Read Northern Rengma Naga IBRINYI 12 Bible Online

IBRINYI 12 - Northern Rengma Naga bible

IBRINYI 12

¹Ithu ghena chüzathu ji ntsa ithu vüben. Tsalina alentagha wi ithu len khen nu kesami wi ithu zanten sen keben wi tsüna bvüya nalo, nu lebenzü ntsa sen nu ithu tu wi keben kebvü wi tsü bvü nalo.

²Ithu nyon pi Jisu ithu kenondi kedegü nu sa cencu kecüwa tsü ghangki ya nalo. Ma anonkeghe na ma hie kebenwa tsü ghena kross miwi kejüghe keyawa tsü pi ma men nkemi sa, nu ma khili Anyiza kadipen ajewa wi ben wadha.

³Ma kesami nyithu tu wi khatila kimenni khe tsü meshenchilo! Tsalina nthu accükwenshü nu atuketeshi nsala.

⁴Kepaghenanye nthu na kesami ssi nu keshunli wi tsü nthu kepathi kecu npi ssi kaghashen ya.

⁵ Anyiza na nthu pi ma tsathu ti sa nu nthu kechü-kenong kechi jüh tsü malidha kwe? “Itsawa, Apvüwa na no sansikha kesa tsü pi lekete nsa lalo, nu ma no kha lela accükwenshü nsala.

⁶Kepaghenanye Apvüwa na ma tizen ketenthu tsüdi sansikhaden, nu ma tsa saya kesa tsüdi meten cüden.”

⁷Nthu kesansikha wi tsü kethankehi yalo; Anyiza na nthu pi ma tsangathu ti saben. Ciwi ma bajja na nkesansikha tsanga ben ten kwe?

⁸Keujüla nthu na ma tsangathu sayadha le nu nsansikha lethu, nthu na atsanga ntsawa nye isala nyu ma tsangathu saben.

⁹Asajjü wi abathu na ithu sansikha ten nu ithu na mathu kinyiküden. Isalethu, ithu na tsü miwi khacu ithu ghamulen wi Abawa tsü jühkina nu kahang-u nu!

¹⁰Asajjü wi abathu na mathu tu wi kemeshonwa sala matsü keu ketan ithu sansikha den; isala Anyiza tsü ithu ya ma kemetha wi gwegheya thsüle kesalina ithu ghena kemehaiwa saden.

¹¹Ithu sansikha keben tsü wi tsüna ithu ghena agükeccü khe anonkeghe nye. Isala nkhe wi meten nu sansikhaya kesathu na kecca kutimen ketsantan kahang tsü wwiyaden.

¹² Tsalina nthu kwen nu nthu khhu mnankizü keben tsü zanki nu satezü yalo!

¹³Accü nkemehai yala nmehaila nben thsüla mehaiya thsüle kesalina nthu alen kemeshon wi lentsenlo.

¹⁴Anyi tsüdi ssi nu gweghe kemehaiwa sa nu kahang kemetha wi hang le kesa apiketsü salo, kepaghenanye thola ha nsenla Apvüwa muya nben.

¹⁵ Anyiza nanketizen ncüzzi le kesa ghena kiden-kesha yalo. Thola ya kekha chan kesü ti shigü shagha nu anyi kejon sa pi agüccü thsü nsala.

¹⁶Thola ya Esau ti kahang nkemetha nyelela keccüna nkemi wi hang, ma anün khu kesü ghena ma tssütsewa shei pi jeü kesawa tsüti nsa thsüla.

¹⁷Tsaseng wi ma hacüca sen nu ma ba kesawegü tsü ya mvu nu bha lela ma mu meyala, kepaghenanye ma kuli kethengwa tsü kemilikeya len nmula le kesa nthu na chüben.

¹⁸ Nthu na Israel nyithu kegho ti ngho; nthu na ciwi Sinai Yikha wi anniqhe keshhugho, kejang nu keman, caghamo kesa,

¹⁹tutuwa kekhou hhai, nu ahhai kemisi mu nu za meya. Anyithu na ahhai tsü zakeya wi mathu ajüh kepa wi nkina mvula,

²⁰ kepaghenanye mathu na ahza hati kekhi tsü nkina chala, “Keujüla asahang kesü lela wa ayikha tsü kekidhenwa alon pi kecenthi nsathu yishü.”

²¹ Ghang kemessi sa kesalina Mosa na khi, “Hi messi pi kedheggü ben le!”

²²Tsüti kesawa nye, nthu na tangnyilothu si mekeya khi ssinu Zion Yikha nu hangkeben Nyiza nyunutiwa, tang Jerusalem wi ghoyadha.

²³Nthu na Anyiza tsanga tssütsethu, mathu nyan pi tang wi zhüya kesathu na anonkeghe sa saghu keben wi ghoyadha. Nthu na anyi tsüdi jühkaghaten ketenwa Anyiza wi ghoyadha, nu anyi kemehai ghamuthu sa pi cencu cü keathu wi ghodha.

²⁴ Nthu na cenkethenjüh ketheüwa sa kechiwa, nu Abel jjü miwi kemehaiki jühkhukechi jjü pi keghü kechiwa Jisu wi ghoyadha.

²⁵Tsalina kiden-keshaya, nu khi kebenwa jüh tsü nkina mvu nsala. Ayyi wi Anyiza ketsijüh kekhiwa jüh tsü nkina mvula kesathu na bvü meyala. Isalethu, keujüla ithu na tang wina khi kebenwa jüh tsü nkina mvula lethu, khati nu bvüya ben nu!

²⁶Tsü tsüwi ma hhai na ayyi pakuli, isala khilitsü ma ajühkhuchidha, “Hi kheneng kuti ayyi ketan nyela atssan la pakuli chiden.”

²⁷Ajüh “kheneng kuti” kesa tsüna pala pakuli nkeyathu ya benya thsüle kesalina sahangkechithu tsüdila pakuli nu paphegheaben kesa pi ccücaben.

²⁸Ithu na pakuli mekeyacha kadiyyi kesü tsü muya kesa ghena leben ghashu saben nalo. Ithu na anonyengthi nu Anyiza kinyi, kinyikü nu messila ma kenenwa tsü sa nalo;

²⁹kepaghenanye ithu Nyiza na ntsakhiwa yasa keten nni kesü.