Read Northern Rengma Naga TITA 1 Bible Online

TITA 1 - Northern Rengma Naga bible

TITA 1

¹Anyiza maghawa nu Jisu Khrista apostelwa Paul na zhükechi. Anyiza na kessikeya nyithu kenondi satezü nu ithu keccüna pi kesansi wi mathu ssinu atsentsawa wi walo kesalina hi kessiya nu kesunchi,

²tsüna anuphan kahang ghena kaghang miwi keben. Milimesa nketenwa Anyiza na aghatsan wina kahang ha pi ithu cüle khichidha,

³nu matsü sati kesa wi ma ketsijüh wina pi ccücachi. Hawa ha pi dhenchidha nu hi ithu Hangshawa Anyiza jühkhukechi wi tsü pi thangchi.

⁴ Hi ha zhü pi kenondi wi saghu keben itsa ntsawa Tita cüben. Abawa Anyiza nu ithu Hangshawa Khrista Jisu ya nanketizen nu kecca pi no kecüwa salo.

⁵No yala pala npi kekuli centhu tsü sa pi mehaiya nu anyuti tsüdi wi kemehu wi keshenpfüthu kessiya thsüle kesalina hi no teshi pi Kreta wi chitheng. Hi kecükegwethu tsü meshen yalo:

⁶ keshenpfü kesü tsüna nyu ma nkemeshensa nyi, awubvü kesütan kesa nyi, ma tsangathu na kenondithu, nu nyu mathu yen nkemehai nu nyu jüh nkeya cüki nkekhi nyithu nsathu yishü.

⁷Kepaghenanye kemehu wi accülikesawa tsüna Anyiza kekuli kenonccawa ghena nyu ma nkemeshensa nyi pi nsathu yishü. Ma kekapvü nyi, wan aleben keminu nyi, adikina nyi, yasa-yala nyi, nyelela apisa ghena apvükemene nyi pi sayishü.

⁸Ma kijünyi ssiya mvu keten nyi nu kemehaiwa kenen nyi, kekheneng keya nyi, ketsatan nyi, kemetha nyi, nu ayencashu keten nyi pi nsathu yishü.

⁹Ma ketsijüh kenondi qowa nu kesansijüh tsü zükeqhe ghansen nbenthu yishü. Hati nu ma kesansi tsentsa tsü sen nu nyu kepa wi kechü-kenong nu tsü shun ketenthu kesazzi pi ccücaya mehai.

¹⁰Kepaghenanye ciwi nyu kematang nyi nu mathu jüh kaghacang khisen nyu kemechu nyi kejon na ben, nu tsüna ahyukahan nyithu jawi tanji.

¹¹Mathu jüh kekhi tsü khen nsathu yishü, kepaghenanye mathu apisa muyale kesa ghena nkemejüghe kesazzi pi nyu sansi nu atheghi maben leben yasaben.

¹²Kreta nyithu na mathu jawi atusenjüh-kechü kesü na hati kekhi tsü ntsakhiwa; “Kreta nyithu na keshüthangla milikemesathu, gheshighena kekapvüthu, nu kenontssü ahhai-keshathu.” Ha jjügi ghena no mathu khachi, isanu mathu kenondi kemehai benya thsü,

¹⁴nu Judah nyi khala-cükithu nu anyi atsentsawa meya mvula kesathu wina kegho anyi jühkhukechi tsü nsen thsülale kesalina.

¹⁵Kemethathu ghena tsü pala tsüdila metha; isani nkemethathu nu nkenondithu ghena tsü pala mangla nmetha, kepaghenanye mathu leben nu kemeshen lela nmethaladha.

¹⁶Mathu na Anyiza chüben le khiden, isala mathu kekuli wi ma meya mvula saden. Mathu na nyu nanmeghü nu ajühmeya, kemehai mangla kesa qo nyi nye.