Read Northern Rengma Naga IBRINYI 2 Bible Online

IBRINYI 2 - Northern Rengma Naga bible

IBRINYI 2

¹Tsalina ithu cüzzi nwale kesalina ithu atsentsawa zaya kesawa tsü ghansen khvu meyathu yishü.

²Kepaghenanye tangnyilothu na ketsijüh pi ithu bamyithu kecü tsüna atsentsa, nu thowa na tsü n-nie nyelela nkina khe ma kemeten kemu-u wina muya.

³Keujüla ithu na hangshakeya cüki keti hacucu ha pi ma men nkemi sa lethu, ithu khati nu tsü ghü ya mehai nu? Apvüwa na ma ketanla atuwa sa hangshakeya ha pi khichi, nu tsü za keyathu na tsü atsentsa le kesa pi ithu chü thsüdha.

⁴Anyiza la ma sheikepi sa pi tsüthu wwa kechi na azensuthu, amankesa lenkepapa, nu ma kenen wina Kemetha Ghamu juthu pi gishü cü.

⁵Anyiza na tangnyilothu pi ithu na khi ketenwa ayyi ketheü gho keten wi tsü kekhang kesenthu nsa thsü.

⁶ Tsüti kesawa nye, ntsawajüh pahan wi hati khitheng: “O Anyiza, anyi ha khati kesa lenu no ma meshenki benten nu; anyi melewa ha, no ma nonccaki benten nu?

⁷No matsü keujü ma sa pi tangnyilothu mi meniki cü; no anyankethang liwen pi ma pvü thsü,

⁸nu ma sa pi tsüdi miwi kekhang kesenwa sa thsüdha.” Anyiza na anyi sa pi “pala tsüdi miwi kekhang kesenwa sa thsü ” hati kekhi ha pala tsüdi pi saghuben kesa mutiben; isala ithu na khili anyi na pala tsüdi miwi kekhang kesen tsü npi muya.

⁹Isala matsü keujü Jisu sa pi tangnyilothu mi meniki, isanu ma Anyiza nanketizen wina anyi tsüdi ghena shü thsü; nu ma keshü wi ketizen kesa ghena khili anyankethang nu kekü liwen pvüben kesa ithu na muben.

¹⁰Anyiza pala tsüdi sahangkechi nu kenonccawa na anyi tsüdi ssi gho ma nyankethang wi benya thsüle kesalina ma Jisu sa pi ketizen kesa wina mehai cencuya thsükea tsü ketan na meshon ya. Kepaghenanye Jisu tsüna mathu ssinu hangshakeya wi wa ketenwa.

¹¹Ma anyithu kesami tsü satemetha cüden, nu ma nu anyi satemethaya kesathu saghu Aba kesütan ben. Tsalina Jisu na mathu pi ma cünyuthu le ci njüghedha.

¹² Ma Anyiza wi khiben, “No mangwa sachi theng khe hi tsü pi icünyuthu kizaden; nu hi mathu jawi no seng den.”

¹³ Ma hati la khiben, “Hi Anyiza nondiden.” Ma kheneng khi, “Hi he wi Anyiza na atsangathu pi hi kecü tsü ssinu benden.”

¹⁴Ma atsangathu, kekhi tsüna anyi asajjü kepvüthu ghena Jisu la mathu ti sa nu anyi yen sen nu hang. Ma hati sa nu keshü wina Atsaghang keshü kekhang kebenwa tsü yasa cü,

¹⁵nu mathu kahang tsüdi wi mathu keshü kemessi ghena nssümagha sa ketenthu tsüdi lisha cüle kesalina.

¹⁶Kepaghenanye ha ma tangnyilothu nkiqa kesa mutiben. Tsüti kesawa nye, ntsawajüh na khiben, “Ma Abraham shicübvüghathu kiqachi.”

¹⁷Tsalina ma alentagha wi ma cünyuthu ti sa, nu Anyiza kekuli kesa wi mathu ghena ajühtsentsa nu nanketizen Keqhaikedi Kemisintsa sa, isanu anyithu ya kesami keteshi muya thsüle kesalina.

¹⁸Kepaghenanye ma pi mechu nu ketizen sa thsü nan kesalina ma khili kemechu wi kebenthu kiqa cüya mehai.