Read Northern Rengma Naga 2 THESSALONIKANYI 2 Bible Online

2 THESSALONIKANYI 2 - Northern Rengma Naga bible

2 THESSALONIKANYI 2

¹ Ithu Pvüwa Jisu Khrista na gho keten nu ithu gweghe saghu nu ma gweghe wa keten cüki: Icünyuthu, hi nthu wi khie ben,

²Apvüwa tsathangwa tsüna ghodha le kekhi ghena wan nthu leben dhendhe sa nu chükivvü nbenla. Tsüna ikhang atusenjüh-kekhi, nyu kesansi, nyelela lesüzhü kechi wi khishe meshen.

³Anyi thola alen kesütan wi lela nthu nmechu thsüla. Kepaghenanye annighajü wi dedi ketenwa Gheshighenawa tsüna shagha nu asakhenwa kekivvü tsü npi kugho chu Atsathangwa tsüna gho nben.

⁴ Ma acenpvü le khi keten nyelela kinyi keten pvüwa tsüdi shun nu ma pi tsüthu tsüdi miwi kemisiwa sa, nu ma Anyiza Kekinyijjen wi lela dula donki nu ma pi Anyiza le khiben.

⁵Nthu meshen meya kwe? Hi nthu gweghe keben wi ha tsüdi pi nthu kizadha.

⁶Isala tsü sale kesa khili pala pahan na khen keben tsü nthu na chüben. Tsalina matsü wina gheshighenawa tsüna shagha ben.

⁷Amankesa gheshighenawa tsüna kuli bendha, isala mangwa sale ben khe tsü khen kebenwa tsü npi ssikeya chu tsü sa nben.

⁸Tsaseng wi Gheshighenawa tsü pi ccücaben, isala Apvüwa Jisu na gho nu ma pang wi ahathakissa nu ma keten kewegü pi ma pathi nu yasa ben.

⁹Gheshighenawa na Satan kekhang sengho amankesa nu azensu milikemesa kepapa tsüdi sa,

¹⁰nu dedi ketenthu miwi gheshighena kemechu kepapa tsüdi saben. Mathu na dediaben, kepaghenanye mathu na ketizen nu atsentsa tsü yaya nu hangsha meya mvula.

¹¹Tsalina Anyiza na kesazzi kekhang tsü kesun pi mathu miwi kuli thsü kesalina mathu milikemesa tsü nondiden.

¹²Tsalina atsentsawa n-nondila kesami wi kenen sa ketenthu tsüdi meshensa ben.

¹³Icünyuthu, ikhang na matsü tsüdi wila nthu ghena Anyiza nsengthu yishü ben, nthu na Apvüwa kaghali kepvüthu. Kepaghenanye Anyiza na nthu kessi pi atuwa nthu atsentsawa kenondi ghena Aghamu kekhang wina nthu hangsha pi ma nyi kemethathu saya.

¹⁴Ikhang na Jühtheü Kemehaiwa pi nthu kesansi wi Anyiza na nthu ciya; ma nthu ci pi ithu Pvüwa Jisu Khrista nyankethang wi tsü nthu shei muya thsü.

¹⁵Tsalina icünyuthu, zükeqhe ngan nu ikhang pang nu kezhü wi pi nthu kesansi atsentsawa tsü ghansen khvu yalo.

¹⁶Ithu Pvüwa Jisu Khrista ma ketanla nu ithu Bawa Anyiza, ithu tizen nu nanketizen wi anuphan kempvüza nu kaghang kemehai pi ithu kecüwa ya

¹⁷nthu kechü-kenong nu nthu satezü pi keshüthangla kemehaiwa kuli nu khi ketenwa salo.