Read Northern Rengma Naga JOSHUA 9 Bible Online

JOSHUA 9 - Northern Rengma Naga bible

JOSHUA 9

¹Israel nyithu na khangkeya cüki tsü Jordan na nishuwa kadimithu tsüdila chüya —yyishiphon thu wi, yyishiphon thu ccü wi, nu Mediterranean Tssükedone katen ketijü na wa aghawa Lebanon kecu; kadimi hathu ha: Hitti, Amor, Kanaan, Periz, Hivi, nu Jebus nyi kadimithu.

²Mathu tsüdi saghuya nu Joshua nu Israel nyithu ssisa.

³Isala Gibeon wi anyithu tsüna Hivi nyithu, mathu Joshua na Jerikho nu Ai miwi kulikechi tsü zaya,

⁴nu mathu na ma mechule cenya. Mathu wa atsse pahan kidenya nu aleshithsü qae nu akhüti kaghawenthu pi mathu gada khhi saya.

⁵Mathu na mathu khhwen ketheng athsü qae nu accüguwen qaethu pvüya. Mathu na amesa ma kivü nu qhayi kesa pvüya.

⁶Isanu mathu na Gilgal wi kemnanpen wi wala Joshua nu Israel nyithu wi khi, “Ithu na alen kesie wina ghoben, ithu na nthu ssinu keponghu samvu ben le.”

⁷ Isala Israel nyithu na khi, “Mangsale ithu na nthu ssinu keponghu sa nu? Nthu na teghatsan wi hang tenla metsiben.”

⁸Mathu na Joshua wi khi, “Ithu na no kekuli saden.” Joshua na mathu keü, “Nthu na thothu nu? Nthu khiewa na gho nu?”

⁹Tsaseng wi mathu na hati khipi ma kiza: “Kediwa, ithu na ayyi lenkesie wina ghole, kepaghenanye ithu na Apvüwa nthu Nyiza cüki tsü zayadha. Ithu na ma Ejipt wi kuli kechi tsüdi zayadha,

¹⁰ nu Jordan na nishuwa Amor nyi kadimi keni: Heshbon wi Sihon kadimi nu Ashtaroth wi hang keten Bashan wi Og kadimi miwi mangwa sachi khe zayadha.

¹¹Ithu yyiwi hang keben nyithu nu accülikesathu tsüdila ithu kizala atsse pahan kidenya nu wa nthu ssinu metu chilo khi. Ithu na nthu kekuli sa, nu ithu keponghu kesü sale nthu keü nanlo khi.

¹²Ithu mesa ha ghangchilo; Ithu jjen teshi nu nthu metule keshhugho wi tsüna yeng-nkhwe kebenle. Isala ghangchilo; khili tsü kicübhi qhayi sadha.

¹³Ithu na kisengtssü pi akhütithu wi chikeben tsüwi ketheü sa kebenle, isala ghangchilo; tsüthu na pvükhhidha. Alenkesie wina kegho ghena ithu thsümeni nu accüguwenthu na qaedha.”

¹⁴Israel nyithu na mathu wi atsse pahan khuya, isala mathu na Apvüwa wi tsü cüki ghena mangla nkeü.

¹⁵Joshua na Gibeon nyithu ssinu gweghe kemehai keponghu kesü sa nu mathu yala hang thsüa. Israel nyitenti ccülikesathu na keponghu sa ketheng tsü niele mathu jühkhishi chia.

¹⁶Keponghu sa nu ghanan kecheng seng wi Israel nyithu na anyi hathu ha ntsakhiwa teghatsan wi hang tenle kesa chüya.

¹⁷Tsalina Israel nyithu na alentsen wa kecheng ghanan wi anyi hathu na hang keben anyunuti hathu cuya: Gibeon, Khefirah, Beeroth, nu Kiriath Jearim.

¹⁸Isala Israel nyithu na mathu npathila, kepaghenanye mathu ccülikesathu na Apvüwa Israel Nyizawa nyan wina mathu wi kekishen kesü sa theng. Anyi tsüdila mathu ccülikesathu wi ha ghena mathu leben nkaghajüh khi,

¹⁹Isala mathu na luneng, “Ithu na Apvüwa Israel Nyizawa nyan wina mathu wi kekishen sadha. Khili ithu na mathu metenmeshaya nbendha.

²⁰Ithu jühkhishi kesalina ithu na mathu ya nhang thsüthu yishü; nyelethu Anyiza na kemeten pi ithu cüaben.

²¹Mathu yala hang thsülo, isala mathu na ithu ghena achan nu atssü kepvüthu sa thsüben.” Accülikesathu na ha khichia.

²²Joshua na Gibeon nyithu ssinu ma wi gholo ahza khuchia, nu mathu wi keü, “Nthu na mangkesa na hewi hang tenthu ithu mechula nthu na alenkesie wina ghole khiten nu?

²³Nthu na hati kesa ghena Anyiza na nthu meshensadha. Nthu nyithu na keshüthangla nssümagha sala Anyiza jjen ghena achan nu atssü kepvüthu saben.”

²⁴Mathu na lunneng, “Kediwa, ithu na tsüti sale, kepaghenanye ithu chükeya na Apvüwa nthu Nyiza na ma maghawa Mosa wi ayyi ha maben pi nthu cülo nu nthu atujügüwathu anyi ciwi hang kebenthu tsüdila pathilo kekhi tsüna ntsakhiwa le. Ithu na nthu messi, nu ithu na shükea kemessi ghena tsüti sale.

²⁵Khili ithu na ncakhu wi sadha; ithu pi ntuwi kemeshonwa sayalo.”

²⁶Tsalina na Joshua na hati sa: Ma mathu khweya nu Israel nyithu ya mathu npathi thsüla.

²⁷Isala ma mathu pi nssümaghathu sa thsü, nu Israel nyithu nu Apvüwa kekinyipen ghena achan nu atssü kepvüthu sa thsüa. Nansü kecu wila apen khiewi Apvüwa kekinyipen kessiya khe mathu na kekuli ha saden.