Read Northern Rengma Naga FILEMON 1 Bible Online

FILEMON 1 - Northern Rengma Naga bible

FILEMON 1

¹Khrista Jisu ghena atssüzü sa kebenwa Paul nu ithu cünyuwa Timothi ishinyi wina pi ithu pvüshangwa nu gweghe kekuliwa Filemon,

² nu njjen wi kemetuli keten kemehu, ithu tssüggüwa Affia, nu ithu gweghe süpahi sa ketenwa Arkhippa kecü:

³Ithu Ba Anyiza nu Apvüwa Jisu Khrista ya nanketizen nu kecca pi no kecüwa salo.

⁴Icünyuwa Filemon, hi keshüthangla kekhie kesa wi ncüki meshen nu Anyiza seng benten.

⁵Kepaghenanye hi no Anyiza nyithu tsüdi ketizen nu no Apvüwa Jisu wi kenondi keben cüki zaya.

⁶Ikhang na nthu kenondithu gweghe ashukesa wina ithu Khrista wi kahang kesawegü tsüdi chüshi kayi wa yalo kesa hi kekhie saben.

⁷Hi ketizen icünyuwa, no nyu ketizen cüki ghena inonghe nu kechü-kenong ntsa saben le! No Anyiza nyithu tsüdi leben satecca cüben.

⁸Ha jjügi ghena hi Khrista wi ncünyuwa ti sala kekapvü sa nu kesa-u tsü salo kesa ahza pi no cüya mehai.

⁹Isala hi no ketizen ghena tsüti kesawa nye hi no wi khieben. Hi Paul, Khrista Jisu mithonwa, nu khili la ma ghena atssüzü saben.

¹⁰ Tsalina hi Khrista wi itsa saya kesawa Onesima kuti wina no wi khieben; kepaghenanye hi atssüzüjjen wina aghamulen wi ma ba sayadha.

¹¹Ma kheni nghena kekiyi mangla nmila sa, isala khili tsü ma ishinyi ghena nsenthu keyishü nyi sadha.

¹²Hi ilebenchi ntsa sa nu khili ma kesun pi no wi chi neng ben.

¹³Hi ajühkemehaiwa ghena atssüzü sa keben wi ma hi gweghe ben nu nkuti sala hi kiqa thsü mvuben.

¹⁴Isala hi no meten pi hi kiqa thsü mvu nben; tsüti kesawa nye, hi no kenen wi na sa thsü mvuben. Tsalina no njüh khu nkechi tsü hi mangla sa nten.

¹⁵Onesima na matsü keujü no teshi bvü kesa tsüna no anuphan ghena ma ssi nengya thsüle kesa ghena lashe.

¹⁶Ma khili nssümagha kesü mele ketan nyedha; isala Khrista wi acünyu kesü sadha. Ma ighena khati ma men ben dha nu! Nu nghena tsü ma nssümagha kesü nu Apvüwa wi acünyu kesü sala khati ma men ben dha nu!

¹⁷Tsalina keujüla no hi pi no kegweghewa sa lethu, no hi ssiya keten ti anonkeghe sala ma ssi neng yalo.

¹⁸Keujüla ma ntu wi sazzi theng nyelela nmen pvü ben lethu, tsü pi imiwi chilo.

¹⁹Hi Paul, hi ikwen pi ha zhü chiben: hi no dhi neng cüben. (Hi no nkiza neng lela no no kahang pi hi kecü-u na ben.)

²⁰Tsalina icünyuwa, no nchala Apvüwa ghena hi kenenwa ha sa cülo; Khrista wi acünyu kesü ghena hi satenong cülo!

²¹Hi no wi kekhie miwi lela no saben kesa hi chüti nu ha zhü pi no cüben.

²²Ighena apen kesü kiden theng cülo, kepaghenanye Anyiza na nthu tsüdi kekhie kina cü nu hi pi nthu wi gho nengya thsüben kesa nondiben.

²³Khrista Jisu ghena hi gweghe atssüzü sa kebenwa Epafra na shalom pi no cüben,

²⁴tsüti hi gweghe kekulithu Mark, Aristarka, Dema, nu Luk la no shalom saben.

²⁵Apvüwa Jisu Khrista nanketizen ya nthu tsüdi ssiben ketenwa salo.