Read Northern Rengma Naga 1 PITOR 2 Bible Online

1 PITOR 2 - Northern Rengma Naga bible

1 PITOR 2

¹Tsalina nthu nkemehai tsüdi ghü yalo; milimesa, nkenyeghe sa, anyon ghopvü, nyelela kekimenni jüh khi nsa layi.

²Nthu na tsü jjü nu shigü wa hangshayale kesalina memethu ti keshüthangla aghamulen wi tsenitssü kemetha tsü nmvu ben tenlo.

³ Ntsawajüh na khiben, “Nthu ketanla Apvüwa na khatila ccatssü khe chüyadha.”

⁴Kahang lonwa anyithu na ma men nmi le meya mvula lela Anyiza na pi ma men keben ntsa sala kessiya kesawa Apvüwa wi tsü gholo.

⁵Kahang lonthu ti sa gho nu nthu pi aghamulen wi kekinyijjen kesa wi sen thsülo, ciwi nthu na kemetha keqhaikedithu kekuli sa nu Jisu Khrista wina aghamulen wi keya qo hhanshathu sa pi Anyiza wi chiben.

⁶ Kepaghenanye Ntsawajüh na khiben, “Ghangchilo, hi alon menkedhu kesü kessi pi Zion wi alondonbvü sala chitheng; nu anyi kesü le kesü lela ma nondi ketenwa khiela kejügheya meyacha.”

⁷ Nthu ma kenondithu ghena alon ha ma men ben ntsa, isala ma nkenondithu ghena tsü: “Ajjenkesathu na ma men nmile meya mvula kesa lonwa tsüna ma donbvü aghutiwa sa shaghadha.” Ntsawajüh kepa wi la khiben, “Hawa ha anyithu ccümeshüya keten lonwa tsü, alon tsüna mathu sa pi khuli wa thsüaben.

⁸ Mathu ajühwa tsü nkenondi ghena khuli wa; mathu tsüti kesa tsü Anyiza kemeshen.

⁹Isala nthu na kessikeya mizza, kadimi keqhaikedithu, kemetha mizzatenti, Anyiza nyithu, Anyiza kekuli amankesathu tsü pi thangchilo kessiya, ma kejang wina nthu cishi pi ma kewegü, amankesa wi chiya kesawa tsü.

¹⁰ Kuti tsü wi nthu na Anyiza nyithu nye, isala nthu khili tsü ma nyithu sayadha; kuti tsü wi nthu na Anyiza nanketizen nchü, isala khili tsü nthu na ma nanketizen muyadha.

¹¹Ipvüshangthu, ayyi ha wi kijünyi nu asangthu sa keben tsüti hi nthu wi khiben! Ayyi sajjü kenenthu tsü nsala, tsüna keshüthangla aghamu tsü ssinu aghisa den.

¹²Anyiza nkechüthu jawi nthu kahang yencüki mehaiya, mathu na nthu nkemehai kesathu le khi pi nthu metsimeni lela mathu na Anyiza kegho tsathang wi nthu kekuli kemehai chüya nu Anyiza seng ben.

¹³Apvüwa ghena nthu anyi kekhang kesenthu tsüdi jühkinalo: Kadimiwa, ma tsüdi miwi kediwa,

¹⁴nu ma kesun pi nkemehai kesathu kemeten muya nu kemehai kesathu keseng muya thsü keten ahngthu jüh la kinalo.

¹⁵Kepaghenanye Anyiza na nthu kekuli kemehai kesa ghena anyi pala nkechüthu na kejüphon jüh kekhi tsü sa pi ccen sa thsü mvuben.

¹⁶Kekhen nkemi nyi sala hanglo; isala nthu mangla kekhen nkemi tsü sen nu nkemehai pabhon kesawa nyela Anyiza nssümagha sa hanglo.

¹⁷Anyi tsüdi kinyikü, npvüshang kenondithu tizen, Anyiza messikü, nu Kadimi kinyikü salo.

¹⁸Nthu nyu maghathu, nthu pvüthu na ccatssü nu kemehai nyi sale kedaggü nyi sa lela mathu jühkina nu kinyikü pi ccücalo.

¹⁹Nthu na kepvü-u nkenye wi ketizen sa ben lela kekhenengya lethu, Anyiza na tsü ghena sawegü pi nthu cüben, kepaghenanye nthu na Anyiza kemeshen chü benden.

²⁰Nthu na kesazzi ghena nyu nthu kiccü kecü wi kekheneng ben lela anyan kemehai mangwa ben nu? Isala keujüla nthu na kemeshon kesa ghena ketizen sa lela kekhenengya lethu, Anyiza na sawegü pi nthu cüben.

²¹Ha ghena Anyiza na nthu ciya, kepaghenanye Khrista na nthu ghena ketizen sa nu nthu ya ma cükha tsü nieya thsüle kesalina nthu ghena tsütsonca kesü sa pi theng cüdha.

²²Ma kesami nsa, nu ma pang wi milikemesa kekhi thola za meya.

²³ Nyu ma kimenni lela ma tsü nluneng; ma ketizen sa lela nyu npateqhe, isala ma kenondi pi atsentsa jühkaghaten ketenwa Anyiza miwi chia.

²⁴Ithu yala kesami wiwa keshü sa nu ketsatan ghena hangya thsüle kesalina Khrista na ithu kesamithu pvü nu kross miwi shü, nu ma gwo wi ayisüthu tsüna nthu sa pi mehai cüdha.

²⁵Nthu na khaghanenithu mathu len deja wa kesa ti sa, isala khili tsü nthu ssi neng gho nthu ghamu Kehiewa nu Kenonccawa wi chidha.