Read Northern Rengma Naga IBRINYI 8 Bible Online

IBRINYI 8 - Northern Rengma Naga bible

IBRINYI 8

¹ Ithu khi keben jjügi maben na ha: ithu na Keqhaikedi Kemisintsa kesü na tang wi kadipen wi Anyiza jenkebenwa na ajewa donki kebenwa tsü bendha.

²Ma anyi na kesa nyela Apvüwa na kesa ntsakhiwa nithsüjjen wi Kemetha ntsawa Pen wi tsü keqhaikedi kemisiwa saben.

³Keqhaikedi tsüdila kekinyi juthu nu asahang pi ahhanshathu sa pi Anyiza cü thsüle pi saden, tsalina ithu Keqhaikedi Kemisintsa la aju pahan pi kechi na ben.

⁴Keujüla ma ayyi wi ben lethu, ma keqhaikedi kesü sa nkesa, kepaghenanye ciwi Ayenwa kenie wina ajuthu khuchi keten keqhaikedithu na ben.

⁵ Mathu na keqhaikedi kekuli sa keben tsüna tang wi sa keben tsü ghang nu sa keya nu tsü ghayen ketan. Mosa na kesa ti ha makesü, ma Cenkethenjüh Nithsüjjen tsü sale keben wi Anyiza na ma kiza, “Pala tsüdila ayikha wi pi no keccüca tsü tsiti nie nu saya metsilo.”

⁶Isala khili tsü, Jisu na Anyiza nu ma nyithu jüwi Cenkethenjüh kemehaikiwa sa kechi tsüti mathu miwi kemehaiki keqhaikedi kekuli tsü pi ma cüdha, kepaghenanye tsüna pala kemehaiki jühkhukechi miwi ben.

⁷Keujüla Cenkethenjüh atuwa wi tsü kesazzi mangla nmi lethu, keniwa tsü nsenla mehai kesa.

⁸ Isala Anyiza na hati kekhi wi ma nyithu kesazzi muya: “Apvüwa na khiben, hi Israel nyithu nu Judah nyithu zan pi Cenkethenjüh ketheüwa wi chiya keten tsathang na gho tendha.

⁹Tsüna hi mathu bamyithu kwen zan sen nu Ejipt wina keshhu tsü wi mathu ssinu kesawa Cenkethenjüh tsüti nye. Mathu na hi mathu ssinu Cenkethenjüh kesa wi tsü jühtsentsa nsala, tsalina hi la mathu n-ghang chila.

¹⁰Khili Apvüwa na khiben, atsathang gho keten wi hi Israel nyithu ssinu Cenkethenjüh sa ketenwa tsüna ha: Hi iyenthu tsü pi mathu kemeshen wi chicü nu pi mathu leben wi zhüki cüden. Hi mathu Nyiza sa, nu mathu na inyithu saden.

¹¹Mathu thola ma pvüshang nyelela ma nyi wi ‘Apvüwa chüyalo’ isa nkesansi lidha, kepaghenanye mathu kizza ntsawa na wala ketiwa ntsa kecu tsüdila hi chüya ben.

¹²Hi mathu kesami teshi cüa, nu mathu kesazzithu meshen nbendha.”

¹³Anyiza na Cenkethenjüh ketheüwa cüki kekhi wi atuwa tsü sa pi ghawen thsüdha, nu pala tsüdila ghawen nu qae kesa tsüna wan nmiladen.