Read Northern Rengma Naga IBRINYI 7 Bible Online

IBRINYI 7 - Northern Rengma Naga bible

IBRINYI 7

¹Melkhizedek hana Salem wi kadimiwa nu Kemisintsa Anyiza wi keqhaikedi kesü. Abraham na aghi wi wa kadimi mejü miwi khangya nu gho neng keten wi Melkhizedek na wala ma metu nu sawegü pi ma cü,

² nu Abraham na ma nyu wi mu keyathu tsüdi wi gishütagha sa nu kesü pi ma cü. (Melkhizedek nyan jjügi atuwa na “Ketsatanwa Kadimi,” nu ma Salem wi Kadimiwa ghena ma nyan jjügi na “Keccawa Kadimi” la.)

³Ciwi Melkhizedek ma ba, ma jja, nu ma bamyithu cüki kezhü mangla nmi; ma kepvügha nu keshü cüki kezhü la nmi. Ma Anyiza Tsawa ti kesa kesü; ma anuphanla keqhaikediwa kesü saben.

⁴Ma khacula di khe ghangchilo! Ithu baqhai Abraham na ma aghi wi mu keyathu tsüdi gishütagha sa nu kesü pi ma cü.

⁵ Ayenwa na Levi shicübvügha wi keqhaikedithu ya Israel nyithu, tsüna mathu nyi, mathu nyi tsüna Abraham shicübvüghathu lela gishütagha wi kesü tsü saghu yalo khichi.

⁶Melkhizedek na Levi shicübvügha nyi nye, isala ma sawegü pi Anyiza jühkhukechi mu keyawa Abraham cü nu ma wi gishütagha wi kesü tsü muya.

⁷Kediwa na sawegü pi kizzawa cüten kesa tsü chütiben.

⁸Keqhaikedithu ghena anyi shü ketenthu na gishütagha wi kesü tsü saghuden, isala Melkhizedek ghena tsü ntsawajüh na kekhi ti hangben ketenwa na gishütagha wi kesü tsü saghu.

⁹Hati khiya mehai, Abraham na gishütagha wi kesü pi kecü tsüna Levi (ma shicübvüghathu na gishütagha wi kesü tsü saghu ketenwa) lela pi cü.

¹⁰Kepaghenanye Melkhizedek na Abraham kemetu tsüwi Levi npi pvügha, isala hati khiya mehai, ma ma baqhaiwa Abraham gwo wi ben.

¹¹Levi nyithu keqhaikedikesa tsü wina Ayenwa tsü pi Israel nyithu cü. Keujüla Levi nyi keqhaikedithu kekuli tsüna haicencu lethu, Aaron wina nyela Melkhizedek keqhaikediyen wina keqhaikedi kepa wi nshagha thsüla mehai kesa.

¹²Kepaghenanye keqhaikedishi tsü kemili lethu, ciwi ayenwa wi la nkemilithu yishü.

¹³Nu ithu Pvüwa ma ghena pala hathu khi kethengwa tsüna ma amizza kepa wi nyi, nu ma mizza wi anyi kesüla keqhaikediwa npi sa.

¹⁴Apvüwa na ma Judah mizza wina gho kesa chüti ben, nu Mosa na keqhaikedithu cüki kekhi wi amizza tsüwa ghena mangla nkhi.

¹⁵Keqhaikedi Melkhizedek ti kesa kepawa keshagha wi ha jjügi mehaitsü chütiya.

¹⁶Anyi sajjü nu ayenwa kenie wina nyela kahang asakhen sa nketen kekhang wina ma pi keqhaikediwa sa thsüa.

¹⁷ Kepaghenanye ntsawajüh na khiben, “No Melkhizedek keqhaikediyen wina anuphanla keqhaikedi kesü saben.”

¹⁸Ayen kaghawenwa tsü nkhang nu kesenwa nkenye ghena pi thengdha.

¹⁹Kepaghenanye Mosa Yenwa tsüna mangla sa pi haicencu meyala. Nu khili kaghang tsü miwi kemehaiki ithu na ciwi na Anyiza tetsaki waya kesawa tsü khuchidha.

²⁰Tsü miwi, Anyiza kekishen la ciwi ben. Anyi kepa pi keqhaikedithu kesa thsü wi kekishen hati kesa nmi.

²¹ Isala kekishen kesü ghena Jisu na keqhaikedi kesü sa keya wi Anyiza na ma wi khi, “Apvüwa na kekishen kesü sadha nu tsü khunengya nben: ‘No anuphanla keqhaikedi kesü saben.’ ”

²²Tsalina makepa kesa hawa ha Jisu sa pi Cenkethenjüh kemehaiki tsü sa keya thsüwa.

²³Ciwi la makepa kesa kesü ben: ciwi keqhaikedithu kejonla ben, kepaghenanye mathu na shü nu kekuli tsü sa meyala.

²⁴Isala Jisu tsü anuphan hangben, nu ma keqhaikedi kekuli kesa tsüna ketsi sen nu anyi kepa miwi wa nten.

²⁵Tsalina ma khili nu keshüthangla anyithu na ma wina Anyiza wi keghothu tsü hangshaya mehai, kepaghenanye ma hangben nu anuphanla mathu ghena Anyiza wi khie benden.

²⁶Jisu na Keqhaikedi Kemisintsa ithu nsenthu keyishüthu sa cü ketenwa tsü. Ma metha; ma wi kesazzi nu kesami mangla nmi. Kesamithu jawi ma pi makepa sa nu ma zanki pi tang miwi chiyadha.

²⁷Ma keqhaikedi kepathu ti nye; ma ghanan kaghapenla ma ketanla ma kesami ghena atuwa sa nu tsaseng wi ccüna anyithu kesami ghena ahhanshathu sa pi nkinyila mehai. Ma ketanla ma pi kutitan nu anuphan ghena ahhansha sadha.

²⁸Mosa Yenwa tsüna anyi nkecencuthu lela pi keqhaikedithu sa thsü; isala Ayenwa seng wi na kegho kekishen sen nu sa keya Anyiza jühkhukechi tsüna Atsawa sa pi anuphanla kecencuwa sa thsüa.