Read Northern Rengma Naga JAMES 4 Bible Online

JAMES 4 - Northern Rengma Naga bible

JAMES 4

¹Nthu jawi aghikesa nu kekitagha ha tsüdi khiewa na ghoten nu? Tsüthu tsüna nthu kenen kenmvu ghena keshüthangla nthu jawi aghisa keben wina keshhugho nye kwe?

²Nthu na pala pahan yamvu ben, isala nthu na tsüthu mu meya, tsalina nthu na nyu pathi le kiden yaden; nthu na pala yamvu ntsa saben, isala nthu na tsüthu mu meya, tsalina nthu na kitagha nu aghisa den. Nthu na Anyiza wi nthu yamvu kebenwa tsü nkekhie ghena nthu na tsüthu muya nten.

³Nu nthu kemeshen nkemehai ghena khie lela muya nten, nthu na pala tsüthu pi nthu kenen wi senle khieden.

⁴Anyi keqhezathu! Ayyiwa ssinu apvüshang kesa tsüna Anyiza ghinyi saben le kesa tsü nthu na nchü kwe? Anyi thowa na ayyiwa ssinu apvüshang saten khe ma ketanla ma pi Anyiza ghinyi saben.

⁵Ntsawajüh wi hati khi keten tsü atsentsawa nmile nmeshen lalo, “Anyiza na aghamu pi ithu miwi kechi tsüna ma nmvu nu anonmeyen benden.”

⁶ Isala Anyiza nanketizen khuchi keten tsüna tsü miwi khangki. Ntsawajüh na khi keben ti, “Anyiza na kekapvüwa shunden, isala nanketizen pi satemeni ketenwa cüden.”

⁷Tsalina nthu kahang pi Anyiza cü. Atsaghang nkemehaiwa tsü ssi kaghanineng, isathu ma nthu wina bvüaben.

⁸Anyiza tetsaki gholo, isathu ma la nthu tetsaki ghoben. Nthu kesami nyithu nthu kwen metsilo! Nthu nkenyeghe kesathu nthu leben satemethalo!

⁹Ahathanathi sa, anongü nu qailo; nthu nonkeghe ya kiqai sa thsü, nu nthu tukemezah ya kejang sa thsülo!

¹⁰Apvüwa tu wi nthu satemeniya, isathu ma nthu pieki cüben.

¹¹Icünyuthu, khokho nkethenli lalo. Anyi thowa na ma cünyuwa then nu ma ghan ten khe ma Ayenwa then nu tsü ghanben. Keujüla nthu na Ayenwa tsü ghanten lethu, nthu na Ayenwa tsü keniewa nyela tsü kaghanwa saben.

¹²Anyiza ketan na ayen khukechiwa nu kaghanwa. Ma ketan nyu hangshaya nu yasa cüya mehai. Nthu na thowa le meshen nu nthu jenphonwa ghanten nu?

¹³Nthu hati khi ketenthu khili ijühkinalo, “Nansü nyelela dhitsü wi ithu na anyunuti kesü wi wala ciwi ben nu asensa nu apisa kejon saghu yaden.”

¹⁴Nthu na dhitsü wi nthu kahang khati saben khe nchü le! Nthu na anni kekhu matsü keu ketan benla nu nmila keten tsüti kesa.

¹⁵Nthu na hati kekhi-u: “Keujüla Apvüwa kemeshen ti lethu, ithu na hangben nu katsüha lela saden.”

¹⁶Isala nthu na khili kapvü nu awisa benden; kekapvü ha tsüdi kesazzi.

¹⁷Tsalina anyi thowa na kemehai ha kesa-ule kesa chü nu nsala khe tsüna ma ghena kesami.