Read Northern Rengma Naga 2 TIMOTHI 3 Bible Online

2 TIMOTHI 3 - Northern Rengma Naga bible

2 TIMOTHI 3

¹Meshenyalo asakhen tsathang wi agükeccü tsü na ghoben.

²Anyithu na papa shei meshen, apisa tepagha, kapvü, nu dithang; mathu na nyu kimenni, mathu bajjathu jüh nkina, nyuwakü nmi, hang nmetha;

³mathu na daggü, nanketizen nmi, nyu ghüsa, yasa-yala nu daggü nmehai saben; mathu na kemehaiwa nanmeghü ben;

⁴mathu na nyu mechu, nkiden-kesha, nu awikesa saben; mathu na Anyiza ketizenwa nyela asajjü kenenwa saben;

⁵mathu na ithu keccüna ha amei wi ketan sen nu ma kekhangwa tsü meya mvula saben. Anyi hathu ha ghü yalo.

⁶Mathu pahan na nyu jjen wi wa nu nza nkekhang kheni mathu kesami khhi pvü kebenthu tsü miwi khangya nu sa pi pala tsüdi kenmvu wi chicü,

⁷nza tsüthu na keshüthangla chüyale bhaten lela mathu khiela gho atsentsawa tsü chüya nketenthu.

⁸ Janne nu Jambre manyi na Mosa keshun tsüti anyi hathu na atsentsawa tsü shun ben, —anyi hathu leben na meshenshi meya nu kenondi wi khang meya ladha.

⁹Isala mathu kesie wa nben, kepaghenanye anyi tsüdila mathu kejüphon tsü muyaben. Janne nu Jambre manyi na tsü makesü sa.

¹⁰Isala no tsü hi kesansi, iyencüki, nu hi kahang yen tsü nieya; no hi kenondi, hi kethankehi, hi ketizen, nu hi kekhenengkeya,

¹¹ hi kemeten-kemesha, nu hi ketizenkesa mudha. Antiok, Ikonium, nu Lustra wi imiwi khati sa nu hi kemeten-kemesha nkemehai ntsa wi kethankehikeya tsüdi no chüben. Isala Apvüwa na tsüthu tsüdi wi hi khushi cü.

¹²Anyi kesü le kesü lela Khrista Jisu wina kahang kemehai wi hang mvu ketenwa meten-mesha yaben.

¹³Anyi nkemehaithu nu nyu kemechuthu na nmehai pfüpfü, nyu mechu nu mathu ketanla mathu mechu isaben.

¹⁴Isala nghena tsü, pi no sansi cü nu zükeqhe nondiya kesa wi atsentsa sabenlo. No no kesansithu chüben

¹⁵nu no ghanyi keben tsü wina no Kemetha Ntsawajüh tsü chüyadha, tsüna kemetsa pi no cü nu ssi wa kenondi ghena Khrista Jisu wi hangshakeya wi chicü ya mehai kesa meshen yalo.

¹⁶Ntsawajüh tsüdi wi la Anyiza na ma hathakissa pi chi nu tsü sen nu atsentsawa ghena kesansi, kesazzi satekü, satemeshon, nu ketsatan kahang ghena kecükegwe kechi wi la nsenthu yishü,

¹⁷isanu anyi Anyiza kekuli kesawa yala cencu nu kekuli kemehai tsüdi kesa ghena kiden-keshaya thsüle kesalina.