Read Northern Rengma Naga 1 TIMOTHI 1 Bible Online

1 TIMOTHI 1 - Northern Rengma Naga bible

1 TIMOTHI 1

¹Anyiza ithu Hangshawa nu Khrista Jisu ithu kaghangwa jühkhukechi kenie wi Khrista Jisu apostelwa wina pi —

² Kenondi wi itsa ntsawa Timothi kecü: Abawa Anyiza nu Khrista Jisu ithu Pvüwa ya nanketizen, ketizen, nu kecca pi no kecüwa salo.

³Hi Macedonia wi wa keten len no wi kiza ntsa kechi ti no pi Efesa wi ben thsü mvuben. Ciwi anyi pahan na milikemesa kesansijüh tsü pi sansiben, no wa mathu khen nsathu yishü.

⁴Mathu khalacüki nu abamyi nyankezhü kesiethu ghena ajüh- keccücanliya ketenthu tsü teshilo kizalo; tsüthu na kenondi wina Anyiza kemeshen chüya keten tsü saya nten.

⁵Isala ahza khukechi ha kemtsüwa na aleben kemetha, kemeshen kemetha, nu kenondi tsentsa wina keshhugho nanketizenwa tsü shhughoya thsüle kesa ghena.

⁶Anyi pahan na hathu wina bvü nu ma men nkemi keccünengli wi ben wa mathu len deja wa.

⁷Mathu na Anyiza yen tsü pi kesansithu sa mvu, isala mathu ketanla mathu jühthu nyelela mathu kempvüza sa nu khi keben jjügi tsü chüshi meya.

⁸Ayenwa tsü kesen-u wi sen lethu tsüna mehai kesa ithu na chüben.

⁹Ha meshen nbenthu yishü, ayenwa tsüna anyi kemehaithu ghena nyela ayen kepakhhithu nu nyu jüh nkeyathu, Anyiza nkechüthu nu kesamithu, keccüna nkemithu nyelela aghamulen wi nkenyethu, abajja kepathithu, nyu kepathithu,

¹⁰kahang nkemethathu, qheza-qhenathu, nyu ghan pi kejeüthu, milimesa nu milikemesa sheipi ketenthu nyelela katsüha lela kesansijüh tsentsawa tsü shunla kuli ketenthu ghena sachi.

¹¹Kesansijüh ha wi ajühkemehaiwa, Anyiza nyankethang nu kemihhi wina keshhugho Jühtheü Kemehaiwa tsü pi khilo kesa pi hi dhen chidha.

¹²Hi keseng pi ithu Pvüwa Jisu Khrista cüben, kepaghenanye hi kekuli ha saya kemehai ma kekhang pi hi cü. Ma hi ghan-nan nu hi pi ma kekuli ha kesa qo nyi sakeya thsü ghena hi ma sengben,

¹³ hi kheni ma kethenjüh khi, ma meten-mesha, nu ma kimenni lela. Isala Anyiza na hi nantizenchi, kepaghenanye hi kenondi npi benkeya ghena hi mangwa saben khe nchü.

¹⁴Nu ithu Pvüwa na ma nanketizen ji ntsa pi imiwi meyisha chicü, nu Khrista Jisu wi ithu ji kenondi nu ketizen tsü pi hi cü.

¹⁵Hati kekhi jüh ha na ntsakhiwa yathaya nu nondi keya-u: Jisu Khrista na kesami nyithu hangshaya le ayyi wi gho. Hi mathu jawi nkemehai ntsawa.

¹⁶Isala hi kesami ntsawa ha lela Anyiza na hi nantizen ntsa chicü nu Khrista Jisu na hi ssinu kekuli wi ma kekheneng keya pi hi ccücakechi wina ashiseng wi ma nondi nu anuphan kahang muya ketenthu tsüdi ghena tsütsonca kesü saya thsü.

¹⁷Anuphan Kadimiwa, shü nketen nu mu nketenwa, ma ketan Anyiza, anuphan nu anuphanla kinyikü nu anyankethangwa salo! Amen.

¹⁸Itsawa Timothi, kheni atusenjüh-kekhi wi ncüki kekhi jüh kenie wina hi ahza ha pi no dhen chiben. Aghisa kemehai sale kesalina ajüh tsüthu pi aghighethu ti salo,

¹⁹nu kechükeza metha nu no kenondi tsü ghansenya. Anyi pahan na mathu kechükezawa tsü nkinala mathu kenondi tsü yasadha.

²⁰Tsüthu na Humena nu Alexander, hi manyi pi Satan kekhang wi chi nu manyi meten cü; ha manyi sansi pi kethenjüh nkhi thsüla ben.