Read Northern Rengma Naga TITA 3 Bible Online

TITA 3 - Northern Rengma Naga bible

TITA 3

¹N-nyithu ya kekhang kesenthu nu kekhangthu kekhu wi ben nu mathu jühkina nu kekuli kemehai tsüdi sale kiden benlo kizalo.

²Mathu anyi kesü ghüla nsala, isala ccapeyi sa nu nkitaghala, nu tsüdi tu wi meza- megüshu salo kiza.

³Kepaghenanye ithu la kuti tsü wi kejüphon sa, nyu jüh nkina, sazzi, kesa mvu nu kenen kepapa kesathu tssüzü sagho. Ithu na nyu nankemeghü nu anyonkisa, ithu na nyu n-nanmvu nu nyu na ithu n-nanmvu kesa wi hang ghodha.

⁴Isala ithu Hangshawa Anyiza na keccaketssü nu nanketizen pi ccüca kechi wi

⁵ma ithu hangshaya. Hawa ha ithu kekuli kemehai ghena nye, isala ma nanketizen ghena ithu hangshaya, Kemetha Ghamu wina ithu satemetha pi pvügha ketheü nu kahang ketheü saya thsüdha.

⁶Kepaghenanye Anyiza na ithu Hangshawa Jisu Khrista wina Kemetha Ghamu meyisha pi ithu miwi pongkemeni sachi cüdha.

⁷Tsalina ma nanketizen wina ithu Anyiza tu wi meshonya nu ithu yala ghang keten anuphan kahang tsü mukeya qo saya thsüdha.

⁸Hati kekhi ha ntsakhiwa. Anyiza nondi ketenthu yala mathu leben tsüdi pi kekuli kemehai kesa wi chiya thsüle kesalina hi ya pala hathu ha khi ntsa sa thsü mvu ben, tsüna anyi tsüdi ghena mehai nu nsenthu yishü.

⁹Isala kicennali, abamyi cüki kezhü kesie, kekitagha, nu Ayenwa ghena kitagha kesathu tsü ghü yalo. Tsüthu tsüna kaghacang nu ma men nmi.

¹⁰Anyi nyu pvükhhi-pvüsa ketenthu tsü zeng ntsa lela keni tughu kitsanchi, tsaseng tsü ma ssinu mangla nsala.

¹¹Anyi tsüti kesa tsüna atsentsawa ghü bvüdha kesa no chüben, nu ma kesami ketanla ma sazziben kesa chütiben.

¹²Hi Artema nyelela Tukhika kesun pi no wi chi lethu, no Nikopoli wi gho hi metule npiketsü salo, kepaghenanye hi pathsü ciwi benle südheyadha.

¹³Npiketsü sala ayenkechüwa Zena nu Apollo manyi kijünyi wa keten tsü kiqa chi cülo, nu manyi yala mangla nhhatu thsüla.

¹⁴Ithu nyi yala kahhatuthu kiqaya thsüle kesalina mathu kekuli kemehai kesa yen chüya thsülo, mathu na ma men nkemi sa hang yishü.

¹⁵Hi gweghe kebenthu tsüdila no shalom saben. Kenondi wina ithu pvüshangthu shalom saben. Anyiza nanketizen ya nthu tsüdi ssiben ketenwa salo.