Read Northern Rengma Naga IBRINYI 11 Bible Online

IBRINYI 11 - Northern Rengma Naga bible

IBRINYI 11

¹Kenondi ha ithu na khili nmu lela muyaben kesa kaghang chüti kebenwa tsü.

²Kepaghenanye kheni anyithu na mathu kenondi ghena Anyiza leben kaghawa saya.

³ Kenondi ghena atssan ayyi ha Anyiza jüh wina sachi, isanu pala mu kebenthu tsüna mu nkebenthu wina sachi le kesa ithu na chüshiya.

⁴ Kenondi ghena Abel na Kain miwi kemehaiki ahhansha sa pi Anyiza cü. Ma kenondi ghena ketsatan nyi kesü ti Anyiza leben kaghawa saya, kepaghenanye Anyiza na ma juthu tsü yaya. Abel na shüdha, isala ma kenondi ghena ma khilila ajüh khiben.

⁵ Kenondi ghena Enok na nshü, isala ma zanki pi Anyiza wi chiya nu thola ma mu meya, kepaghenanye Anyiza na ma zankiya. Ntsawajüh na Enok npi zanki keya wi ma Anyiza kenen sa yale khiben.

⁶Anyi thola kenondi nsenla Anyiza kenen saya nben, kepaghenanye thowa na Anyiza wi gho khe ma Anyiza na hangben nu ma bhagho ketenthu kutimen pi cüten kesa kenondi nbenthu yishü.

⁷ Kenondi ghena Noah na Anyiza wi ma nkemu gha keten cüki kekitsan tsü zaya. Ma Anyiza jühkina nu ahun kesü cüya nu ciwi na ma nu ma theghithu hangshaya. Tsü ghena ayyiwa tsü yasa nu Noah na Anyiza wina kegho kenondi ghena ketsatan tsü muya.

⁸ Kenondi ghena Abraham na Anyiza na diyyi pi ma cüle khichi ketheng wi tsü walo ma ci kechi wi ma Anyiza jühkina. Ma khiewa waten khe nchüla ma diyyiwa teshi nu bvüa.

⁹ Kenondi ghena asang kesü sa nu Anyiza na diyyi pi ma kecü wi tsü hang. Ma nithsüjjen wi hang, nu Anyiza wi ajühkhukechi mukeya keni Isak nu Jakob manyi la tsüti sa.

¹⁰Kepaghenanye Abraham na anyunuti Anyiza na kahang chu ghena magi kedegü, matsi zhü, nu sa ketheng nyunutiwa tsü hie gho.

¹¹Kenondi ghena Abraham na qhai ntsa sa nu Sarah la atsanga muya kemehai nsala lela ma aba kesü saya. Ma Anyiza na jühtsentsa saben kesa nondi.

¹² Abraham na keshü ti sa lela, anyi kesü ha wina ashicübvüghathu na tang wi ghotsithu ti ji nu atssükedone ghüsa wi ahhachan si mekeyakhi ti sa shhughoa.

¹³ Hathu ha tsüdila kenondi sen nu shüdha. Mathu na Anyiza jühkhukechithu tsü mu meyala, isala mathu na alen kesie wina tsü muya nu anonkeghe sa, nu mathu na ayyi ha wi asangthu nu kijünyi thu saben le kesa tsü chü.

¹⁴Anyi tsüti kekhithu na mathu na mathu diyyi kesü tsü ghangben kesa methasi muben.

¹⁵Mathu na mathu diyyi teshi kesawa cüki tsü nmeshenla; keujüla mathu na tsü meshenchi lethu, mathu ciwi wa nengya kesa.

¹⁶Isala mathu na diyyi tsü miwi kemehaikiwa tang wi diyyi tsü nmvu. Tsalina mathu ghena Anyiza tsü pi mathu Nyiza le ci njüghe, kepaghenanye ma mathu ghena anyunuti kesü kiden theng.

¹⁷Kenondi ghena Anyiza na Abraham ghankenan wi Abraham na ma tsa Isak pi ahhansha sa pi Anyiza cüale sa. Abraham na Anyiza jühkhukechi tsü mukeyawa, isala ma ma tsa kesütan tsü pi ahhansha sale kidenya.

¹⁸ Anyiza na ma wi kiza, “No Isak wina ashicübvüghathu muyaben kesa hi khishiben.”

¹⁹Anyiza na keshü wi lela anyi sa pi hangya mehai kesa tsü Abraham na chüben, nu tsü khi keben tsüna ma keshü wina Isak muya.

²⁰Kenondi ghena Isak na ashiseng ghena kesawegü pi Jakob nu Esau manyi cü.

²¹ Kenondi ghena Jakob na shü keten pang wi sawegü pi Josef tsathu kesüsü cü. Ma ma khhatssü miwi maghaki nu Anyiza kinyi.

²² Kenondi ghena Josef na shü keten pang wi Israel nyithu na Ejipt teshi nu bvüa keten cüki khi, nu ma keshü kamang pi khati nsathu yishü khe kecükegwe pi theng cüa.

²³ Kenondi ghena Mosa bajja na ma pvügha keya wi asha kecheng pi kuthi. Manyi atsa tsüna atsimehai ntsa kesa mu keya wi kadimiwa ahza tsü nmessila bheghe.

²⁴Kenondi ghena Mosa na qhai keshagha wi ma pi kadimi ngawa tsa le nci mvula.

²⁵Ma matsü keu lela kesami wi ma kenen sa kebenwa nyela Anyiza nyithu gweghe ketizen kesa tsüwa ma kenen sa.

²⁶Ma Khrista ghena ketizen kesa tsüna Ejipt wi keben tsüdi miwi ma men ben kesa tsü chü, kepaghenanye ma ashiseng kutimen tsü ghang.

²⁷ Kenondi ghena Mosa na kadimiwa leben ketsu tsü nmessila Ejipt wina shhua. Ma nkemu Nyiza tsü mukeya ti sala asen nkhenengla.

²⁸ Kenondi ghena ma Shhukeya Kho tsü sachi nu Keshü Nyilowa yala Israel tsa tssütsethu npathi thsüle kesalina ajjü pi ajenkathu keghüki yalo kesa ahza khuchi.

²⁹ Kenondi ghena Israel nyithu na Kenmie Tssükedone pi ayyi keqha ti sala pvüdhiya; Ejipt nyithu na tsüti sale kewa wi atssü na mathu meyanthia.

³⁰ Kenondi ghena Israel nyithu na ghanan tagü Jerikho khweti tsü vü kechi wi tsüna bvüca.

³¹ Kenondi ghena qhezamen kedsawa Rahab pi Anyiza jüh nkekinathu gweghe npathi, kepaghenanye ma anonkeghe sala Israel nyi wahhaithu ssiya.

³² Hi ha miwi mangwa le khi nu? Hi Gideon, Barak, Samson, Jeftha, David, Samuel, nu atusenjüh-kechüthu cüki tsüdi khile kesa matsü na nmi.

³³ Kenondi ghena mathu diyyi kepathu ssinu aghisa nu khangya. Mathu na kemeshonwa tsü sa nu Anyiza jühkhukechi muya. Mathu na ssensitemithu pang khen,

³⁴ annikeqhe kekhang patenen nu njünnu tu wi bvüya. Mathu na nkekhang lela tsü sa pi züya; mathu na aghimehai ntsa sa nu asang süpahi zithu miwi khangya.

³⁵ Kenondi wina nzathu na mathu shilithu keshü sa pi hang neng keya tsü muya. Kepathu na kahang kemehaikiwa wi tsü hang neng yale kesalina nyu mathu meten-mesha lela lisha kecüwa tsü meya mvula shü.

³⁶ Pahan na nyu mathu nankeqhe nu kihhe, nu kepathu na amighe ssüli pi bhen sen nu atssüzüjjen wi wa.

³⁷ Alon pi mathu kecenthi, mathu hakhhi pi keni sa, njünnu pi mathu süthi. Mathu na aneni nu khaghanenithu hyu mphi, hhatu, nyu mathu meten-mesha, nu mathu nanmeghü.

³⁸Ayyiwa na mathu ghena nmehai le! Mathu na ajjenlli nkemithu ti ayyikeshü nu yyishiphon thu wi kegoe deja, nu ayyikuthu wi hang.

³⁹Mathu kenondi ghena khangkeya cüki kezhü hathu ha tsüdila khati kesa dha nu! Isala mathu na Anyiza khishi ketheng tsü mu meyala,

⁴⁰kepaghenanye Anyiza na ithu ghena tsü miwi kemehaiki kiden theng. Ma kemeshenwa tsüna ithu pi saghu keya wi ketan na mathu sa pi cencuya ben.