Read Northern Rengma Naga 2 THESSALONIKANYI 3 Bible Online

2 THESSALONIKANYI 3 - Northern Rengma Naga bible

2 THESSALONIKANYI 3

¹Asakhenwa, icünyuthu, ikhang ghena khielo, isanu nthu jawi kesa ti Apvüwa jüh tsü wan vvüzighe wa kinyikü nu yaya thsüle kesalina.

²Anyiza yala anyi gheshighena nu nkemehaithu wi ithu khushiya thsüle kesalina ikhang ghena la kekhie saben, kepaghenanye tsüdila ketsijühwa tsü nondi nten.

³Isala Apvüwa na jühtsentsa saden, nu ma nthu satezü nu Nkemehaiwa kwen wi nthu noncca cüben.

⁴Nthu wina Apvüwa na kempvüza pi ikhang cü, nu ikhang na nthu kekiza tsü nthu na saben nu saki waben kesa nondiben.

⁵Apvüwa na nthu ssi wa Anyiza ketizen nu Khrista na kekheneng keya khukechi cüki tsü chü kayi keyawa salo.

⁶Icünyuthu, ikhang na ithu Pvüwa Jisu Khrista nyan wina acünyu nontssü nu hang ketenthu nu ikhang kecükegwe pi mathu cü lela tsü n-niela ketenthu ngweghe lalo kesa nthu kizaben.

⁷Nthu ketanla ikhang na khati sa khe tsüti nsathu yishü ben kesa mehaitsü chüben. Ikhang na nthu gweghe keben wi n-nontssü.

⁸Ikhang na ma men pi nkecü tsü tho nüntsse la ndsa. Isala ikhang na agüccü nu kuli; ikhang na nthu kesü likesaghang la nsale kesalina aghaja ghanan kuli.

⁹Ikhang na nthu wi kekiqa kekhie-u ben lela hati nsa, isala ikhang na nthu ya nieya thsüle tsütsonca kesü sachi.

¹⁰Ikhang na nthu gweghe keben wi hati pi nthu kizaden, “Anyi thowa na nkuli mvuten khe ma ya ndsa thsü lalo.”

¹¹Ikhang na nthu jawi anyi pahan na kuli nontssü nu hang, nu nyu kepa wi kekuli pakivvü tenle kesa zakeya ghena ha khiben.

¹²Apvüwa Jisu Khrista nyan wina ikhang na ahza pi anyi hati kesathu na kuli nu mathu ketanla mathu nmen mellidsalo kesa kitsan chiben.

¹³Isala icünyuthu, nthu tsü kemehaiwa kekuli wi accükwenshü yishü.

¹⁴Keujüla ciwi anyi pahan na ikhang zhükechi ha wi kekhi tsü nkina mvu lethu ma ghangya nu ma gweghe mangla nsa lalo, isanu ma kejügheya thsüle kesalina.

¹⁵Isala ma pi aghinyi ti nsala, ma pi acünyu kesü ti sa nu ma kitsan chilo.

¹⁶Apvüwa kecca khuchi ketenwa na ma ketanla matsü tsüdi wi alentagha wi la kecca pi nthu kecüwa salo. Apvüwa ya nthu tsüdila ssiben tenlo.

¹⁷Hi, Paul, hi ketanla ikwen pi ha zhü pi nthu shalom saben. Hi lesükezhü tsüdi wi hati inyan zhüden, nu hati zhü chiden.

¹⁸Ithu Pvüwa Jisu Khrista nanketizen ya nthu tsüdi ssiben ketenwa salo.