwi ti tsüdila mathu tubvü tenle meshenben.

⁷Isalethu, nthu na kuthibenla nu shhugho anyunutiwa tsü nkayalo. Apvüwa nthu Nyiza na tsü pi nthu cüaben.

⁸Nthu na anyutiwa tsü yakeya seng wi Apvüwa na kekhi ti anni pi tsü mecangchilo. Ahza hathu ha nthu ghena.”

⁹Tsalina Joshua na mathu kesun pi wa thsü, nu mathu na wa Ai na niduwa Ai nu Bethel manyi jüwi kuthi nu hie wa. Nu Joshua na tsü ghaja kemnanpen wi anyithu gweghe ben wa.

¹⁰Ghanenwa wi Joshua na mitu na shagha süpahithu cighuya. Tsaseng wi ma nu Israel nyi ccülikesathu na mathu ssisen Ai wi wa.

¹¹Süpahithu na ma gweghe anyunutiwa kedulen tontiwa wi wa nu aghawa yyiketijü pi Ai nu mathu jü sala kemnanpen sa.

¹²Ma anyi hazar manga-u ssi wa anyunuti na niduwa Ai nu Bethel jüwi kuthi thsüa.

¹³Süpahithu kecükebe pi anyunuti na aghawa kemnanpen ghonpvüwa wi aghikesa ghena kiden theng nu kepathu na niduwa wa. Joshua na tsü ghaja yyiketijü witsü ben wa.

¹⁴Khathansha wi Ai kadimiwa na Joshua nyithu muya khe wan kidenya. Ma nu ma nyithu tsüdila hatu pen witsü Israel nyithu ssisale Jordan yyiketijü wi wa, isala ma nyu na asengwa na gho ma ssikaghashen le keben tsü nchü.

¹⁵Joshua nu ma nyithu na aseng kekheneng ghe sala bvü sen nu ayyikeshü kejentan wi wa.

¹⁶Anyunuti wi anyi tsüdila cipi mathu jügü wa thsü, nu mathu na Joshua jügü sen nu anyunuti temeja wi bvüa.

¹⁷Ai wi npvüzathu tsüdila Israel nyithu jügü wa, nu anyunutiwa tsü shah pi theng nu anyi thola tsü nhiela bvüa.

¹⁸Tsaseng wi Apvüwa na Joshua wi khi, “Npie pi Ai wiwa mitsüyalo. Hi tsü pi no cüaden.” Joshua na ma salo kekiza ti sa,

¹⁹nu ma ma kwen zankiya meyi, anyi kuthi kebenthu na wan shagha anyunutiwa wi bvüdu tsü nkaya. Mathu na kaghaji nu anni pi anyunutiwa tsü mecang chia.

²⁰Ai nyithu na aseng wi ghangchi nan mathu na anyunuti wi anikhu na atssan wi ki keben muya. Mathu na mangla sa nu bvükeya len nmila, kepaghenanye Israel nyithu bvüsen ayyikeshü wiwa wa ketenthu tsüna khili tsü kheneng sengho mathu ssikaghashen le bendha.

²¹Joshua nu ma nyithu na akhang kepathu na anyunutiwa nkaya nu anni pi tsü mecang keben mukeya wi mathu na aseng kheneng wa Ai nyithu pathi shhua.

²²Israel nyi anyunutiwa wi kebenthu na gho mathu gweghe nu aghisa. Tsalina Israel nyithu na Ai nyithu vüya nu mathu tsüdila pathi khia. Anyi kesütanla bvü meya, nu thola hang meyala.

²³Isala mathu na Ai wi kadimiwa tsü ma kahang ghan sen nu Joshua wi gho.

²⁴Israel nyithu na ayyikeshü wi aghinyithu jügü wa mathu tsüdi pathi khia. Tsaseng wi mathu na kheneng Ai wi wa anyi tsüdila pathi khia.

²⁵Ciwi anyi tsüdi npi kepathikhi chu Joshua na ma pie pi Ai wiwa kemtsü tsü nteshi. Tsü ghanan Ai wi anyi hazar taghakeni, nza npvüza mabenla pathia.

²⁷Apvüwa na Joshua kekiza ti Israel nyithu na anyunutiwa wi asahangthu nu atsanqaithu shukeya tsüpi mathu ghena thengya.

²⁸Joshua na Ai tsü mecang nu yasatha pi teshia. Tsüna nansü lela kheni ti saben.

²⁹Ma Ai wi kadimiwa pi achanton kesü wi hangthi nu ma kamang teshi pi minulen kecu ciwi ben thsüa. Ghani du keten wi ma kamang tsü pieshalo kesa Joshua na ahza khuchi, nu tsü piesha pi anyunuti khweti-jenka kedulen wi cüchia. Mathu na alon kejon pi tsü miwi kecenbhon nu tsüna nansü kecu la ben.

³⁰ Tsaseng wi Joshua na Ebal Yikha wi kekinyipen kesü sapi Apvüwa Israel Nyizawa tsü cü.

³¹ Ma Apvüwa maghawa Mosa na kecükegwe pi Israel nyithu kecü, nu Mosa Yenwa na kekhi kenie wina “Amighe pi nkaha lonthu pi kekinyipen kesü” tsü sa. Tsü miwi mathu na mecang pi kekinyi hhanshathu sapi Apvüwa cü, nu mathu na kecca ghena kekinyi la sachi.

³²Ciwi Israel nyithu nyon kemu wina Joshua na Mosa na zhüketheng Ayenwa tsü kesü pi alon miwi zhüya.

³³ Israel nyithu, mathu ccülikesathu, kedithu, nu pendhethu, mathu jawi keben asangthu la gweghe Levi nyi keqhaikedithu na pie keten Apvüwa Cenkethenjüh Khitson kete witsü keghanglila ngan. Anyithu kegishü pahan sengwa na Gerizim Yikha nu kegishü kepawa sengwa na Ebal Yikha sala ngan. Apvüwa maghawa Mosa na mathu na kesawegü muyale kesa wi tsüti salo khitheng.

³⁴Tsaseng wi Joshua na Ayenwa lesüshen wi zhüketheng ti kesawegü nu kishen-keshithu Yenwa maben la mesikhhali sichi.

³⁵Israel nyithu, nza nu ghanyithu, nu asang mathu jawi hang kebenthu maben saghu keben tuwi Joshua na Mosa yenkhukechithu tsüdila sichia.