Read Northern Rengma Naga 2 TIMOTHI 4 Bible Online

2 TIMOTHI 4 - Northern Rengma Naga bible

2 TIMOTHI 4

¹Hi Anyiza nu Khrista Jisu, keshü nu kahang jühkaghaten ketenwa tu wi na nu ma Kadimi sala kekhang sengho keten ghena hi no kiza ntsa saben,

²ketsijüh pi nyu sansilo, tsü pi thangchi (matsü mehaile nmehai lela), no tsüdi wi kethankehi nu nyu sansi keten tsüti nyu zanya, nyu khachi, nu nyu kechü-kenonglo.

³Kepaghenanye anyithu na kesansijüh kemehai tsü nkina mvula kesa matsü na ghoden, isala mathu na mathu kenmvuthu tsü nie nu mathu ghena kesansithu kejon saghuya nu tsüthu na akhuna kemthi jüh pi mathu kizaben.

⁴Mathu na atsentsawa tsü nkinala wa mathu leben pi khala cükithu wi chiben.

⁵Isala no matsü tsüdi wi no kekheneng meyathu yishü; ketizenkesa wi kethankehiya, jühketsinyi kekuli sa, nu no Anyiza magha kekuli tsü maben satenlo.

⁶Ighena tsü hi ahhansha kesa matsü na ghodha; hi kahang ha nteshithu keyishü matsü na ghodha.

⁷Hi aghikemehai sala aghisadha, hi bvü cendha, hi kenondi benyadha.

⁸Nu khili ciwi ighena ketsatan liwen tsü bendha, Apvüwa, ketsatan Jühkekaghatenwa na atsathang tsüwa wi pi hi cüden, — hi ketan nyela ma kegho nmvu nu hie kebenthu tsüdila cüden.

⁹Wan hi wi ghole npiketsü salo.

¹⁰ Dema na ayyiwa ha nenwa kesalina hi teshi nu Thessalonika wi wadha. Kresken na Galatia wi wa, nu Tita na Dalmatia wi wadha.

¹¹ Luk ketan hi gweghe ben. Mark ssiya nu nshinyi gweghe gholo, kepaghenanye ma kekuli wi hi kiqa cüya mehai.

¹² Hi Tukhika kesun pi Efesa wi chidha.

¹³ No kegho wi hi igwomejuwa pi Troa wi Karpa jjen wi teshi ketheng tsü sengholo; lesüshenthu tsü la, tsümiwi lesüten kizzakeu tsü sengholo.

¹⁴ Alexander amighe kicüwa na hi patena ntsa cüle; Apvüwa na ma kekuli kutimen sa pi ma cüben.

¹⁵No ma tu wi kiden-kesha yalo, kepaghenanye ma sashüna ikhang ketsijüh tsü shunden.

¹⁶Hi ketanla isheikekhi atuwa tsü wi thola hi gweghe nbenla hi teshi nu bvüshan. Anyiza na tsü pi mathu nkemeshensawa salo!

¹⁷Isala Apvüwa na hi gweghe ben nu hi satezü cü, isanu hi Judah nyi nkenyethu tsüdila zaya thsüle kesa ghena ketsijüh tsü maben pi thangchiya; nu ssensitemi pang wina hi khushiya.

¹⁸Apvüwa na nkemehai tsüdi wi hi khushiya nu hi hangsha sen wa tang wi ma Kadiyyi wi chicü den. Anuphan nu anuphanla ma nyanthang keyawa salo! Amen.

¹⁹ Hi shalom pi Priskilla nu Aquila manyi nu Onesifora theghi cüben.

²⁰ Erasta na Korinth wi ben wa, nu Trofima na naa wa kesalina hi Mileta wi ma teshia.

²¹Pathsü npi wina hi wi ghole npiketsü salo. Eubula, Puden, Lina, nu Klaudia, nu acünyu kepathu la tsüdi mathu shalom kesun chiben.

²²Apvüwa na nthu ghamu ssiben den. Anyiza nanketizen ya nthu tsüdi ssiben tenlo.