Read Northern Rengma Naga 2 TIMOTHI 1 Bible Online

2 TIMOTHI 1 - Northern Rengma Naga bible

2 TIMOTHI 1

¹Anyiza kemeshen wina Khrista Jisu apostel sa keyawa Paul na kesun pi ithu na Khrista Jisu wi khishü ketheng kahang mukeya tsü khi thsü ketenwa —

² itsa hi kaghaliwa Timothi kecü: Anyiza nu ithu Pvüwa Khrista Jisu ya nanketizen, ketizen, nu kecca pi no kecüwa salo.

³Hi ibamyithu ti kemeshen metha sen nu kekuli sa keten ghena hi Anyiza seng ben. Hi aghaja ghanan keshüthangla keseng pi ma kecü wi no meshen benden.

⁴Hi n-nyontssü keqanca tsü meshenben, nu hi inonghe yale kesalina no muya mvuthi benden.

⁵ Hi no njjaqhai Loi nu njja Eunice manyi ti no kenondi tsentsa keben tsü meshenben. No wi tsü ben kesa hi chütiben.

⁶Hi ha ghena no kiza neng ben, hi ikwen chang pi nmiwi kechi wi Anyiza na kesawegü pi no kecü tsü ya qheben thsülo.

⁷Kepaghenanye Anyiza na kemessi Ghamu pi ithu ncü; isala ma Ghamu tsüna kekhang, ketizen, nu kekheneng keya pi ithu cüden.

⁸Tsalina Apvüwa ghena chüza sa jüghe nsala; nyelela hi Khrista ghena atssüzü sa kebenwa ghena la jüghe nsala. Isala Anyiza na kekhang pi no kecü wi Jühtheü Kemehaiwa ghena nshei ketizen kesa tsü khuyalo.

⁹Ithu kekuli ghena nye, isala ma kemeshen nu nanketizen wina ithu hangshaya nu ithu ci pi ma nyithu sayadha. Ma nanketizen hawa ha ayyi npi sa kechi wina Khrista Jisu ghena pi ithu cüdha,

¹⁰isala khilitsü ithu Hangshawa, Khrista Jisu kegho wina pi ithu ccücachi cüdha. Ma keshü kekhangwa tsü pi asakhen sa nu ajühkemehaiwa wina shü nketenwa kahang tsü pi ithu ccüca chidha.

¹¹ Anyiza na hi Jühtheü Kemehaiwa pi thangchilo kesa ghena hi pi apostel nu kesansiwa sa thsüdha,

¹²nu ha jjügi ghena hi hathu wi ketizen saben. Isala hi njüghela kempvüza ben, kepaghenanye hi hi nondi kebenwa tsü chü keben ghena, nu atsathang tsüwa npi kegho chu hi pi ma dhenchi kethengwa tsü ma nonccaya mehai kesa hi chütiben.

¹³Hi atsentsa jüh pi no sansi kechithu tsü ghansen khvu sa nu tsütsonca kesü sala nielo, nu Khrista Jisu wi ithu ji kenondi nu ketizen wi tsü benlo.

¹⁴Ithu wi hang keben Kemetha Ghamu kekhang wina keben kemehai pi no dhenchi ketheng tsü noncca yalo.

¹⁵Asia yyi wi keben Figela nu Hermogena manyi nu kepathu la tsüdi hi teshidha kesa no chüben.

¹⁶Apvüwa ya nanketizen pi Onesifora theghi kecüwa salo, kepaghenanye ma matsü kejon wi la hi sa pi anongheya thsü. Hi atssüzü saben lela ma njüghe,

¹⁷isala ma ghola Rom cuya meyi, ma hi npi mukeya chu hi bha.

¹⁸Apvüwa ya tsü tsathang wi ma nantizen kecüwa salo! Nu ma Efesa wi ighena khaju kulichi khe no chüben.