Read Northern Rengma Naga 2 TIMOTHI 2 Bible Online

2 TIMOTHI 2 - Northern Rengma Naga bible

2 TIMOTHI 2

¹Tsalina itsawa, Khrista Jisu wi nanketizen ithu ji wi tsü no züben yalo.

²Hi chüzathu kejon tu wi na pi kesansijüh no za keyathu tsü khuya, nu tsüthu pi anyi kepathu la sansiya kemehaithu tsü dhen chilo.

³Khrista Jisu ghena süpahi kemehai kesü sa nu ketizen kesa wi nshei khuya.

⁴Süpahi kesü na ma kekuli wi ma kediwa kenen sa mvu kesalina ma anyi kepathu kahang kekuli pi ma pakivvü nten.

⁵Kebvünyi kesü na kejjütseli wi mayen nienu nkebvü chu akutimen kemehai muya nten.

⁶Allikecawa na kekuli piketsü ghena allikewwi wi ma shei atuwa tsü muyaden.

⁷Hi mangwa khiben khe ma jjügi meshen chilo, kepaghenanye Apvüwa na no kiqa pi tsüdi chü thsüya mehai.

⁸Hi Jühtheü Kemehaiwa pi kesansi ti David shicübvügha kesü keshü wi sa pi hangneng kecüwa Jisu Khrista tsü meshen yalo.

⁹Hi Jühtheü Kemehaiwa pi kesansi ghena ketizen sa nu hi nyu kepathi nyi kesü ti amighe ssüli la pvü. Isala Anyiza jüh tsü amighe ssüli pi bhen ntheng.

¹⁰Tsalina hi Anyiza na kessiya kesa nyithu ghena pala tsüdi wi kethankehi nu mathu la Khrista Jisu wina kegho hangshakeya tsü muya nu anuphan nyankethang sengho thsüle kesalina.

¹¹Hati kekhi ha ntsakhiwa: “Keujüla ithu na ma gweghe shü lethu, ithu na ma gweghe la hangyaben.

¹² Keujüla ithu na kethankehiya lethu, ithu na ma gweghe la kadi saben. Keujüla ithu na ma meya mvula lethu, ma la ithu meya mvula ben.

¹³Keujüla ithu na jühtsentsa nsala lela, ma jühtsentsa sa benden, kepaghenanye ma milimesa ya nten.

¹⁴Ha pi n-nyithu kiza nengchi nu mathu ajühthu ghena kicennali nsa lalo kesa Anyiza tu wi na mathu kitsanchi. Tsüna mangla kemehai saya nten, isala anyi tsü kina ketenthu yasa den.

¹⁵Kekuli nyi kesü na ma kekuli ghena njüghela Anyiza jüh tsentsawa tsü khiti pi nyu sansi keten tsüti npiketsü sa nu no ketanla no pi Anyiza tu wi mehaile sayalo.

¹⁶Anyiza wina anyi jügü pi sie pfüpfü bvü thsü keten anyan kekinyen nu kejüphon keccücanli jühthu tsü ghü yalo.

¹⁷Kesansijüh hati kesa ha kekhuma kesü asajjü dsakhi keten tsüti kesa. Nu tsü pi sansi keten jawi meshu keni na Humena nu Fileta.

¹⁸Manyi na atsentsa lenwa tsü teshidha nu ithu hangneng-keshagha matsü na wadha le khi pi kenondithu pahan kenondi yasa benden.

¹⁹ Isala Anyiza na zükeqhe magi kedegü kethengwa tsü pakuliya nben; nu tsü miwi ajüh hathu pi zhütheng: “Apvüwa na ma jithu tsü chüben,” nu “Anyi thowa na ma Apvüwa ji le khiten khe nkemehai tsü teshi nsathu yishü.”

²⁰Ajjen keti kesü wi ahyikhu kepapa kejon ben: pahan suna nu rükatssü pi kesa, kepathu na achan nu anisha pi satheng; pahan na keshathi wi sen nu kepathu na ajümu wi senden.

²¹Keujüla anyi kesü na pala nkemetha hathu wi ma ketanla ma samethaya lethu, ma keshathi wi kesen ji tsü sa yaben, kepaghenanye ma ma satemethaya nu ma Apvüwa na kekuli kemehai tsüdi wi senya kemehai sadha.

²²Kepvünyi tsü wi kenmvuthu tsü ghüya, nu aleben kemetha wina Apvüwa wi kekiqa khie ketenthu gweghe nu ketsatan, kenondi, ketizen, nu kecca tsü ghanglo.

²³Isala kejüphon nu kejima jüh keccücanli tsü ghüya, tsüthu tsü asakhen wi kekitagha senghoten kesa no chüben.

²⁴Apvüwa magha na nyu ssikitagha yishü. Ma tsüdi tu wi ccatssü, mehai, nu kethan-kehi keya kesansi,

²⁵ccapeyi nu ma keshunwa satemeshon nchithu yishü, kepaghenanye Anyiza na mathu leben khapegheya kemehai matsü pi cü nu ghola atsentsawa tsü chüya thsüaben.

²⁶Tsaseng wi mathu na chüya lethu, atsaghang na mathu ghan pi ma jühkina thsü keten ca wi tsüna bvüaben.