Read Northern Rengma Naga IBRINYI 3 Bible Online

IBRINYI 3 - Northern Rengma Naga bible

IBRINYI 3

¹Hi Khristanyi cünyuthu, Anyiza na ciya kesathu! Anyiza na kesunchi pi ithu kenondi wi khishi keten Keqhaikedi Kemisintsa kesa thsüwa Jisu cüki tsü meshen chilo.

² Mosa na Anyiza jjen wi kekuli wi atsentsa kesa tsüti Jisu la ma kessi pi kekuli ha kesa thsüwa Anyiza tu wi atsentsa sa.

³Anyi ajjen kesawa na ajjen tsüwa miwi kinyikü ji kayi muyaden. Tsü makesü Jisu na Mosa miwi kinyikü ji kayi muya qo.

⁴Ntsakhiwa ajjen tsüdila anyi pahan na sa theng, isala pala tsüdi sa kechiwa na Anyiza.

⁵Mosa na Anyiza jjen wi amagha ti sa nu ajühtsentsa sa, nu ma Anyiza na gha keten wi khi ketenthu tsü khi.

⁶Isala Khrista na Atsawa sala Anyiza jjen wi atsentsawa sa. Keujüla ithu na kempvüza sala ithu kenondi tsü ghansen khvu ben lethu, ithu na ma jjenwa tsü.

⁷ Tsalina Kemetha Ghamu na kekhi ti, “Keujüla nthu na nansü Anyiza hhai zaya lethu,

⁸kheni nthu bamyithu na ayyikeshü wi Anyiza ghan-nan, nu ma matang kesa tsüti nthu leben dhu nbenla.

⁹Ciwi mathu na amapi jügha tsü hi kekuli mu lela, mathu na hi ghan-nan wale, Anyiza na khiben.

¹⁰Tsalina hi abvüye tsüwa miwi leben minuya nu khi, ‘Mathu na keshüthangla deja pvü nu ilenthu tsü nchüladen.’

¹¹Hi ileben minu nu kishendha: ‘Mathu na khiela hi kecca yyi pi mathu cü ketheng wi tsü du meyacha!’ ”

¹²Ipvüshang kenondithu, nthu jawi anyi thola nkemehai nu nkenondi leben pvü nu hangkeben Nyiza wina ma ssi bvü thsü nsale kesalina kiden-kesha yalo.

¹³Tsüti kesawa nye, isala ntsawajüh wi ajüh “Nansü” tsüna ithu ghena khi keben chu, kesami ya nthu thola mechu nu leben dhu thsü nsale kesalina keshüthangla nthu khokho kekiqali tenlo.

¹⁴Kepaghenanye keujüla ithu na aghatsan wina ithu kenondi tsü zükeqhe ghansen wala asakhen cuya lethu, ithu tsüdila Khrista kegweghe nyi sayaden.

¹⁵Ntsawajüh na hati khiben, “Keujüla nthu na nansü Anyiza hhai zaya lethu, kheni nthu bamyithu na Anyiza matang kesa tsüti nthu leben dhu nbenla.”

¹⁶ Anyi thothu na Anyiza hhai zaya lela ma matang wa nu? Mosa na ssi nu Ejipt teshi nu shhu kesathu tsüdila.

¹⁷Anyiza na anyi thothu miwi amapi jügha ma leben minu nu? Anyi sami nu ayyikeshü wi shü kesathu tsüdila.

¹⁸Anyiza na kishen nu “Mathu na khiela hi kecca yyi pi mathu cü ketheng wi tsü du meyacha,” kekhi tsü anyi thothu ghena nu? Anyi ma matang kesathu ghena.

¹⁹Mathu na nkenondi ghena ayyi ciwi du meyala le kesa ithu na muyaben.