Read Northern Rengma Naga IBRINYI 4 Bible Online

IBRINYI 4 - Northern Rengma Naga bible

IBRINYI 4

¹Anyiza na ithu yala ma khi ketheng kecca tsü muya thsüle kesalina khili ajühkekhishi tsü pi ithu cüben. Tsalina ithu kiden-keshaya nu nthu kesütanla kecca tsü ya meyala nsa thsüle kesalina.

²Kepaghenanye ithu la mathu ti Jühtheü Kemehaiwa tsü zayadha. Mathu na ketsijüh tsü zakeya wi nondi nu ya nkeya ghena tsüna mathu ghena kemehai mangla sa meya.

³ Isathu, ithu kenondithu na Anyiza khishi ketheng kecca tsü muyaden. Tsüna ma khi ketheng ti, “Hi ileben minu nu kishendha: ‘Mathu na khiela hi kecca yyi pi mathu cü ketheng wi tsü du meyacha.’ ” Ma ayyi sahangkechi tsü wina ma kekuliwa tsü sacendha lela ma ha khichi.

⁴ Kepaghenanye ntsawajüh na apen pahan wi tagüwa tsathang ghena hati khitheng: “Anyiza na ma kekuli tsüdi sacen nu tagüwa tsathang wi mnan wa.”

⁵Tsü jjügi makesü ma kheneng ha khi: “Mathu na khiela hi kecca yyi pi mathu cü ketheng wi tsü du meyacha.”

⁶Atuwa sa Jühtheü Kemehaiwa ha za keyathu na mathu n-nondila kesa ghena kecca tsü mu meyala. Tsalina ciwi kepathu na tsü yaya kemehai ben.

⁷ Anyiza na atsathang kesü khuchi theng, nu tsüna “Nansü.” Ma amapi kejon seng wi David wina ntsawajüh wi khi ketheng tsü khi: “Keujüla nthu na Anyiza hhai zaya lethu, nthu leben dhu nbenla.”

⁸Keujüla Joshua na Anyiza na khishi ketheng kecca tsü pi anyithu cü lethu, Anyiza na tsaseng wi atsathang kepawa cüki tsü khi nkesa.

⁹Isala ciwi khili lela Anyiza na tagüwa tsathang wi kemnan tsüti Anyiza nyithu ghena kecca ben.

¹⁰ Kepaghenanye thowa na Anyiza khi kechi keccawa tsü yaya khe Anyiza na mnankeya tsüti ma la ma kekuli wi ccayaden.

¹¹Tsalina ithu thola mathu na kenondi kezeng ghena kecca tsü mu meyala kesa tsüti nsale kesalina apiketsü sa nalo!

¹²Kepaghenanye Anyiza jüh tsüna hangben nu kuliden, tsüna njünnu yiyha ghapeli keben miwi digheki ben. Tsüna kahangli nu aghamu jüwi, mayen nu ahachan non wi lela dula gishü pi kepapa sa cüden; tsüna anyi leben kemeshen nu kenmvu tsü ghan-nan den.

¹³Ciwi mangla Anyiza tu wi kuthiya nben; ma nyon tu wi sahangkechithu tsüdila shaben nu muthatha ben. Ma tu wi ithu tsüdila ithu cüki nkhithu yishü.

¹⁴Kepaghenanye ithu Keqhaikedi Kemisintsa Jisu, Anyiza Tsawa na wa Anyiza tu wi ben wa kesalina ithu kenondi khishi keten tsü zükeqhe ghansenya nalo!

¹⁵Ithu Keqhaikedi Kemisintsa tsüna ithu nkekhang tsü nanchi meyala kesawa tsü nye. Isala ithu na Keqhaikedi Kemisintsa kesü ben tsüna ithu tu wi kesa ti alentagha pi ma mechu lela nkesamiwa tsü.

¹⁶Tsalina ithu na kempvüza sa nu Anyiza kadipen nanketizen benwa tsü tetsaki wa nalo! Ciwi ithu na nanketizen yaya nu ithu kekiqa nsenthu keyishü wi nanketizen tsü muyaben.